බංග්ලාදේශයේ පැවති ශිෂ්‍ය-ජනතා කැරැල්ලේදී ඝාතනයන්ට සහය දැක්වූවන් ලෙස හැඳින්වෙන හිටපු රජයේ කැබිනට් සාමාජිකයින් හා ආවාමි ලීග් නායකයින් අත්අඩංගුවට නොගැනීම පිළිබඳව විපක්ෂය වන BNP හි ඉහළම ප්‍රතිපත්ති සම්පාදක සංසදය කනස්සල්ල පළ කර ඇත.
BNP හි ස්ථාවර කමිටු ආරංචි මාර්ග වලින් දැනගන්නට ලැබුණේ, ජන කැරැල්ල ඇරඹී මාස දෙකක් ගතවී ඇතත් හසීනා රජයේ වැදගත් පුද්ගලයින් තවමත් අත්අඩංගුවට ගෙන නොමැති බැවින් BNP නායකයින්ගේ සිත්වල ප්‍රශ්න මතුවී ඇති බවයි.
පසුගිය අඟහරුවාදා (ඔක්තෝබර් 2) රාත්‍රියේ පැවති BNP ස්ථාවර කමිටු රැස්වීමේදී මේ පිළිබඳව විස්තරාත්මකව සාකච්ඡා කර ඇත. රැස්වීම් වාර්තා අනුව, හිටපු ඒකාධිපති ෂේක් හසීනා රජයේ මෙවැනි වැදගත් පුද්ගලයින්, අමාත්‍යවරුන් සහ පාර්ලිමේන්තු මන්ත්‍රීවරුන් විදේශගතව පලා ගොස් ඇත.
ඔවුන්ගෙන් සමහරෙක් ඉන්දියාවේ විවිධ දේවස්ථාන සහ උද්‍යානවලද දක්නට ලැබී ඇත. BNP නායකයින් සිතන්නේ, ඝාතන නඩුවලින් පසුවත් මෙම සැකකරුවන් කෙසේ පලා ගියේද, ඔවුන් පලා යාමට කවුරුන් උදව් කළේද යන කරුණු පිළිබඳව මහජනතාව තුළ ප්‍රමාණවත් ප්‍රශ්න සහ කනස්සල්ල පවතින බවයි.
BNP හි වැඩබලන සභාපති තාරෙක් රහ්මාන්ගේ ප්‍රධානත්වයෙන් පැවති රැස්වීමට මහ ලේකම් මිර්සා ෆක්රුල් ඉස්ලාම් අල්මගීර් හැරුණු කොට ආචාර්ය කන්දකාර් මොශාරෆ් හොසේන්, සමීර් උද්දීන් සර්කාර්, මිර්සා අබ්බාස්, ගයෙශ්වර් චන්ද්‍ර රායි, අබ්දුල් මොයීන් ඛාන්, නස්රුල් ඉස්ලාම් ඛාන්, අමීර් කොස්රු මහ්මුද් චෞදුරි, සලාඋද්දීන් අහමඩ්, සෙලිමා රහ්මාන්, ඉක්බාල් හසන් මහ්මුද්, හෆීස් උද්දීන් අහමඩ් සහ ඒ.ජෙඩ්.එම්. සාහිද් හොසේන් සහභාගී වූ බව බංග්ලා නිවුස් වාර්තා කර තිබේ.
(බංග්ලා නිවුස් වාර්තාව ඇසුරිනි)
0 Comments