මැතිවරණයට තරග කිරීම සඳහා තමන්ව යෝජනා කළ පුද්ගලයා ම තමාට එරෙහිව කටයුතු කර ඇති බව රංගන ශිල්පිනි දමිතා අබේරත්න පවසයි.
ඇය මේ බව සඳහන් කළේ, පෙරේදා (ඔක්. 11) මාධ්‍ය අමතමින් ය.
“හේෂා විතානගේ සහෝදරයා මගෙන් ඉල්ලීමක් කළා. දමිතා අක්කේ ඇයි ඔයා රත්නපුරයෙන් ඉල්ලන්නේ නැත්තේ? මං කිව්වා. මං එහෙම කල්පනා කරලා නෑ කියලා. මම කොහෙන්හරි ඉල්ලනව ද කියලවත් හිතලා තිබුණේ නැහැ. ඔහු මට කිව්වා. නෑ අක්කේ මං ඔයාව මෙහෙන් දාන්නම්, මෙහෙ කාන්තා නියෝජනයක් නැහැ කියලා. එතුමාගේ වචනවලින් කිව්වොත් දැන් තලතා අතුකෝරල මහත්මියත් අයින් වෙලා ඉන්නේ. ඉතින් අක්කා වගේ එක්කෙනෙක් අවොත් අපිට හොඳයි. අපිට යම්කිසි වැඩක් කරන්න පුළුවන් කිව්වා. ඉතින් ඒකට මං විරෝධතාවය දැක්වුයේ නෑ. මං කිව්වා මල්ලි යෝජනා කරනවනම් මං ඉදිරිපත් වෙන්නම් කියලා”
“මාව යෝජනා කරපු කෙනා ම මේ වගේ කකුලෙන් අදින්න පටන්ගත්තා.”
තමාගේ නම රත්නපුර නාම යෝජනා ලැයිස්තුවෙන් ඉවත් කිරීම හේතුවෙන් මූලික මිනිස් අයිතිවාසිකම් කඩවී ඇති බව ත් ඒ හේතුවෙන් අධිකරණ ක්‍රියාමාර්ග ගන්නා බව ත් රංගන ශිල්පීනි දමිතා අබේරත්න සඳහන් කළේ ය.
“අධිකරණ ක්‍රියාමාර්ගයකට මම යනවා. මගේ මූලික අයිතිවාසිකම් කඩවීමක් පැහැදිලිව ම සිදුවෙලා තියෙනවා”
මේ සම්බන්ධයෙන් හිටපු පාර්ලිමේන්තු මන්ත්‍රී හේෂා විතානගේ සඳහන් කළේ, රත්නපුර දිස්ත්‍රික්කයට වෙනත් දිස්ත්‍රික්කයකින් ආනයනය කරන අය අවශ්‍ය නොවන බව ය.
“අපි රත්නපුර දිස්‌ත්‍රික් කණ්ඩායමට ජාතික තලයේ අපිට කොච්චර හයියක් දුන්නත් අපි පිටින් මේ දිස්ත්‍රික්කයට ආනයනය කරන අපේක්ෂකයෝ නොදානවා කියලා තීරණය කළා. ඒ නිසා අපි රත්නපුරේ ඉපදුණ රත්නපුර සමග රත්නපුරයේ ජනතාවත් සමග බද්ධ වෙලා ඉන්න කණ්ඩායමක් විදියට තමයි සමගි ජන බලවේගය කණ්ඩායමේ නාමයෝජනා පත්‍රය භාර දුන්නා කියලා”
0 Comments