සැමියා පැදවූ ත්‍රිරෝද රථය අනතුරකට ලක්ව පෙරැළීමේදී එහි සවිකර තිබූ හුඩ්රැක් එක බිරියගේ හිසේ ඇනීමෙන් සිදුවූ අනතුරකින් බරපතළ තුවාල ලබා රෝහල්ගත කෙරුණු බිරිය ජීවිතක්ෂයට පත්ව ඇතැයි කැස්බෑව පොලිසිය පවසයි.
මෙසේ මියගොස් ඇත්තේ පොල්ගස්ඕවිට කිරිගම්පමුණුව අංක 55/ 01 B හි පදිංචි වතවනවිතානගේ නයනා කුමාරි නමැති (55) හැවිරිදි දෙදරු මවක බව පොලිසිය කියයි.
මෙම කාන්තාව සිය සැමියා සමඟ ත්‍රිරෝද රථයකින් පිළියන්දල සිද්දමුල්ල ප්‍රදේශයේ පිහිටි පෞද්ගලික වෙළඳසැල විවෘත කිරීම සඳහා ත්‍රිරෝද රථයක යමින් සිටියදී කුඩමාදූව වෙල්යාය මැද පිහිටි පාලම මතදී ඉදිරිපසින් පැමිණි ත්‍රිරෝද රථයක ගැටී පෙරැළී ඇත.
අනතුරින් කාන්තාව ත්‍රිරෝද රථයට යටවී ඇති අතර එහි සවිකර තිබූ හුඩ්රැක්එක මෙම කාන්තාවගේ හිසේ ඇනී බරපතළ තුවාල සිදුව තිබූණි. පසුව අනතුරින් තුවාල ලැබූ සැමියා සමඟ බිරිය හෝමාගම මූලික රෝහලට ඇතුළත් කිරීමෙන් අනතුරුව බිරිය ජීවිතක්ෂයට පත්වූ බව පොලිසිය පවසයි.
තුවාල ලැබූ සැමියාගේ තත්ත්වය බරපතළ නොවන බව රෝහල් ආරංචි මාර්ග කියයි.
පසුව අනතුර සිදුවූ ස්ථානයට හෝමාගම හදිසි මරණ පරීක්ෂක සාම විනිසුරු චින්තක උදය කුමාර මහතා පැමිණ ස්ථානීය පරීක්ෂණය සිදුකොට මෘතදේහය පිළිබඳ හදිසි මරණ පරීක්ෂණය හෝමාගම මූලික රෝහලේදී සිදු කෙරිණි .
එහිදී මෘතදේහය පිළිබඳ පශ්චාත් මරණ පරීක්ෂණය හෝමාගම මූලික රෝහලේ විශේෂඥ අධිකරණ වෛද්‍ය නිලධාරී පනීත සෙනෙවිරත්න මහතා විසින් සිදු කළ අතර එහිදී ඉදිරිපත්වූ සාක්ෂි සහ පශ්චාත් මරණ පරීක්ෂණ වෛද්‍ය වාර්තාවට අනුව මොළයට, සුෂුම්නාවට වූ බහුවිධ තුවාල මරණයට හේතුව බවට හෝමාගම හදිසි මරණ පරීක්ෂක සාම විනිසුරු චින්තක උදය කුමාර මහතා නිගමනය කළේය.
එසේම මෙම කාන්තාවගේ මරණය සම්බන්ධයෙන් දැනට රෝහල්ගතව ප්‍රතිකාර ලබන මියගිය කාන්තාවගේ සැමියා සුවවූ වහාම අත්අඩංගුවට ගෙන බල ප්‍රදේශයේ අධිකරණයට ඉදිරිපත් කරන ලෙසට ද හදිසි මරණ පරීක්ෂක චින්තක උදය කුමාර මහතා පොලිසියට නියෝග කළේය.
සිද්ධිය සම්බන්ධයෙන් කැස්බෑව පොලිසියේ පො.කො. (77767) ප්‍රනාන්දු නිලධාරීහු පරීක්ෂණ මෙහෙයවූහ.
(කොට්ටාව - ප්‍රදීප් කුමාර)
0 Comments