පාර්ලිමේන්තු මැතිවරණය සඳහා කොළඹ දිස්ත්‍රික්කයෙන් තරග කිරීමට ස්වාධීන කණ්ඩායමකින් තමන් ඉදිරිපත් කළ නාමයෝජනා පත්‍රය ප්‍රතික්ෂේප කිරීමට මැතිවරණ කොමිසම ගත් තීරණයට එරෙහිව සමාජ මාධ්‍ය ක්‍රියාකාරිකයකු සහ ව්‍යාපාරිකයකු වන අශේන් සේනාරත්න මහතා සහ තවත් එක් අයකු විසින් ගොනු කරන ලද රිට් පෙත්සමක් විභාගයට නොගෙන නිෂ්ප්‍රභ කිරීමට ශ්‍රේෂ්ඨාධිකරණය ඊයේ (23) තීරණය කළේය.
අදාළ පෙත්සම සම්බන්ධයෙන් පක්ෂව සහ විපක්ෂව ඉදිරිපත් වූ කරුණු සලකා බැලීමෙන් අනතුරුව මෙම පෙත්සම ඉවත දමන ලදි.
ප්‍රීති පද්මන් සූරසේන, අචල වෙන්ගප්පුලි සහ ප්‍රියන්ත ප්‍රනාන්දු යන මහත්වරුන්ගෙන් සමන්විත ශ්‍රේෂ්ඨාධිකරණ විනිසුරු මඬුල්ලක් හමුවේ එම පෙත්සම කැඳවන ලදි.
එහිදී පෙත්සම්කාර පාර්ශ්වය වෙනුවෙන් පෙනී සිටි නීතිඥ අස්ථික දේවේන්ද්‍ර මහතා දීර්ඝ ලෙස කරුණු ඉදිරිපත් කරමින් සඳහන් කර සිටියේ අදාළ නාමයෝජනා පත්‍ර භාරදීමට දිස්ත්‍රික් මැතිවරණ කාර්යාලයට ගිය අශේන් සේනාරත්න අදාළ ස්වාධීන කණ්ඩායමේ නායකයා ලෙස කටයුතු කරන බවය.
ඔහු සමඟ තවත් එක් අයකු මැතිවරණ කාර්යාලය ඇතුළට ගොස් ඇති අතර අදාළ නාමයෝජනා පත්‍රය ඔහු විසින් භාර දීම එහි සිටි නිලධාරියකු විසින් වැළැක්වූ බව ද නීතිඥවරයා එහිදී සඳහන් කළේය.
ඒ අනුව ඔහු සමඟ මැතිවරණ කාර්යාලය තුළට ගිය දෙවැනි පෙත්සම්කරු විසින් අදාළ නාමයෝජනා පත්‍රය භාරදුන් බව ද නීතිඥවරයා සඳහන් කළේය.
අනතුරුව අදාළ නාමයෝජනා පත්‍රය ප්‍රතික්ෂේප කළ බව තේරීම් භාර නිලධාරියා දැනුම් දුන් බව නීතිඥවරයා සඳහන් කළේය. නාමයෝජනා පත්‍රය සහ වත්කම් වාර්තා ලබාදීමට ගිය අශේන් සේනාරත්න මහතා ඉන් වළක්වා පසුව එම නාමයෝජනා පත්‍රය ප්‍රතික්ෂේප කිරීම අසාධාරණ සහ අයුක්තිසහගත ක්‍රියාවක් බවට ඔහු කරුණු ඉදිරිපත් කළේය.
එහිදී නීතිපතිවරයා සහ මැතිවරණ කොමිසමේ නිලධාරීන් වෙනුවෙන් පෙනී සිටි නියෝජ්‍ය සොලිසිටර් ජනරාල් යුරේෂා ද සිල්වා මහත්මිය සඳහන් කර සිටියේ පාර්ලිමේන්තු මැතිවරණ පනත අනුව අදාළ නාමයෝජනා පත්‍රය ස්වාධීන කණ්ඩායම් නායකයා විසින් භාර නොදීම මත අදාළ නාමයෝජනා පත්‍රය ප්‍රතික්ෂේප කිරීමට තීරණය කළ බවය.
අදාළ නාමයෝජනා පත්‍රය ස්වාධීන කණ්ඩායම් නායකයා හෝ නාමයෝජනා පත්‍රයෙහි දෙවැනි ස්ථානයට නම සඳහන් පුද්ගලයා විසින් භාරදිය යුතු බව සඳහන් කළ නියෝජ්‍ය සොලිසිටර් ජනරාල්වරිය මෙම නාමයෝජනා පත්‍රය භාරදී ඇත්තේ දහවැනි ස්ථානයට නාමයෝජනා පත්‍රයේ නම සඳහන් පුද්ගලයා විසින් බව සඳහන් කළාය.
ඒ අනුව මැතිවරණ නීතියට අනුකූල නොවීම මත මෙම නාමයෝජනා පත්‍රය ප්‍රතික්ෂේප කළ බව ද ඇය සඳහන් කළාය.
කරුණු සලකා බැලූ විනිසුරු මඬුල්ල පෙත්සම නිෂ්ප්‍රභ කිරීමට තීරණය කළේය.
0 Comments