පෙර පාසල්වලට සහ එහි අධ්‍යාපනය ලබන දරුවන්ට උදව් උපකාර කරන මුවාවෙන් පැමිණ එම දරුවන්ගේ කන කර රන් ආභරණ සොරකම් කරන බව කියන තරුණ අඹු සැමි යුවළක් හසලක පොලිසිය විසින් පෙරේදා (22) හසලක 4 ඇළ ප‍්‍රදේශයේදී අත්අඩංගුවට ගෙන තිබේ.
පදියතලාව ප‍්‍රදේශයේ පදිංචිකරුවන් බව කියන 27 හා 26 හැවිරිදි වියේ පසුවෙන මෙම තරුණ අඹුසැමි යුවළ අවුරුදු 04 ක් පමණ වයසැති ඔවුන්ගේ කුඩා දැරියක් සමඟ ප‍්‍රදේශයේ ක‍්‍රියාත්මක පෙර පාසල්වලට ගොස් එහි පාලිකාව සහ මවුපියන් කිහිපදෙනෙකු හමුවී පවසන්නේ තමන් ස්වේච්ඡා සංවිධානයක නියෝජිතයින් බවත් මෙම පෙර පාසලට අවශ්‍ය උපකරණ සහ දරුවන්ට අවශ්‍ය පොත් පත් හා ඔවුන්ගේ නිල ඇඳුම් නොමිලයේ ලබා දිය හැකි බවත්ය.
එම කතා බහෙන් අනතුරුව ඔවුන් පෙර පාසලට අවශ්‍ය උපකරණ ලේඛනයක් පාලිකාවගෙන් ලබා ගන්නා අතර, දරුවන්ගේ සපත්තු හා නිල ඇඳුමේ ප‍්‍රමාණයන් ලබා ගැනීමට කටයුතු කරනු ලබයි. එම කටයුත්තෙන් පසු පාලිකාවගේ සහ මවුපියන් කිහිපදෙනෙකුගේ දුරකතන අංකද ලබාගෙන මේ උපකරණ සහ ඇඳුම් ඉතා ඉක්මනින්ම ලබාදෙන බව කියා මවුපියන්ගෙන් තේ එකක් ද පානය කර ඉතා සුහඳව පිටව යයි.
එම පාසලේ ගැහැනු දරුවන් නිවෙස්වලට ගිය පසු මවුපියන් දකින්නේ තම දරුවාගේ ගෙල බැඳ තිබූ රන් පංචායුධය හෝ කනේ තිබූ කරාඹුව අතුරුදන්ව ඇති බවකි. පසු දින පෙර පාසලට පැමිණෙන මවුවරුන් මේ සම්බන්ධයෙන් අනෙක් මවුවරුන් සමඟද කතා කරන විට එම මවුවරුන්ද තමන්ගේ දරුවාගේ රන් ආභරණ අතුරුදන්වීම ගැන සඳහන් කරයි.
මෙවැනි සිදුවීම් පෙළක් මහියංගණය පුරා ඇති අතර, පෙර පාසල් පාලිකාවන් හා මවුවරුන් මේ සම්බන්ධයෙන් මහියංගණ පොලිසියට පැමිණිලි කිරීමෙන් අනතුරුව පොලිසිය එම පැමිණිලි පිළිබඳව පරීක්ෂණ පවත්වන අතරේ පෙර පාසල් පාලිකාවන්ගේ සංසදය මෙම සිද්ධිය සමාජ මාධ්‍ය හරහා යවමින් ප‍්‍රචාරයක්ද කරනු ලැබීය.
මේ අතර පෙරේදා (22) දහවල් හසලක පොලිස් වසමේ කිණපැලැස්ස ග‍්‍රාම නිලධාරි වසමේ ක‍්‍රියාත්මක පෙර පාසලකට සිය කුඩා දරුවාද සමඟ ති‍්‍රරෝද රථයකින් පැමිණි මෙම යුවළ පෙර පාසල් පාලිකාව හමුවී තමන් අසවල් ස්වේච්ඡා සංවිධානයෙන් බවත් තම ආයතනයට මෙම පෙර පාසලට අවශ්‍ය උපකරණ හා දරුවන්ගේ නිල ඇඳුම ලබා දීමට හැකියාවක් පවතින බවත් සඳහන් කර තිබේ.
මෙම අයගේ ක‍්‍රියා කලාපය සමාජ මාධ්‍ය ඔස්සේ මෙහි පාලිකාව දැනුවත්ව තිබූ හෙයින් ඔවුන්ව පාසල තුළ වාඩිකරවා පිටතට ගොස් ගමේ කිහිප දෙනෙකු මෙම සොර යුවළ සම්බන්ධව දැනුවත් කොට ඔවුන් පෙර පාසලට ගෙන්වා ගැනීමෙන් අනතුරුව පොලිසියද දැනුවත් කර තිබේ. එම දැනුවත් කිරීමත් සමඟ පොලිස් ස්ථානාධිපති ප‍්‍රධාන පොලිස් පරීක්ෂක එම්.එන්.අයි. දිසානායක මහතාගේ උපදෙස් මත අපරාධ අංශයේ ස්ථානාධිපති උප පොලිස් පරීක්ෂක ඒ.ඩබ්ලිව්. රාජපක්ෂ මහතා ඇතුළු නිලධාරින් කණ්ඩායමක් පෙර පාසල වෙත පැමිණ විස්තර ලබා ගැනීමෙන් අනතුරුව ඔවුන් දෙදෙනා අත්අඩංගුවට ගෙන වැඩිදුර විමර්ශන කටයුතු සඳහා මහියංගණය පොලිසිය වෙත භාර දීමට කටයුතු කරනු ලැබීය.
මෙවැනි වංචාකාර පුද්ගලයින් තමන්ගේ පෙර පාසලට දහම් පාසලට පැමිණීමට ඉඩ ඇති හෙයින් ඒ සම්බන්ධයෙන් විමසිලිමත්ව සිටින ලෙස හසලක පොලිසිය පෙර පාසල් හා දහම් පාසල් ගුරුවරුන්ව දැනුවත් කිරීමක් කරනු ලබයි.
(හසලක ඊ.එම්.එස්. ඒකනායක)
0 Comments