තිදරු පියකු අතින් දූෂණය වූ පහළොස් වියැති බාලවයස්කාරියක පෞද්ගලික රෝහලකදී දරු ප්‍රසූතියක් සිදු කර එම දරුවා හදාවඩා ගැනීමට ලබාදීමට කළ උත්සාහයක් වාර්තා වීමත් සමඟ එම දැරියව දූෂණය කළ පුද්ගලයාව හඳුනාගෙන අත්අඩංගුවට ගැනීමට මිදිගම පොලිසිය සමත්ව ඇත.
මෙම දැරිය දූෂණය වීම හා ඇය ගැබිනියක බවට පත්වීම දැරියගේ මවුපියන් විසින් සඟවමින් ඇයව දරු ප්‍රසූතියට සූදානම් කර ඇති බවත් දරු ප්‍රසූතියෙන් අනතුරුව නීතිඥ සහාය ඇතිව බිලිඳා හදා වඩා ගැනීමට වෙනත් පාර්ශ්වයකට ලබාදීමට සූදානම් වී ඇති බවත් පොලිසිය කියයි.
මෙම දැරිය වයස අවුරුදු පහළොවයි මාස දහයක් වන තැනැත්තියකි. වැලිගම පොලිස් වසමේ පදිංචි වයස 30ක් පමණ වන තිදරු පියකු විසින් එම දැරියගේ මවුපියන් නිවෙසේ නැති අවස්ථාවක මීට මාස දහයකට පෙරදී දැරියව දූෂණයට ලක් කොට තිබූ බව පොලිසිය කියයි. කෙසේ වුවද ඒ සම්බන්ධයෙන් නීතිමය පියවර ගැනීම සඳහා දැරියගේ මවුපියන් හෝ වෙනත් අයකු විසින් පොලිසියට පැමිණිලි කොට නැති බව ද සඳහන් වේ.
කෙසේ වුවද එම දැරිය දරුවා ප්‍රසූති කිරීම සඳහා සුදුසු කාලය උදාවීමෙන් පසුව කොළඹ ප්‍රදේශයේ පෞද්ගලික රෝහලකට ඇයව ඇතුළු කර දරු ප්‍රසූතිය සිදු කිරීමට අවශ්‍ය පහසුකම් සලසා දී තිබේ. ඇය බිහිකර ඇත්තේ බිලිඳෙකි. එම බිලිඳා හදා වඩා ගැනීමට නීතිඥයන් මාර්ගයෙන් වෙනත් අයකු වෙත පැවරීමට උත්සාහ ගැනීමේදී රෝහල් තොරතුරු මඟින් නාරාහේන්පිට පොලිසියට ඒ ගැන දැනගන්නට ලැබී ඇත.
ඒ අනුව නාරාහේන්පිට පොලිසිය මඟින් සිදු කළ විමර්ශනයකදී අනාවරණය වී ඇත්තේ එම දැරිය දූෂණය වී ඇත්තේ මිදිගමදී බවය. ඒ අනුව විමර්ශන කටයුතු මිදිගම පොලිසියට භාරදී තිබේ. මිදිගම පොලිසිය මඟින් ඒ අනුව දැරිය දූෂණය කළ තිදරු පියාව ඊයේ (18) අත්අඩංගුවට ගෙන තිබේ. මෙම සිදුවීම සැඟවීමට කටයුතු කළ එම තිදරු පියාගේ සහෝදරියක ද පොලිසිය අත්අඩංගුවට ගෙන ඇත. දැරියගේ නිවෙසට අයථා ලෙස ඇතුළු වී තර්ජනය කිරීම සම්බන්ධයෙන් එම සැකකාරිය අත්අඩංගුවට ගත් බව පොලිසිය කියයි. මෙම දැරිය දරුවකු බිහි කිරීමේ තොරතුරු පොලිසියට වසන් කිරීමේ චෝදනාව මත දැරියගේ මව ද අත්අඩංගුවට ගෙන අධිකරණයට ඉදිරිපත් කිරීමට නියමිතය. මිදිගම පොලිසියේ ස්ථානාධිපති අසෝක අබේවර්ධන මහතාගේ මෙහෙයවීම මත උප පොලිස් පරීක්ෂක කුලරත්න, කාන්තා පොලිස් සැරයන් (4721) හේරත්, කාන්තා පොලිස් කොස්තාපල් (9622) ඉසංකා ඇතුළු නිලධාරීහු පරීක්ෂණ මෙහෙයවති.
(වැලිගම - අබේවික්‍රම ගුණරත්න බණ්ඩාරගම බිමල් ජයසිංහ)
0 Comments