ආධාරකරුවන්ට සහ හිතවතුන්ට සංග්‍රහ පැවැත්වීම සදහා මහ මැතිවරණ අපේක්ෂකයන්ට පහසුකම් දෙන හෝටල් හිමිකරුවන්ට අවවාදාත්මක ලිපි යැවීමට මැතිවරණ කොමිෂන් සභාව තීරණය කර ඇත.මැතිවරණ අපේක්ෂකයන්ගේ සංග්‍රහ ගණනාවක් මහනුවර ප්‍රදේශයේ පසුගිය දිනවල පවත්වා තිබිණැයි කියති.
මේ අනුව එම අවවාදාත්මක ලිපි මහනුවර ප්‍රදේශයේ හෝටල්වලට මුලින්ම යැවූ බව මැතිවරණ කොමිෂන් සභාවේ උසස් නිලධාරියෙක් පැවැසීය.සිය ආධාරකරුවන්ට සහ හිතවතුන්ට සංග්‍රහ ලබා දීමට මැතිවරණ අපේක්ෂකයන්ට සහාය දීමෙන් වළකින්නැයි ද එම ලිපි මගින් හෝටල් හිමියන්ගෙන් ඉල්ලීම් කර ඇතැයි සඳහන් වේ.
එසේම හෝටල්වල මෙවැනි සංග්‍රහ පැවැත්වීම නැවැත්වීමට මැතිවරණ කොමිෂන් සභාව ඊයේ (29) පොලිසියට උපදෙස් මාලාවක් ලබා දුන්නේය.මේ අතර මැතිවරණ අපේක්ෂකයන් විවිධ හෝටල්වල සංග්‍රහ පවත්වන බවට සුඳහන් අසත්‍ය පැමිණිලි ද විශාල වශයෙන් ලැබෙමින් පවතින බව මැතිවරණ කොමිෂන් සභාව පවසයි.
එවැනි ස්ථාන පරීක්ෂාව සඳහා අමතර වියදමක් දැරීමට සිදුවන හෙයින් එලෙස අසත්‍ය පැමිණිලි ඉදිරිපත් කිරීමෙන් වළකින්නැයි කොමිසම මහජනතාවගෙන් ඉල්ලීමක් කරයි.මහනුවර මැතිවරණ අපේක්ෂකයකු මහනුවර ප්‍රදේශයේ හෝටලයක පෙරේදා සංග්‍රහයක් පවත්වමින් සිටිය දී මැතිවරණ කොමිෂන් සභාවේ නිලධාරී පිරිසක් එම ස්ථානය වැටලූ අවස්ථාවේ දී
අපේක්ෂකයා පස්ස දොරෙන් පලා ගොස් ඇතැයි වාර්තා වේ.
එහිදී එම සංග්‍රහය පැවැත්වීමේ වගකීම අපේක්ෂකයාගේ ආධාරකරුවකු බාරගෙන ඇති බව ද දැනගන්නට ඇත. මෙම අපේක්ෂකයාගේ ක්‍රියා කලාපය ගැන මහනුවර සෙසු අපේක්ෂකයන් සහ මැතිවරණ නිරීක්ෂණ සංවිධාන මැතිවරණ කොමිෂන් සභාවට දැනටමත් පැමිණිලි කර ඇත.
(සුජිත් හේවාජුලිගේ)
0 Comments