ත්‍රිරෝද ගාලක රියැදුරකු ලෙස වසර දහ අටකට වැඩි කලක් සේවය කරන ත්‍රිරෝද රථයෙන් පසුගිය විසිනව වන දින සවස් කාලයේදි මැණික්හින්න නගරයට හයර් එකක් යන මුවාවෙන් පුද්ගලයන් දෙදෙනකු එම රථය රැගෙන ගොස් පාළු ස්ථානයක දී තමන්ට මත්කුඩු පොවා ඇඳුම් ගලවා අතින් පයින් හොඳටම පහර දී තමන් සතුව තිබූ වටිනා මුදු, චේන් හා ජංගම දුරකතන දෙකක් පැහැරගෙන මධ්‍යම රාත්‍රියේදි මැණික්හින්න නගරයට ගෙන විත් දමා පුද්ගලයන් දෙදෙනකු පලා ගිය බව දිගන ගොමගොඩ ළිඳේ ගෙදර සිරිපාල නෙහොත් කොණ්ඩයා නමැති පනස් දෙහැවිරිදි ත්‍රීවීල් රථ දෙදරු පියෙකු පවසයි. “දිගන ඔරුතොට රථ ගාලේ අංක සී.පී. එල් 9117 දරන ත්‍රිරෝද රථයේ සේවය කරමින් සිටින විට පසුගිය 29 වැනිදා සවස හැඩි දැඩි පුද්ගලයන් දෙදෙනකු පැමිණ මැණික්හින්න නගරයට හයර් එකක් යෑමට ඇති බවත් ඒ සඳහා අය කරන ගාස්තුව කීයද කියා විමසා සිටියා. එම ගමන සඳහා රුපියල් දහසක් අවශ්‍ය බව මම කීවා.
එම මුදලට මැණික්හින්න නගරයට හයර් එකක් යෑමට ඔවුන් දෙදෙනා කැමැත්ත පළ කර එම ගමන යමුයි කියා යෝජනා කළා.
ඒ අනුව එම පුද්ගලයන් දෙදෙනා ත්‍රිරෝද රථයේ දමා ගෙන මම මැණික්හින්න නගරයට ඔවුන් දෙදෙනා රැගෙන ගියා. පසුව මැණික්හින්න නගරයේ හයසිය විසි එක මාර්ගයේ එක්තරා ස්ථානයක ත්‍රිරෝද රථය නතර කරන ලෙස ඉල්ලා සිටියා. තම ත්‍රිරෝද රථයෙන් බැස ගිය එක් පුද්ගලයෙක්
බියර් ටින් දෙකක් රැගෙන පැමිණ මේවා මෙහෙම තැන්වල බොන්න බැහැ. අපි වෙන තැනකට යමුයි කියා නගරයේ පාළු තැනකට ත්‍රිරෝද රථයෙන් ගොස් එහිදී දේශපාලන කතාවක් පටන් අරන් මටත් බොන්න දුන්නා ඒවා පානය කළාට පසු දෙමළ බසින් කථා කළ එම දෙදෙනා මට හොඳටම අතින් පයින් පහර දී මගේ සම්පූර්ණ ඇඳුම් ගලවා යළිත් පහර දී මගේ වටිනා මුදු, චේන් මුදල් හා ජංගම දුරකතන දෙකත් උදුරා ගත්තා. මත්කඩු පානය කළාට පසු මට මොනවා වුණාද කියා මම දන්නේ නැහැ. නගරයේ මම ඇඳුම් නැතිව එහාට මෙහාට ගියා. පසුව මට යළි සිහිය ආවා මට ගෙදර යන්න මතක් වුණා” යැයි ළිඳේ ගෙදර සිරිපාල නොහොත් කොණ්ඩයා පනස් දෙහැවිරිදි දෙදරු පියා පැවසීය.
“පසුව මට තේරුණා ඇ‍ඟේ ඇඳුම් නැති බව මගේ යට ඇඳුම පමණයි තිබුණේ.
මම මැණික්හින්න නගරයේ එහාට මෙහොට මධ්‍යම රාත්‍රියේ ඇවිද ඇවිද ඉහළ මැණික්හින්න නගරයේ ඉඳල දිගන නගරයට පයින්ම ආවා. වාහන නවත්වන්න කියා අත දික් කළා. කිසිම වාහනයක් රාත්‍රි කාලයේ නැවැත්තුවේ නැහැ. දිගන නගරයේදි යාළුවෙක් දැකල මාව තෙල්දෙණිය රෝහලට රැගෙන ගියා පසුව මම මහනුවර රෝහලට ගෙන ගොස් තිබෙනවා. මට අතින් පයින් පහර දීමෙන් මගේ ඔළුව රිදෙනවා අතපය හොඳටම තුවාල වෙලයි තියෙන්නේ. මට දැන් වැඩක් පලක් කර ගන්න අමාරුයි ඇවිදින්නත් හරිම අමාරුයි. මගේ වටිනා මුදු, චේන්, මුදල් හා ෆෝන් දෙකක් පැහැරගෙන තිබෙනවා. මගේ ත්‍රීවීල් එකට මොනවා වුණාදැයි මම දන්නේ නැහැ” ළිඳේ ගෙදර සිරිපාල වැඩිදුරටත් පවසයි.
මේ පිළිබඳව මම නීතිඥ මහත්මියක් මඟින් තෙල්දෙණිය පොලිසියට පැමිණිල්ලක් කළා යැයි ඔහු පවසයි.
( කරල්ලියද්ද - කේ. විජේසිරි නිශ්ශංක)
0 Comments