කූට ලෙස සකස් කළ එක්සත් අරාබි එමීර් රාජ්‍යයේ ගමන් බලපත්‍ර භාවිත කර ඉතාලියේ රෝම නුවර වෙත පැන යාමට තැත් කළ සිරියානු ජාතික පවුල් දෙකකට අයත් සාමාජිකයන් 07 දෙනෙකු ඊයේ (12) උදෑසන කටුනායක ගුවන්තොටුපොළ ආගමන විගමන දෙපාර්තමේන්තු නිලධාරීන් විසින් අත්අඩංගුවට ගනු ලැබීය.
මොවුන් සිරියාවේ වාසය කළ වැඩිහිටියන් තිදෙනකු සහ කුඩා දරුවන් සිව් දෙනෙකුගෙන් සමන්විත පවුල් දෙකකි.
මොවුන් ඊයේ (12) උදෑසන 07.20ට ඉන්දියාවේ චෙන්නායි බලා පිටත්ව යාමට නියමිත, ඉන්දීය ගුවන් සේවයේ ඒ.අයි.- 282 දරන ගුවන් යානයට පිවිසීම සඳහා කටුනායක ගුවන්තොටුපොළ වෙත පැමිණ තිබුණි.
ඔවුන් තම ගුවන් සේවා නිශ්කාශන කටයුතු නිමා කර ගුවන් තොටුපොළ විගමන කවුළු වෙත පැමිණ තිබූ අතර, එහිදී සේවය කළ ආගමන විගමන නිලධාරීන්ට ඇති වූ සැකය මත, මොවුන්, ඉදිරිපත් කළ ලියකියවිලි ද සමඟ දේශසීමා ආවේක්ෂණ ඒකකය වෙත යොමු කිරීමට පියවර ගෙන තිබුණි.
එහිදී සිදු කළ තාක්ෂණික පරික්ෂා කිරීම්වලදී මෙම ගමන් බලපත්‍ර කූට ලෙස සකස් කළ ඒවා බව තහවුරු වී තිබේ.
ඉන්පසුව මෙම සිරියානු ජාතිකයන්ගෙන් සිදු ප්‍රශ්න කිරීම්වලදී තමන් මෙම ගමන් බලපත්‍ර එකක් අමෙරිකානු ඩොලර් 2,000 බැගින් තැරැව්කරුවෙකු වෙත ගෙවා, තුර්කියේ දී සකස් කර ගත් බව අනාවරණය කර තිබේ.
මෙම ගමන් බලපත්‍ර පරිලෝකන යන්ත්‍ර (Scaner Test), ඉලෙක්ට්‍රොනික් ගේට්ටු (Electronic Gates) වැනි නවීනතම පරික්ෂා කිරීම්වලදී ද හසු නොවන ආකාරයට, අධිතාක්ෂණික චිපයන් යොදා සකස් කර තිබේ.
මෙවැනි අධිතාක්ෂණික ගමන් බලපත්‍ර, මුල් අවස්ථාවේ දීම හඳුනා ගැනීම, ඉහළ වෘත්තීය පළපුරුද්ද සහිත කටුනායක ගුවන් තොටුපොළ තුළ සේවය කරන ආගමන විගමන නිලධාරීන්ට හැකි වීම ඔවුන්ගේ උසස් වෘත්තීය පරිණතභාවයට නිදසුනකි.
මෙම සිරියානු ජාතිකයන් පිරිස මුලින්ම මැලේසියාව වෙත පැමිණ එතැනින් ශ්‍රී ලංකාවට පැමිණ තිබේ. ඉන්පසුව ඔවුන් ඉන්දියාවට ගොස් එතැනින් ඉතාලිය වෙත පලා යාමට සැලසුම් කර තිබූ බව ආගමන විගමන නිලධාරීන් අනාවරණය කර ගෙන තිබේ.
මෙම අත්අඩංගුවට ගැනීම සහ ඒ පිළිබඳ විමර්ශන කටයුතු ප්‍රධාන ආගමන විගමන නිලධාරීන් වන වයි.ඒ.එස්.ඩී. යාපා සහ ඩී.එස්.ඒ. දෙහිවත්ත යන මහත්වරුන්ගේ උපදෙස් සහ අධීක්ෂණය මත ආගමන විගමන නිලධාරි ඩබ්ලිව්.ඒ.ඩී .එන්. අරවින්ද යන මහත්වරුන් විසින් සිදු කරනු ලැබීය.
මෙසේ අත්අඩංගුවට ගත් මෙම සිරියානු ජාතිකයන් පිරිස මේ පිළිබඳ වැඩිදුර විමර්ශන කටයුතු සඳහා කටුනායක ගුවන්තොටුපොළ අපරාධ පරීක්ෂණ දෙපාර්තමේන්තු නිලධාරීන් වෙත භාර දී තිබේ.
(කටුනායක - ටී.කේ.ජී.කපිල)
0 Comments