මෙතෙක් විමර්ශන අවසන්ව නොමැති ආන්දෝලනයට තුඩුදුන් ඝාතන, පැහැරගෙනයාම් සහ අතුරුදන් කිරීම් සම්බන්ධයෙන් වූ අපරාධ විමර්ශන 07ක් ගැන කඩිනමින් විමර්ශන පැවැත්වීමට පොලිස් දෙපාර්තමේන්තුව පියවර ගෙන තිබේ.
බැඳුම්කර වංචාව, පාස්කු ඉරිදා ත්‍රස්ත ප්‍රහාරය, දිනේෂ් ෂාෆ්ටර් මහතාගේ මරණය, කැලණිය විශ්වවිද්‍යාලයේ කුලපතිවරයාව සිටි මහාචාර්ය රවින්ද්‍රනාත් සුබ්‍රමනියම් මහතා 2007 වසරේ දී නැ‍ඟෙනහිර දී අතුරුදන් වීම, වැලිගම දී 2023 වසරේ දෙසැම්බර් 31 වෙනිදා w 15 හෝටලයට වෙඩි තැබීම, බම්බලපිටිය පොලිස් ස්ථානය ආසන්නයේ දී මාධ්‍යවේදී තාරකී ශිවරාම් හෙවත් ධර්මරත්න ශිවරාම් පැහැරගෙන ගොස් ඝාතනය කිරීම, යාපනයේ දී 2011 දෙසැම්බර් 09 වෙනිදා ලලිත් කුමාර් හා කුගත් මුරුගානන්ද යන මහත්වරු පැහැරගැනීම හා අතුරුදන් කිරීම යන විමර්ශන ඒ අනුව කඩිනම්කර ඇතැයි පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා සඳහන් කළේය.
මහජන ආරක්ෂක අමාත්‍යාංශය විසින් ලබාදුන් උපදෙස් මත වැඩබලන පොලිස්පතිවරයා විසින් මෙම අපරාධ විමර්ශන 07 සම්බන්ධයෙන් විශේෂ අවධානයක් යොමුකරමින් විමර්ශන ආරම්භකර ඇතැයිද නිහාල් තල්දූව මහතා පැවැසීය.
බැඳුම්කර වංචාව සහ පාස්කු ඉරිදා ත්‍රස්ත ප්‍රහාරයට අදාළ විමර්ශන සඳහා වැඩිපුර නිලධාරීන් යෙදවා වැඩි අවධානයක් විමර්ශන සඳහා යොමු කරන ලෙසද පොලිස්පතිවරයා අදාළ අංශ වෙත උපදෙස් ලබා දී ඇති බව ද සඳහන්ය.
වැලිගම පිහිටි w 15 හෝටලයට වෙඩි තබනු ලබන්නේ කොළඹ අපරාධ කොට්ඨාසයේ පොලිස් කණ්ඩායමක් විසිනි. එම කණ්ඩායම වැලිගම w 15 හෝටලයට වෙඩි තබන විට වැලිගම පොලිසියේ කණ්ඩායමක් එහි යන විට සිවිල් ඇඳුමින් අංක තහඩු වෙනස්කළ වෑන් රථයකින් ගොස් හෝටලයට වෙඩි තැබූ පොලිස් කණ්ඩායම පළායමින් සිට ඇති බවත් එහි දී වැලිගම පොලිසියේ නිලධාරීන් පන්නාගොස් එම වෑන් රථයට වෙඩි තබා තිබුණි. එහි දී පොලිස් නිලධාරියකුට වෙඩි වැදී ඇති අතර ඔහුව ආසන්නයේම ඇති වැලිගම රෝහලට ඇතුළත් කරනවා වෙනුවට
කොළඹට පළායාමේ අරමුණින් කොළඹ අපරාධ කොට්ඨාසයේ නිලධාරීන් අධිවේගී මාර්ගයට ඇතුළුවීමට උත්සහා දරා ඇතත් වෑන් රථයේ තොරතුරු ඒ වන විටත් ගමන් කථන මගින් හුවමාරුවී තිබීම හේතුවෙන් කොළඹට පැන ගැනීමට කොළඹ අපරාධ කොට්ඨාසයේ නිලධාරීන්ට හැකියාව ලැබී නැත.
මේ නිසාම වැලිගම හෝටලයට වෙඩි තැබුවේ කොළඹ අපරාධ කොට්ඨාසයේ නිලධාරීන් බව අනාවරණය වී තිබුණි. වෙඩි වැදුණු නිලධාරියාව කඩිනමින් රෝහල්ගත කිරීමට නොහැකිවීම හේතුවෙන් ඔහු මියගොස් තිබුණි.
වැලිගමට හොර රහසේ පැමිණ හෝටලයට වෙඩි තැබීම අදටත් අභිරහසක් වන අතර එය සැඟවීමට එවකට සිටි පොලිස් ප්‍රධානියෙක් මෙන්ම ප්‍රබල දේශපාලනඥයෙක් දැවැන්ත උත්සහයක් ගත් බව පොලිස් තොරතුරු සඳහන් කළේය. කොළඹ අපරාධ කොට්ඨාසය නීත්‍යානුකූල මෙහෙයුමකට සහභාගිවෙමින් සිටියදී වැලිගම පොලිසියේ නිලධාරීන් අනීතිකව වෙඩි තැබූ බවට චෝදනා නඟමින් වැලිගම පොලිසියේ නිලධාරීන් පිරිසක් අත්අඩංගුවට ගැනීමට ද යම් පිරිසක් දැඩි උත්සහයක නිරත වී තිබුණි.
එකළ දකුණු පළාත්භාර ජ්‍යෙෂ්ඨ නියෝජ්‍ය පොලිස්පති සජීව මැදවත්ත මහතා ඇතුළු නිලධාරීන් කිහිප දෙනකුගෙන් එල්ලවූ දැඩි විරෝධය හමුවේ එම කටයුත්ත අසාර්ථක වී තිබුණි. එම නිලධාරීන් පෙන්වාදී තිබුණේ කොළඹ අපරාධ කොට්ඨාසයේ නිලධාරීන් අත්අඩංගුවට ගත යුතු බවය. ඒ වෙනුවෙන් එම නිලධාරීන් විමර්ශන සිදුකරමින් සිටියදී ජ්‍යෙෂ්ඨ නියෝජ්‍ය පොලිස්පතිවරයාත් මාතර කොට්ඨාසයභාර ජ්‍යෙෂ්ඨ පොලිස් අධිකාරීවරයාටත් හදිසියේම ස්ථානමාරු නියෝග ක්‍රියාත්මක විය. ඒත් සමඟ එම විමර්ශන අඩපන වී තිබුණි.
0 Comments