එක්සත් ජාතික පක්ෂයේ අනුරාධපුර දිස්ත්‍රික් ප්‍රධාන සංවිධායක, හිටපු ඇමැති ඩබ්ලිව්. බී.ඒකනායක මහතාගේ මරණයට හේතුව හෘදයාබාධයක් බවට, පශ්චාත් මරණ පරීක්ෂණයේ දී අනාවරණය වූ බව අනුරාධපුර ශික්ෂණ රෝහල් ප්‍රකාශකයකු පැවසීය.
ඒ මහතා පෙරේදා (10) පදිංචි නිවෙසේ නාන කාමරය තුළ ජීවිතක්ෂයට පත්ව සිටින බවට ලැබුණු තොරතුරක් මත වැඩිදුර විමර්ශන ආරම්භ කළ බව අනුරාධපුර පොලිසිය සදහන් කළේය.
අංක 224, පැරණි පුත්තලම පාර, තිසා වැව ලිපිනයේ පිහිටි තම නිවෙසේ පදිංචිව සිටි ඒ මහතා මිය යන විට, 76 වන වියේ පසුවිය.
ජීවිතක්ෂයට පත්වූ ඒකනායක මහතා දියවැඩියාව සහ කොලෙස්ටරෝල් යන රෝගයන් ගෙන් පෙළුණු අයෙකු බවත්, ඒ සඳහා සායනික ප්‍රතිකාර ලබන බවද මරණය සිදු වූ අවස්ථාවේදී අනාවරණය විය. ජීවිතක්ෂයට පත් වූ හිටපු ඇමැතිවරයාට අවශ්‍ය ආහාර පාන, බෙහෙත් ලබා දෙමින් නිවෙසේ කටයුතු කළ පුද්ගලයකු, රෝගී තත්ත්වයක් හේතුවෙන් ප්‍රතිකාර ලබා ගැනීම සඳහා යාපනය ප්‍රදේශයට ගොස් ඇති අතර, මෙම හෘදයාබාධය සිදු වන අවස්ථාවේ දී ඒ මහතා පමණක් නිවෙසේ සිට ඇති බව පොලිසිය සඳහන් කළේය.
මෙම මරණය සම්බන්ධයෙන් හදිසි මරණ පරීක්ෂණය, අනුරාධපුර නාගරික සහ මධ්‍යම නුවරගම් පළාත් හදිසි නාගරික මරණ පරීක්ෂක ජේ.එම්. ජයතිලක මහතා සිදු කරනු ලැබූ අතර, පශ්චාත් මරණ පරීක්ෂණය අනුරාධපුර ශික්ෂණ රෝහලේදී සිදු කරනු ලැබීය. පසුගිය ජනාධිපතිවරණ සමයේදී හිටපු ජනාධිපති රනිල් වික්‍රමසිංහ මහතා, හිටපු ඇමැති ඩබ්ලිව්.ඩී. ඒකනායක මහතා අනුරාධපුර දිස්ත්‍රික් එක්සත් ජාතික පක්ෂ ප්‍රධාන සංවිධායකවරයා ලෙස පත්කරනු ලැබීය. එක්සත් ජනතා නිදහස් සන්ධාන ආණ්ඩුවේ වාරිමාර්ග හා ජල සම්පත් කළමනාකරණ නියෝජ්‍ය ඇමැතිවරයා ලෙසද ඒ මහතා කටයුතු කළේය.
අනුරාධපුර - සශිනි මධුෂානි
0 Comments