ප්‍රසිද්ධ යූටියුබ් නිර්මාණකරුවෙකු වන අශේන් සේනාරත්න මහතා, ඔහුගේ නාමයෝජනා ප්‍රතික්ෂේප කිරීමෙන් සිදුවූ බවට කියන අසාධාරණයට එරෙහිව ඊයේ (16) දින ශ්‍රේෂ්ඨාධිකරණයේ පෙත්සමක් ගොනු කර ඇත. මෙම පෙත්සම කොළඹ දිස්ත්‍රික් තේරීම්භාර නිලධාරියාට සහ මැතිවරණ කොමිසමට එරෙහිව ගොනු කර ඇත.
සේනාරත්න මහතා මෙවර මහ මැතිවරණයට තරග කිරීමට අපේක්ෂා කළ අතර, ඔහු ස්වාධීන කණ්ඩායමක් ලෙස කොළඹ දිස්ත්‍රික්කයට ඉදිරිපත් කළ නාමයෝජනා පත්‍රය මැතිවරණ කොමිසම විසින් ප්‍රතික්ෂේප කරන ලදී. කොමිසම පවසා සිටියේ නාමයෝජනා ඉල්ලුම්පත්‍රය "බලයලත් නියෝජිතයෙකු විසින් ඉදිරිපත් කොට නොමැති වීම" යන පදනම මත ප්‍රතික්ෂේප කළ බවයි.
මෙම තීරණයට විරෝධය දක්වමින් සේනාරත්න මහතා සිය සමාජ මාධ්‍ය ගිණුම් හරහා සජීවී වීඩියෝ පට කිහිපයක් නිකුත් කළ අතර, ඔහු නීතිමය පියවර ගන්නා බව ප්‍රකාශ කර තිබිණි.
මේ අතර, හිටපු විදේශ සහ අධිකරණ අමාත්‍ය, ජනාධිපති නීතිඥ අලි සබ්රි මහතා මෙම තීරණය ප්‍රශ්න කර තිබේ. ඔහු සිය නිල X ගිණුමෙහි සටහනක් තබමින් පෙන්වා දුන්නේ, අපේක්ෂකයෙකුගේ සුදුසුකම් තීරණය කිරීම ජනතාවට අයිති කාර්යයක් බවත්, තාක්ෂණික කරුණක් මත නාමයෝජනා ප්‍රතික්ෂේප කිරීම ගැටලු සහගත බවත්ය.
සබ්රි මහතා වැඩිදුරටත් ප්‍රශ්න කළේ, "බලයලත් නියෝජිතයෙකු නොවන කෙනෙක් විසින් නාමයෝජනා පත්‍රයක් භාර දුන්නත් එය භාර ගැනීමට පෙර තේරීම් භාර නිලධාරියා ඒ බව තහවුරු කර ගත යුතු නැතිද?" යනුවෙනි. ඔහු තවදුරටත් පැවසුවේ මැතිවරණ කොමිසමේ කාර්යභාරය වන්නේ ජනතාවට තීරණ ගැනීමේ අයිතියට පහසුකම් සැලසීම මිස තාක්ෂණික කරුණු මත එය අවහිර කිරීම නොවන බවයි.
මෙම සිද්ධිය මැතිවරණ ක්‍රියාවලියේ විනිවිදභාවය සහ සාධාරණත්වය පිළිබඳ සැලකිය යුතු ප්‍රශ්න මතු කර ඇති අතර, ඉදිරි දිනවල මෙම නීතිමය අභියෝගය කෙසේ විසඳෙන්නේද යන්න දැඩි උනන්දුවකින් නිරීක්ෂණය කෙරෙනු ඇත.
0 Comments