ඌරුබොක්ක ප්‍රාදේශීය රෝහලේ ගිලන් රථයක්, මාතර හීගොඩ හන්දියේදී ලොරි රථයක ගැටීමෙන් ගිලන් රථයේ ගමන් කළ වෛද්‍යවරයා, හෙද නිලධාරිනිය ඇතුළු පස් දෙනකු තුවාල ලබා ඇතැයි ඌරුබොක්ක පොලිසිය පවසයි.
මේ අනතුරෙන් තුවාල ලැබූ පිරිස ඌරුබොක්ක ප්‍රාදේශීය රෝහලට ඇතුළත් කර ඇති බවත්, ඔවුන්ගේ තත්ත්වය බරපතළ නොවන බවත් පොලිසිය පැවැසීය. ඉකුත් 27 වැනිදා සවස 3.40ට පමණ අවුරුද්දයි මාස 06ක් වයසැති දරුවකු වැඩිදුර ප්‍රතිකාර සඳහා ඇඹිලිපිටිය මහ රෝහලට ඌරුබොක්ක ප්‍රාදේශීය රෝහලේ ගිලන් රථයෙන් රැගෙන යමින් සිටියදී රෝහලට හැරෙන හීගොඩ හන්දියේදී මාතර දෙස සිට ඌරුබොක්ක දෙසට ප්‍රධාන මාර්ගයේ ධාවනය කරමින් තිබූ ජංගම බඩු ප්‍රවාහනය කළ ලොරි රථයක ගැටීමෙන් මේ අනතුර සිදුව ඇති බව පොලිසිය පැවැසීය.
අනතුර සම්බන්ධයෙන් ලොරි රථයේ රියැදුරු පොලිසිය විසින් අත්අඩංගුවට ගෙන ඇති අතර, ඔහු රත්නපුර, කුරුවිට, උඩවත්ත ප්‍රදේශයේ පදිංචි 32 හැවිරිදි අයකු බවට පොලිසිය පැවැසීය. අනතුරු සම්බන්ධයෙන් අත්අඩංගුවට ගත් ලොරි රථයේ රියැදුරු මොරවක මහේස්ත්‍රාත් අධිකරණයට ඉදිරිපත් කරන බවත්, වැඩිදුර පරීක්ෂණ පවත්වන බවත් ඌරුබොක්ක පොලිසියේ රථවාහන අංශය පැවැසීය.
(ඌරුබොක්ක ඒ. පී. දයාචන්ද්‍ර සහ කහවත්ත ලසන්ත නිරෝෂණ)
0 Comments