අඟුණකොළපැලැස්ස බන්ධනාගාරයේ රඳවා සිටි සිරකරුවන් බන්ධනාගාර නිලධාරීන්ගේ අත්අඩංගුවෙන් මිදී පැනයෑම සම්බන්ධයෙන් බන්ධනාගාර නිලධාරීන් තිදෙනකුගේ වැඩ තහනම් කිරීමට බන්ධනාගාර දෙපාර්තමේන්තුව පියවර ගෙන තිබේ.
බන්ධනාගාර අධිකාරිවරයාගේ අනුමැතියකින් තොරව මෙම සිරකරුවන් පිටතට ගෙන ඇති අතර එසේ කටයුතු කළ අඟුණකොළපැලැස්ස බන්ධනාගාරයේ ප්රධාන ජේලර්වරයා, පවිත්රතා කටයුතු සඳහා සිරකරුවන් යොමු කළ දෙවන පෙළ ජේලර්වරයා සහ පවිත්රතා කණ්ඩායම භාරව සිටි නියාමකවරයා මූලික විමර්ශනයට යටත්ව මෙසේ රාජකාරි වැඩ තහනමකට ලක් කර ඇත.
සිද්ධිය සම්බන්ධයෙන් මාතර සහකාර බන්ධනාගාර අධිකාරිවරයා විසින්
පැවැත්වූ මූලික විමර්ශනයේ නිර්දේශයට අනුව මෙම නිලධාරීන්ගේ වැඩ තහනම්
කර ඇත.
අඟුණුකොළපැලැස්ස බන්ධනාගාරයේ රඳවා සිටි සිරකරුවන්
දසදෙනකු පසුගිය 01 වැනිදා එම බන්ධනාගාරයේ ප්රධාන ජේලර්වරයාගේ
උපදෙස් මත නියාමක නිලධාරියකු භාරයේ බන්ධනාගාර පිටත පරිශ්රයේ
පවිත්රතා කටයුතුවල යොදවා ඇති අතර, ඒ අවස්ථාවකදී සිරකරුවන්
සිව්දෙනකු බන්ධනාගාර නිලධාරීන්ගේ නීත්යනුකූල අත්අඩංගුවෙන් මිදී
පැනගොස් ඇත.
බන්ධනාගාර අධිකාරිවරයාගේ අනුමැතියකින් හෝ විමසීමකින්
තොරව පවිත්රතා කටයුතු සඳහා මෙම සිරකරුවන් ආයතනයෙන් පිටතට ගැනීමට
ප්රධාන ජේලර්වරයා කටයුතු කර ඇති බව මූලික විමර්ශනයේදී අනාවරණය
වී ඇත. පැනගොස් ඇති සිරකරුවන් සිව්දෙනා අධිකරණයේ විසඳීමට නඩු සහිත
සිරකරුවන් වන අතර, වසර 21ට වැඩි සිරදඬුවමක් හා විසඳීමට ඇති නඩු
02ක් සහිත සිරකරුවකු ද ඒ අතර වේ. මෙලෙස පැනගිය සිරකරුවන්
සිව්දෙනාගෙන් සිරකරුවන් තිදෙනකු නැවත අත්අඩංගුවට ගැනීමට හැකි වූ
බව බන්ධනාගාර කොමසාරිස් (මාධ්ය ප්රකාශක) ගාමිණී බී. දිසානායක මහතා
කියයි.
(බුද්ධිකා ඉඹුලාන)
0 Comments