නිතර වීඩියෝ ක්‍රීඩා කිරීමෙන් ව්‍යායාම කිරීමට වඩා මොළයේ ක්‍රියාකාරිත්වය වැඩිදියුණු වන බව නව පර්යේෂණයකින් හෙළි වී තිබේ. කැනඩාවේ වෙස්ටන් විශ්වවිද්‍යාලයේ මහාචාර්ය අඩ්රියන් ඕවන් විසින් සිදු කරන ලද මෙම අධ්‍යයනයේ ප්‍රතිඵල මැන්චෙස්ටර් විද්‍යා උළෙලේදී ඉදිරිපත් කර ඇත.
Fifa, Grand Theft Auto සහ Minecraft වැනි ක්‍රීඩා නිරතුරුව කරන පුද්ගලයන්ගේ මානසික හැකියාවන් සසැඳීමේදී ව්‍යායාම ක්‍රීඩා පමණක් කරන අය ඊට වයසින් අවුරුදු දහයකට වඩා බාල පුද්ගලයකුගේ මට්ටමේ පවතින බව මෙම අධ්‍යයනයෙන් හෙළි වී ඇත.වීඩියෝ ගේම් ක්‍රීඩකයින් වැඩිදියුණු වූ මතක ශක්තියක්, අවධානයක් සහ තාර්කික හැකියාවන් පෙන්නුම් කර ඇත.
බ්‍රිතාන්‍ය ජාතික සෞඛ්‍ය සේවය (NHS) නිර්දේශ කරන පරිදි සතියකට මිනිත්තු 150ක ශාරීරික ක්‍රියාකාරකම්වල නිරත වන නමුත් වීඩියෝ ක්‍රීඩා නොකරන පුද්ගලයින් තුළ මෙවැනි දියුණුවක් දක්නට නොලැබිණි.
"සතියකට පැය පහකට වැඩි කාලයක් එක් වර්ගයක වීඩියෝ ක්‍රීඩාවක නිරත වන පුද්ගලයින්, වීඩියෝ ක්‍රීඩා නොකරන අයට වඩා වසර 13.7කින් තරුණ මානසික හැකියාවන් පෙන්නුම් කරනවා," යැයි මහාචාර්ය ඕවන් පැවසීය.
මෙම සොයාගැනීම් පුදුම සහගත බව පර්යේෂකයින් පවසා සිටියේය. මන්ද යත්, ව්‍යායාම මගින් මානසික හැකියාවන් වැඩිදියුණු වන බව පුළුල් ලෙස පිළිගත් මතය මෙමගින් අභියෝගයට ලක් කරන බැවිනි.
කෙසේ වෙතත්, ශාරීරික ක්‍රියාකාරකම් මානසික සෞඛ්‍ය වැඩිදියුණු කිරීමට උපකාරී වන බව ද අධ්‍යයනයෙන් හෙළි විය. NHS නිර්දේශ කරන ශාරීරික ක්‍රියාකාරකම් මට්ටමට නොපැමිණෙන පුද්ගලයින්ට විශාදය හැදීමේ අවදානම දෙගුණයක් වන අතර කනස්සල්ල ඇතිවීමේ අවදානම 1.5 ගුණයකින් ඉහළ යන බව පර්යේෂකයෝ පෙන්වා දුන්හ.
මෙම සොයාගැනීම් ජනතාවට තම ජීවන රටාව සකස් කර ගැනීමට උපකාරී විය හැකි බව මහාචාර්ය ඕවන් පැවසීය. "මෙම තොරතුරු අපට මානසික හා බුද්ධිමය සෞඛ්‍ය ප්‍රවර්ධනය කරන ක්‍රියාකාරකම් තෝරා ගැනීමට උපකාරී වනු ඇත," යැයි ඔහු පැවසීය.
කෙසේ වෙතත්, වීඩියෝ ක්‍රීඩා අධික ලෙස භාවිතා කිරීමෙන් ඇතිවිය හැකි අහිතකර බලපෑම් පිළිබඳව ද සැලකිලිමත් විය යුතු බව සෞඛ්‍ය විශේෂඥයෝ අවධාරණය කරති.
( ද ඩේලි ටෙලිග්‍රාෆ් ඇසුරිනි)
0 Comments