ඩුබායිහි රැඳී සිටින ලලිත් කන්නන්ගර නමැති පාතාලයේ ප්‍රබල මත්කුඩු ජාවාරම්කරුගේ කොන්ත්‍රාත්තුවකට අනුව හංවැල්ල කහහේන නෙළුවත්තුඩුවේ පදිංචිව සිටි බස් රථ හිමි කෝටිපති ව්‍යාපාරික වජිර නිශාන්තට ටි 56 ගිනිඅවියකින් වෙඩි තබා ඝාතනය කර ඇත්තේ යුද හමුදා විශේෂ බළකායේ සෙබළෙක් විසින් බවට තොරතුරු හෙළිකරගත් බස්නාහිර පළාත් දකුණු දිසා අපරාධ කොට්ඨාසයේ නිලධාරීන් බළංගොඩ නි‍ෙවසක සැඟවී සිටියදී ඊයේ (07) ඔහුව අත්අඩංගුවට ගෙන තිබේ.
ඝාතනයට ලක් වූ වජිර නිශාන්ත නමැති 55 හැවිරිදි කෝටිපති ව්‍යාපාරිකයාගෙන් විදේශගතව සැඟව සිටින මහා පරිමාණ මත්ද්‍රව්‍ය ජාවාරම්කරුවකු සහ සංවිධානාත්මක අපරාධකරුවෙකු වන කන්නංගරගේ ලලිත් කන්නංගර නමැත්තා විසින් ඉල්ලා සිටි කප්පම් නොදීම සම්බන්ධයෙන් උරණව මෙම ඝාතනයකර ඇති බව විමර්ශනවලින් හෙළිවී ඇත.
ලලිත් කන්නන්ගර නමැති පාතාලයේ අපරාධකරු ඩුබායිහිදී එරට පොලිසිය මඟින් අත්අඩංගුවට ගෙන තිබුණද ඔහුව මෙරටට ගෙන්වා ගැනීම සම්බන්ධයෙන් වූ ක්‍රියාවලියේ පැවති මන්දගාමීකම හේතුවෙන් ඔහුව මුදා හැර ඇති බව පොලිස් තොරතුරු සඳහන් කළේය.
එසේ ඩුබායි පොලිස් අත්අඩංගුවෙන් නිදහස් වීමෙන් අනතුරුව සිය ගෝලයින් යොදා ඔහු මෙරට සිදු කරන අපරාධවල වර්ධනයක් සිදුව ඇති බව බුද්ධි අංශ සඳහන්කර ඇත. හංවැල්ලේ බස් රථ හිමි ව්‍යාපාරිකයා ඝාතනය කරනු ලබන්නේ ඒ අනුවය.
මෙම ඝාතනය සම්බන්ධයෙන් විධිමත් විමර්ශනයක් සිදු කරන ලෙස බස්නාහිර පළාත භාර ජ්‍යෙෂ්ඨ නියෝජ්‍ය පොලිස්පති මහින්ද ගුණරත්න සහ නියෝජ්‍ය පොලිස්පති ගයන්ත මාරපන මහත්වරුන් බස්නාහිර පළාත දකුණු දිශාව අපරාධ කොට්ඨාසයේ වැඩබලන ස්ථානාධිපති පොලිස් පරීක්ෂක හේමන්ත කුමාර මහතාට ලබාදුන් නියෝගයක් අනුව ඉතා සූක්ෂ්ම ලෙස විමර්ශන පවත්වා වෙඩික්කරු සම්බන්ධයෙන් ලබා ගත් තොරතුරු රැසක් ඔස්සේ දින කීපයක් තුළදී සැකකරු අත්අඩංගුවට ගැනීමට හැකිවූ බව පොලිසිය සඳහන් කරයි.
අත්අඩංගුවට ගත් මෙම සැකකරුගෙන් සිදුකළ ප්‍රශ්න කිරීමේදී ඉකුත් 30 වැනි දින කෝටිපති ව්‍යාපාරිකයාගේ නි‍ෙවස අසලට යතුරුපැදියකින් බැස පා ගමනින් පැමිණ ඊට යාබදව තිබෙන කැලෑවක් සහිත ඉඩමේ සැඟව සිට ව්‍යාපාරිකයා ආලින්දයට පැමිණ පුටුවේ වාඩි වී සිටියදී නි‍ෙවසට දකුණු පසින් තිබෙන අඩි හතක පමණ උස තාප්පයෙන් වත්තට පැන ව්‍යාපාරිකයාට වෙඩි තබා ඔහු පැලඳ සිටි පවුම් පහක පමණ රන්මාලයද කොල්ලකා පා ගමනින්ම පලා ගිය බව සැකකරුගෙන් ප්‍රශ්න කිරීමේදී අනාවරණය වී යැයි පොලිසිය කියයි.
