පවුල් ආරවුලක් හේතුවෙන් සිය බිරියගේ හිසට අත්පොරවකින් පහරදී ඝාතනය කර බිරියගේ වැඩිමහල් සොයුරියගේ හිසටද පොරොව පහරක් එල්ල කළ පුද්ගලයකු අත්අඩංගුවට ගත් බව වාද්දුව පොලිසිය පවසයි.
මෙසේ අත්අඩංගුවට ගෙන ඇත්තේ වාද්දුව පොතුපිටිය ප්‍රදේශයේ පදිංචි පුද්ගලයකු බව පොලිසිය කීය.
පොරොව පහරකෑමට ලක්ව මියගොස් ඇත්තේ වාද්දුව පොතුපිටිය ප්‍රදේශයේ පදිංචිව සිටි හසිනි හංසනී රුවන්තිලක නමැති 23 හැවිරිදි එක්දරු මවකි.
මෙම අඹුසැමි යුවළ අතර පසුගිය කාලයේ අඬදබර පැවති ඇති අතර, සතියකට පමණ පෙර සිට බිරිය මාස දෙකක් වයසැති බිලිඳිය සමඟ ඇයගේ මවගේ නි‍ෙවසට පදිංචියට පැමිණ ඇති බව සඳහන් වේ.
ඝාතනයට ලක්වූ කාන්තාව ඇයගේ වැඩිමහල් සොයුරිය සමඟ කිසියම් කටයුත්තක් සඳහා සැකකරු පදිංචි කුලී නි‍ෙවසට ගොස් සිටියදී ඇතිවූ කතාබහකින් පසු සැකකරු දෙදෙනාටම අත්පොරවකින් පහරදී ඇති බව පොලිස් පරීක්ෂණවලදී හෙළිව තිබේ. ඝාතනයට භාවිත කළ ලේ තැවරුණු අත්පොරව අදාළ නි‍ෙවස ආසන්නයේ ඇති කරපිංචා ගසක් අසල තිබී පොලිස් භාරයට ගෙන ඇත.
පානදුර අපරාධ ස්ථාන පරීක්ෂණාගාර නිලධාරීන් පරීක්ෂණ සිදුකිරීමෙන් පසු පානදුර වැඩබලන මහේස්ත්‍රාත් ජයන්ති පීරිස් මහත්මිය ස්ථානීය පරීක්ෂණය සඳහා පැමිණියාය.
සැකකරු පානදුර මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.
ජ්‍යෙෂ්ඨ පොලිස් අධිකාරි චමිල් රත්නායක සහ සහකාර පොලිස් අධිකාරි කමල් ජයනෙත්ති යන මහත්වරුන්ගේ උපදෙස් පරිදි ස්ථානාධිපති ප්‍රධාන පොලිස් පරීක්ෂක චාමින්ද්‍ර කුමාර මහතාගේ මෙහෙයවීමෙන් අපරාධ අංශ ස්ථානාධිපති පොලිස් පරීක්ෂක ගයාන් කහටපිටිය මහතාගේ ප්‍රධානත්වයෙන් පරීක්ෂණ පවත්වති.
එසේම, මෙම මරණය සම්බන්ධයෙන් පශ්චාත් මරණ පරීක්ෂණයක් කිරීම සඳහා අධිකරණ නියෝග ලබාදී තිබුණද, එම සිරුර දින දෙකකට ආසන්න කාලයක් පානදුර මූලික රෝහලේ තැන්පත් කිරීමට සිදුව ඇතැයි වාර්තා වෙයි.
මේ හේතුවෙන් මියගොස් ඇති කාන්තාවගේ මාස දෙකක් වයසැති එකම බිලිඳියද සමඟ අසරණව සිටින මරණකාරියගේ මව වන ආශා මංජුලා මහත්මිය ඊයේ (15) පැය ගණනාවක් වාද්දුව පොලිසියේ රැඳී සිට නැවත නි‍ෙවසට හරවා යවා ඇති බව ඇය පැවසුවාය.
මේ පිළිබඳ විමසීමේදී වාද්දුව පොලිස් ස්ථානාධිපති ප්‍රධාන පොලිස් පරීක්ෂක චාමින්ද්‍ර කුමාර මහතා සඳහන් කළේ මහේස්ත්‍රාත් නියෝගය ලබාගෙන ඇති නමුත් පානදුර අධිකරණ වෛද්‍ය නිලධාරි විසින් පශ්චාත් මරණ පරීක්ෂණය පසුදින සිදුකරනු ලබන බව දැනුම් දී ඇති බවයි.
අප මේ සම්බන්ධයෙන් පානදුර අධිකරණ වෛද්‍ය නිලධාරී කාර්යාලයෙන් විමසීම් කළ අවස්ථාවේදී එහි සිටි නිලධාරියෙක් සඳහන් කළේ එම මරණකාරියගේ සිරුර සම්බන්ධයෙන් වන පශ්චාත් මරණ පරීක්ෂණය පසුදින සිදුකිරීමට ඔවුන් තීරණය කර ඇති බවයි.
(පොතුපිටිය - සුමිත් ප්‍රේමතිලක, හල්තොට- විනීතා මානෙල් ගමගේ, බණ්ඩාරගම - බිමල් ජයසිංහ)
0 Comments