මිතුරු සාදයකට පැමිණ දහ හතර හැවිරිදි දැරියකට ලිංගික අතවර කිරීමට තැත් කළැයි කියන සිද්ධියක් සම්බන්ධයෙන් දැරියගේ පියාගේ මිතුරකු අත්අඩංගුවට ගත් බව හිඟුරක්ගොඩ පොලිසිය පවසයි.
මෙසේ අත්අඩංගුවට ගෙන ඇත්තේ හිඟුරක්ගොඩ නගරයේ පදිංචි 41 හැවිරිදි පුද්ගලයෙක් වන අතර, සැකකරු දරුවන් දෙදෙනකුගේ පියකු බව ද පොලිසිය කියයි. අතවරයට පත් දැරියගේ පියා සමඟ මත්පැන් පානය කිරීම සඳහා සැකකරු සහ තවත් මිතුරකු ඉකුත් 16 වැනිදා රාත්‍රී දැරිය වාසය කළ නි‍ෙවසට පැමිණ ඇති අතර, සාදය අවසානයේදී සැකකාර මිතුරා එම නිවෙසේ නවාතැන්ගෙන ඇති බවට තොරතුරු හෙළිවී ඇතැයි පොලිසිය සඳහන් කරයි.
සිද්ධිය වූ දින රාත්‍රී එකට පමණ දැරිය සහ ඇගේ මව නිදා සිටි කාමරයට පැමිණ ඇති සැකකරු දැරියට අතවර කිරීමට උත්සාහ ගැනීමේදී මව අවදිවී කෑ ගසා ඇති බවත් පසුව නිවැසියන් අවදීවී සැකකරු අල්ලා ගස් බැඳ පොලිසියට දැනුම් දුන් බවත් වාර්තා වෙයි.
සැකකරු හිඟුරක්ගොඩ අධිකරණයට ඉදිරිපත් කිරීමට නියමිතය.
හිඟුරක්ගොඩ සහකාර පොලිස් අධිකාරි සුදත් අස්මඬල මහතාගේ මෙහෙයුම මත හිඟුරක්ගොඩ වැඩ බලන ප්‍රධාන පොලිස් පරීක්ෂක විමලදාස මහතාගේ උපදෙස් මත හිඟුරක්ගොඩ පොලිසියේ ළමා හා කාන්තා කාර්යාංශයේ ස්ථානාධිපතිනි පොලිස් පරීක්ෂිකා රාජපක්ෂ, පොලිස් සැරයන් ප්‍රියන්ත (51138) යන නිලධාරීහු වැඩිදුර පරීක්ෂණ පවත්වති.
මින්නේරිය - සුසිල් කරුණාතිලක
0 Comments