ශ්‍රී ලංකා ක්‍රිකට් කණ්ඩායමේ හිටපු ප්‍රවීණ ක්‍රීඩකයන් දෙදෙනකු වන කුමාර සංගක්කාර සහ මහේල ජයවර්ධන හිමිකාරිත්වය දරන මිනිස්ට්‍රි ඔෆ් ක්‍රැබ් අවන්හලේ කකුළුවා සහිත වෙළෙඳ ලකුණට සමාන වෙළෙඳ ලකුණු හා එම අවන්හලේ ප්‍රදර්ශිත සූපවේදී ක්‍රියාකාරකම් අනුකරණය වළක්වන වාරණ නියෝග 2ක් ප්‍රසිද්ධ අවන්හල් සමාගමකට එරෙහිව කොළඹ වාණිජ මහාධිකරණය ඊයේ (22) නිකුත් කළේය.
මිනිස්ට්‍රි ඔෆ් ක්‍රැබ් අවන්හල අයත් ක්‍රැබ් ක්‍රෝබ් පුද්ගලික සමාගම පැවරූ නඩුවක් සලකා බැලීමෙන් පසු කොළඹ වාණිජ මහාධිකරණ විනිසුරු කේ.පී. ප්‍රනාන්දු මහතා විසින් 'ද කිංග් ක්‍රැබ්' අවන්හල පවත්වා ගෙන යන ගවර්මන්ට් හෝල්ඩින් පුද්ගලික සමාගමට හා එහි ප්‍රධාන සූපවේදී එඩ්වඩ් බෙනඩික් යන අයට විරුද්ධව මෙම වාරණ නියෝග නිකුත් කර ඇත.
පැමිණිලිකාර මිනිස්ට්‍රි ඔෆ් ක්‍රැබ් සමාගම වෙනුවෙන් සුදත් පෙරේරා ඇසෝසියෙට් හි උපදෙස් පරිදි නීතිඥ මනෝජ් බණ්ඩාර මහතා කරුණු දක්වමින් විත්තිකාර සමාගම බුද්ධිමය දේපළ පනතේ විධිවිධාන උල්ලංඝනය කරමින් අසාධාරණ තරගයක නියැළීමට කටයුතු කරන බව කියා සිටියේය.
සූපවේදී එඩ්වඩ් බෙනඩික් පැමිණිලිකාර සමාගමෙන් ඉවත්ව එම සමාගමේ කීර්ති නාමය හා ප්‍රසිද්ධිය උපයෝගි කරගනිමින් ඊට සමාන වෙළඳ ලකුණ,
එහි වර්ණ හා වචන ප්‍රදර්ශනය කරන වෙළෙඳ ලකුණක් යටතේ පැමිණිලිකාර සමාගමේ සූපවේදී මෙනුවට සමාන ආකාරයෙන් පාරිභෝගිකයන් හට සේවය සපයන බවට පැමිණිලිකරුවන් සිය පෙත්සම මඟින් කරුණු දක්වා සිටියේය.
පැමිණිලිකාර සමාගම ලෝකයේ රටවල් කිහිපයක අවන්හල් ජාලයක් පවත්වා ගෙන යන බවත් සිය ව්‍යාපාරය ආසියාවේ හොඳම අවන්හල් 50 අතරට වසර 8ක සිට තේරී පවතින බවත් පෙන්වා දීම කළේය.
සිය වෙළෙඳ ලකුණට සමාන වෙළෙඳ ලකුණක් සමාන පාටවලින් හා සමාන අකුරුවලින් යුත් සුපවේදී මෙනුවක් භාවිත කිරීමෙන් 2003 අංක 36 දරණ බුද්ධිමය දේපළ පනතේ 160 වගන්තියේ උල්ලංඝනය කර ඇති බව පැමිණිල්ලේ සඳහන් වේ.
පැමිණිල්ලේ කරුණු සලකා බැලූ මහාධිකරණ විනිසුරුවරයා පැමිණිලිකාර සමාගමේ වෙළෙඳ ලකුණට සමාන කකුළුවකුගේ රූපයකින් හා පාටකින් යුත් වෙළෙඳ ලකුණක් භාවිත කිරීම සූපවේදී මෙනුවක් භාවිත කිරීම වළක්වමින් වාරණ නියෝග 2ක් නිකුත් කළේය.
වගඋත්තරකාර සූපවේදියාට හා සමාගමට අතුරු තහනම් දැන්වීම් හා නොතීසි නිකුත් කළ මහාධිකරණ විනිසුරුවරයා ලබන 23දා අධිකරණය කරුණු දක්වන ලෙසටද නියෝග කළේය.
පැමිණිල්ල වෙනුවෙන් සුදත් පෙරේරා ඇසෝසියේට් හි උපදෙස් පරිදි නීතිඥ මනෝජ් බණ්ඩාර නීතිඥ තිඩාස් හේරත්, නීතිඥ තමාලි විජේකෝන් සහ නීතිඥ ඇන්ජලා ෆෝන්සේකා යන මහත්ම මහත්මීහු පෙනී සිටියහ.
(චන්දන ජයවීර)
0 Comments