අනතුරුව කන්නංගර නමැත්තා ලබා දුන් දුරකතන ඇමතුමක් අනුව එම ගිනිඅවිය සහ රන්මාලය යතුරුපැදියකින් පැමිණි පුද්ගලයකු වෙත භාරදුන් බවත් සැකකරු අනාවරණය කළ බව පොලිසිය කියයි.
ඉකුත් මස 9 සහ 19 වැනිදින ද ව්‍යාපාරිකයා ඝාතනය කිරීම සඳහා නි‍ෙවස අසලට පැමිණියද ඔහු නිරතුරුවම පරිහරණය කරන කැබ් රථය නි‍ෙවස ඉදිරිපිට දකින්නට නොවීම හේතුවෙන් ඔහු නි‍ෙවසේ නොමැති බව සිතා ආපසු හැරී ගිය බවත් පසුව ඒ පිළිබඳ වැඩිදුරටත් සොයා බැලීමේදී එම කැබ් රථය ව්‍යාපාරිකයා විසින් විකුණා ඇති බවට අනාවරණය වීමෙන් අනතුරුව 30 වැනිදින සවස 6.30 සිට නි‍ෙවස අසල රැකවල්ලා සිට වත්තට පැන ව්‍යාපාරිකයාට වෙඩි තබා පලා ගිය බව විමර්ශන නිලධාරීන්ගේ ප්‍රශ්න කිරීම් හමුවේදී සැකකරු වැඩිදුරටත් පවසා ඇත. විදේශගතව සැඟව සිටින ලලිත් කන්නංගර නමැත්තාගේ කප්පම් ඉල්ලීමේ සිද්ධිය මුල්කරගෙන හංවැල්ල පොලිසියට පැමිණිලි දහයකට අධික ප්‍රමාණයක් ලැබී ඇති බවත් පැමිණිලි කිරීමට බිය වූ ඇතැම් ව්‍යාපාරිකයන් ව්‍යාපාරික ස්ථාන වසා ගෙවල් දොරවල් අත්හැර වෙනත් ප්‍රදේශ කරා පදිංචියට ගොස් ඇතැයිද උසස් පොලිස් නිලධාරියෙක් පැවසීය.
අත්අඩංගුවට ගත් 31 හැවිරිදි යුද හමුදාවේ විශේෂ බළකායේ හිටපු මෙම සෙබළා හංවැල්ල දිද්දෙණිය ස්ථීර පදිංචිකරුවකු බවත් අපරාධ සිදු කිරීමෙන් අනතුරුව විවාහක බිරියගේ ගම් ප්‍රදේශයට ගොස් සැඟව සිටීම පුරුද්දක් කරගෙන තිබූ බව පොලිසිය කියයි.
සැකකරු සමඟ මෙම අපරාධයට පැමිණි පුද්ගලයන් සහ වෙඩි තැබීමට යොදාගත් ගිනිඅවිය සොයා විමර්ශන සිදු කිරීම සඳහා රැඳවුම් නියෝග මත තවදුරටත් ප්‍රශ්න කරන බව පොලිසිය කියයි.
බස්නාහිර පළාත් ජ්‍යෙෂ්ඨ නියෝජ්‍ය පොලිස්පති මහින්ද ගුණරත්න, නියෝජ්‍ය පොලිස්පති ගයන්ත මාරපන මහත්වරුන්ගේ උපදෙස් මත බස්නාහිර පළාත දකුණු දිසාව අපරාධ කොට්ඨාසයේ අධ්‍යක්ෂ සහකාර පොලිස් අධිකාරි ජනක කුමාර අධීක්ෂණය යටතේ වැඩබලන ස්ථානාධිපති පොලිස් පරීක්ෂක හේමන්ත කුමාර මහතාගේ මෙහෙයවීමෙන් පොලිස් පරීක්ෂක වීරසිංහ පොලිස් සැරයන්වරුන් වන (40248) ප්‍රසන්න (72979) චමින්ද,(72338) ලලන්ත (69598) අනිල් පොලිස් කොස්තාපල්වරුන් වන (104675) කේෂර (87697) චානක (19363) සේනානායක මහත්වරු පරීක්ෂණ පවත්වති.
(බණ්ඩාරගම - බිමල් ජයසිංහ)
0 Comments