දරුවන්ගේ විභාග ප්‍රතිඵල මුහුණුපොතේ පළ කරද්දී ප්‍රතිඵල සටහනේ දරුවාගේ ජාතික හැඳුනුම්පත් අංකය සහ නම පළ කිරීමෙන් වළකින ලෙස කුරුණෑගල කොට්ඨාස අධ්‍යාපන අධ්‍යක්ෂ විපුලි විදානපතිරණ මහත්මිය මවුපියන්ව දැනුවත් කර සිටී.
ජාතික හැඳුනුම්පත් අංකය සහ සම්පූර්ණ නම ප්‍රසිද්ධ කිරීම තුළින් අන්තර්ජාලයේ සැරිසරන හැකර්වරුන්ට එම තොරතුරු පහසුවෙන් ලබාගෙන විවිධ අකටයුතුකම්වල නිරත විය හැකි බව ඇය පෙන්වා දුන්නාය.
හැකර්වරුන්ට දරුවන්ගෙ බැංකු ගිණුම්වලට පිවිස මූල්‍ය වංචා පවා සිදු කළ හැකි බව පවසන විදානපතිරණ මහත්මිය, මීට අමතරව දරුවන්ට හානිකර වෙනත් අකටයුතුකම් සඳහා පවා දරුවන්ගේ මෙම තොරතුරු යොදාගත හැකි බැවින් මුහුණුපොතේ විභාග ප්‍රතිඵල පළ කිරීමේදී එම තොරතුරු බාහිරයට නොපෙනෙන ආකාරයට පළ කිරීමට පියවර ගන්නා ලෙස ද දැනුම් දෙයි.
මේ ආකාරයට අන්තර්ජාලය හරහා ලබාගන්නා තොරතුරු මාර්ගයෙන් දරුවන් සම්බන්ධයෙන් හැකර්වරුන් විසින් කරන ලද අකටයුතුකම් පිළිබඳ තොරතුරු බොහෝමයක් අනාවරණය වී ඇති බව ද විදානපතිරණ මහත්මිය පෙන්වා දුන්නාය. අ.පො.ස. සාමාන්‍ය පෙළ විභාගයේ ප්‍රතිඵල මේ වන විට නිකුත් වී තිබෙන අතර එම ප්‍රතිඵල බොහෝමයක් අන්තර්ජාල ගිණුම්වල ප්‍රසිද්ධ කරමින් තිබෙන ආකාරය දැකගත හැකිය.
(පුෂ්පකුමාර ජයරත්න)
0 Comments