මීගමුව අපද්‍රව්‍ය කළමනාකරණ ආයතනයේ ව්‍යාපෘතියකට පැමිණි චීන ජාතික ඉංජිනේරුවාගේ රුපියල් එක්කෝටි හතළිස් එක් ලක්ෂයක (1,41,00000) මුදලක් පැහැර ගැනීමේ සිද්ධිය සම්බන්ධයෙන් ඔහුගේ ප්‍රකාශ ලබාගෙන අධිකරණයට ඉදිරිපත් කරන ලෙස කොළඹ අතිරේක මහේස්ත්‍රාත් පවිත්‍රා පතිරණ මහත්මිය ඊයේ (13) නියෝග කළාය. පෑලියගොඩ පොලිසිය විසින් මෙම සිද්ධියට අදාළව කරුණු වාර්තා කිරීමේදී මෙලෙස නියෝග ලබා දුන්නාය. පැමිණිලිකාර පාර්ශ්වය වන චීන ජාතික යුවාන් යොන්ග් ශින් නමැති ඉංජිනේරුවා ලංකාවේ සිටීමට අවශ්‍ය වීසා කල් ඉකුත් වීම නිසා චීනය බලා පිටත්ව ගොස් ඇති බව පෑලියගොඩ පොලිසිය අධිකරණයට කරුණු දැක්වීය.
පාතාල නායක ඌරු චුවා සහ සමන් විදේශගත චමින්දගේ ගෝලයා වන අමිල සුරංජිත් සහ දෝන් පුෂ්ප කුමාර මෙම සිද්ධියට අදාළ සැකකරුවන් වන බවත් ඔවුන් සිරගත කර දැනට ඇප මත මුදා හැර සිටින බවක් පොලිසිය අධිකරණයට දැන්වීය. මොවුන් මෙම මුදල් පැහැරගෙන සුඛෝපභෝගී වාහන තුනක් ද මිලදීගෙන ඇති බවට ද පෑලියගොඩ පොලිසිය අධිකරණයට කරුණු වාර්තා කළේය.පැමිණිලිකාර පාර්ශ්වය වෙනුවෙන් ඊයේ දින ඔහුගේ යහළුවකු වන චීන ජාතික හුවැන්ග් සිකායි (HUANG ZHIKAI)අධිකරණයේදී සාක්ෂි ලබා දුන්නේය. කැලණියේ නවාතැන් ගෙන සිටි චීන ජාතිකයාගේ නිවසේ දොර කඩා ඇතුළු වී නිවාසය බිඳ රුපියල් එක්කෝටි හතළිස් එක් ලක්ෂයක මුදලක් සහ වටිනා මැණික් ගල් අල්ලන ලද රත්තරන් භාණ්ඩ පැහැර ගෙන ගොස් තිබූ බව ද පොලිසිය අධිකරණයට දැනුම් දුන්නේය.
අධිකරණයේදී පැමිණිලිකාර පාර්ශ්වය වෙනුවෙන් සාක්ෂි විමසීමේදී විත්තිකාර පාර්ශ්වය නිරන්තරයෙන් බාධා ඇති කළ අතර පැමිණිලිකාර පාර්ශ්වය වෙනුවෙන් පෙනී සිටි නීතිඥවරයා පවසා සිටියේ ජාත්‍යන්තර නඩුවක් වන මෙහිදී මෙසේ ක්‍රියා කිරීම නුසුදුසු බවය.
සාක්ෂිකරු වෙනුවෙන් චීන භාෂා පරිවර්තකයකු ලෙස මහාචාර්ය නදලගමුවේ ධර්මරාජ හිමියෝ අධිකරණයේ පෙනී සිටියහ.
(කල්පනි අබේසිංහ)
0 Comments