ඔස්ට්‍රේලියානු ජාතිකයන් ඇතුළු විදේශිකයන් දසදහසක් පමණ චීනයේ බන්ධනාගාරගත වී සිටින බවට ඔස්ට්‍රේලියානු සෙනෙට් කමිටුවකට කරුණු වාර්තා වී ඇතැයි විදෙස් මාධ්‍ය සඳහන් කළේය. එම තොරතුරු අනාවරණය කර ඇත්තේ
2013 වසරේ චීනයේදී අත්අඩංගුවට පත්වූ බ්‍රිතාන්‍යයේ හිටපු මාධ්‍යවේදියකු හා ව්‍යාපාරිකයකු වන පීටර් හම්ප්‍රි නමැති පුද්ගලයකු බව ද විදෙස් මාධ්‍ය වැඩිදුරටත් වාර්තා කළේය.අයහපත් සෞඛ්‍ය තත්ත්වය හේතුවෙන් පීටර් හම්ප්‍රි 2015 ජූනි මාසයේදී නිදහස ලැබූ බවත්, එම මාසයේදිම ඔහුගේ බිරියත් නිදහස් කිරීමට චීනය පියවර ගත් බවත් වාර්තා වේ. චීනයේ බන්ධනාගාරගත වී සිටින විදේශිකයන්ගේ සංඛ්‍යාව දසදහසක් පමණ වන බවත්, ඉන් සැලකිය යුතු පිරිසක් සිරගත වී සිටින්නේ කිසිදු වරදකින් තොරව බවත් බන්ධනාගාරගතවී සිටියදී එක්රැස් කරගත් කරුණු ඇසුරෙන් සිදු කළ පර්යේෂණයකින් පසු ඔහු ඇස්තමේන්තු කර ඇතැයි ද විදෙස් මාධ්‍ය වාර්තා කළේය.
වසර 50කට ආසන්න කාලයක් චීනය සමඟ ව්‍යාපාරික කටයුතු කළ ඔහු සමඟ චීන සම්භවයක් සහිත ඔහුගේ අමෙරිකානු බිරිය ද අත්අඩංගුවට පත්වී ඇත්තේ නීති විරෝධී ලෙස ඔත්තු බැලීමේ සහ තොරතුරු එක්රැස් කිරීමේ සාවද්‍ය චෝදනාවකට බව විදෙස් මාධ්‍ය සඳහන් කළේය. පීටර් හම්ප්‍රි සහ ඔහුගේ බිරිය අත්අඩංගුවට පත්වන අවස්ථාවේදී චීනයේ විමර්ශන උපදේශන ආයතනයක් පවත්වාගෙන ගොස් ඇති අතර, විදෙස් ව්‍යාපාරිකයන්ට අවදානමකින් තොරව චීනයේ ව්‍යාපාරික කටයුතු සිදු කිරීමට අවශ්‍ය උපදෙස් එම ආයතනයෙන් සපයා ඇතැයි ද වාර්තා වේ.
0 Comments