දේශපාලනඥයන්, රාජ්‍ය නිලධාරීන් සහ හමුදා නිලධාරීන් ඇතුළු පුද්ගලයින් හත් දෙනෙකුගේ දේපළ අත්හිටුවීමට නීතිමය පියවර ගැනීමට අල්ලස් හෝ දූෂණ චෝදනා විමර්ශන කොමිෂන් සභාව තීරණය කර තිබේ.
ඒ අනුව මෙම සැකකරුවන්ගේ දේපළ, බැංකු ගිණුම්, රක්ෂණ ඔප්පු භාවිත කිරීම වැළැක්වීමට පියවර ගෙන ඇත.
අල්ලස් හෝ දූෂණ චෝදනා විමර්ශන කොමිෂන් සභා ආරංචි මාර්ග පැවසුවේ මෙම පුද්ගලයින් හත්දෙනාට ඔවුන්ගේ සාමාන්‍ය වැටුපෙන් ලබා ගැනීමට නොහැකි තරම් විශාල වත්කම් ප්‍රමාණයක් ඔවුන් උපයා ගත්තේ කෙසේද යන්න පිළිබඳව විමර්ශකයින් විමර්ශනය කරන බවයි.
ඇතැම් සැකකරුවන් තම පවුල් සහ සමීපතම ඥාතීන් මාර්ගයෙන් මෙතරම් විශාල ධනයක් උපයාගෙන පැමිණි බවට කරන ලද ප්‍රකාශ සම්පූර්ණයෙන් අසත්‍ය බව මේ වන විට සිදු කරන ලද විමර්ශනවලදී අනාවරණය වී ඇති බව එම ආරංචි මාර්ග පවසයි.
කොමිසමේ විමර්ශනවලට සහාය වීම සඳහා ප්‍රකාශ ලබාදීමට අල්ලස් හෝ දූෂණ චෝදනා විමර්ශන කොමිෂන් සභාව හමුවට පැමිණීමට බොහෝ දේශපාලනඥයන් අකමැත්ත පළ කර ඇති බව දැනගන්නට ඇත.
පසුගිය රජයේ හිටපු අමාත්‍යවරුන් දෙදෙනකු යම් වත්කම් උපයාගත් ආකාරය පැහැදිලි කිරීමට නොහැකිවීම සම්බන්ධයෙන් අල්ලස් හෝ දූෂණ චෝදනා විමර්ශන කොමිෂන් සභාව විසින් ඔවුන්ට එරෙහිව අධිචෝදනා ගොනු කිරීමට නියමිතව ඇත්තේ වෙනමය.
කුරුඳුවත්තේ සුඛෝපභෝගී නිවසක් සහ ඉඩමක් මිලදී ගත් බව කියන හිටපු ඇමතිවරයාගේ රියදුරෙකු සම්බන්ධයෙන් ද අල්ලස් හෝ දූෂණ චෝදනා විමර්ශන කොමිෂන් සභා විමර්ශනයක් සිදු කරන බව වාර්තා විය.
මේ අතර හිටපු සෞඛ්‍ය අමාත්‍ය කෙහෙළිය රඹුක්වැල්ල සහ ඔහුගේ පවුලේ සාමාජිකයින් කිහිප දෙනෙකුගේ බැංකු ගිණුම් 16ක් සහ රක්ෂණ ඔප්පු 05ක් අත්හිටුවීමේ නියෝගය මාස තුනකින් දීර්ඝ කිරීමට කොළඹ මහාධිකරණය මෙම සතියේදී නියෝග කර තිබුණි. අල්ලස් හෝ දූෂණ චෝදනා විමර්ශන කොමිෂන් සභාව අධිකරණයට ඉදිරිපත් කළ සාක්ෂි සැලකිල්ලට ගනිමින් මෙම නියෝගය නිකුත් කර ඇත. කොමිෂන් සභාව හිටපු අමාත්‍යවරයා ඔහුගේ සමීපතමයන්ගේ නම්වලින් උපයාගත් බව කියන දේපළ විශාල ප්‍රමාණයක් සම්බන්ධයෙන්ද පරීක්ෂණ ක්‍රියාත්මකයි.
0 Comments