සමගි ජන බලවේගයේ ගම්පහ දිස්ත්‍රික් අපේක්ෂක නාමයෝජනා ලයිස්තුවේ සිය නම ඇතුළත්ව තිබුණත් තමන් මෙවර මහමැතිවරණ ඡන්ද සටනෙන් ඉවත්වන බව එම පක්ෂයේ හිටපු පාර්ලිමේන්තු මන්ත්‍රී අජිත් මාන්නප්පෙරුම මහතා පවසයි.
නාමයෝජනා පත්‍රයට අත්සන් තබා පැය විසිහතරක් ඉක්මයාමටත් පෙර කිසිදු සාකච්ඡාවකින් තොරව ගම්පහ ආසන සංවිධායක ධුරයෙන් තමන්ව ඉවත් කිරීම හේතුවෙන් මෙම තීරණයට එළැඹි බව ද මාධ්‍ය හමුවක් කැඳවමින් ඒ මහතා සඳහන් කළේය. අජිත් මාන්නප්පෙරුම මහතා ගම්පහ නගරාධිපතිවරයා ලෙස වසර නවයක් සේවය කර ඇති අතර සමගි ජන බලවේගයේ ගම්පහ ආසන සංවිධයක ලෙස වසර හතරක් කටයුතු කර ඇත. ගම්පහ දිස්ත්‍රික් මන්තීවරයෙක් ලෙස තවත් වසර 12ක් පාර්ලිමේන්තුව නියෝජනය කළ ඒ මහතා දැරූ සමගි ජන බලවේගයේ ගම්පහ දිස්ත්‍රික් ආසන සංවිධායකධුරය සඳහා පත් කර ඇත්තේ වරුණ රාජපක්ෂ මහතායි.
පසුගිය ජනාධිපතිවරණයේදී සජිත් ප්‍රේමදාස මහතාගේ මැතිවරණ කටයුතුවලට කිසිදු දායකත්වයක් නොදැක්වූ, රනිල් වික්‍රමසිංහ මහතාගේ මැතිවරණ කටයුතු වෙනුවෙන් කැපවූ පුද්ගලයෙක් තමන් වෙනුවට ගම්පහ දිස්ත්‍රික් ආසන සංවිධායක ධුරයට පත් කර ඇතැයි ද හිටපු මන්ත්‍රීවරයා මාධ්‍ය හමුවේදී පෙන්වා දුන්නේය.
සමගි ජන බලවේගයේ පක්ෂ නායක සජිත් ප්‍රේමදාස මහතාව දැඩිව විවේචනය කළ හිටපු මන්ත්‍රීවරයා සඳහන් කළේ සැබෑ නායකයෙක් දුරකතනයට පිළිතුරු නොදී සැඟව නොසිටින බවයි.
ආසන සංවිධායක ධුරය වෙනස් කිරීමට පෙර තමන් සමඟ සාකච්ඡා නොකර බියගුළුව සැඟවුණු, ප්‍රශ්නයකට මුහුණ දීමේ හැකියාවක් නැති නායකත්වයක් යටතේ තව දුරටත් කටයුතු නොකිරීම සිය තීරණය යැයි ද ඒ මහතා කීවේය.
සජිත් තීන්දු ගන්නේ පාසල් බස් රථ, සුහුරු පන්ති කාමර සඳහා අනුග්‍රහය සැපයූ ව්‍යාපාරික කණ්ඩායමක බලපෑමට යටත්ව බවද ඔහු කීය.
අධ්‍යාපනය ලැබූවන්ට අකමැති, බියගුළු ලෙස සැඟවෙන නායකයෙක් ජනාධිපතිවරයා ලෙස පත්කිරීමට ඉකුත් ජනාධිපතිවරණයේදී කළ උත්සහය සම්බන්ධයෙන් ජනතාවගෙන් සමාව ඉල්ලා සිටින බවත් ඒ මහතා වැඩිදුරටත් සඳහන් කළේය.
තමා මැතිවරණ සටනින් මෙන්ම පක්ෂයෙන්ද ඉවත්වන බව ඔහු කීය.
0 Comments