ප්‍රධාන පෙළේ සමාජ ක්‍රියාකාරිකයෙක් පිස්තෝල වර්ගයේ ගිනි අවියක්, රැම්බෝ පිහියක්, කඩු කිහිපයක් ඇතුළු ආයුධ තොගයක් ද සමග කැලණිය පොලිසියේ නිලධාරීන් කණ්ඩායමක් විසින් ඊයේ (20) අත්අඩංගුවට ගනු ලැබීය.සැකකරු කැලණිය ගෝනවල ප්‍රදේශයේ පදිංචි 41 හැවිරිදි ප්‍රදීප් වික්‍රමසිංහ නමැති අයෙකි.
කැලණිය කොහල්විල පාරේ ගෝණවල ප්‍රදේශයේ ස්ථානයක හිමිකරුවකු නැතිව බොහෝ වේලාවක් නවතා තිබූ ඩබල් කැබ් රථයක් පිළිබඳව ඒ අවට ප්‍රදේශවාසීන් විසින් කළ දැනුම් දීමක් මත පරීක්ෂණ ආරම්භ කළ කැලණිය පොලීසියේ අපරාධ විමර්ශන අංශය මඳ වේලාවකට පසු එම ස්ථානයට පැමිණි වාහනයේ හිමිකරු ප්‍රශ්න කිරීම සඳහා අත්අඩංගුවට ගෙන ඇත.
මෙලෙස අත්අඩංගුවට ගෙන ඇත්තේ ප්‍රදීප් වික්‍රමසිංහ නැමති බණ්ඩාරවෙල ප්‍රදේශයේ ඉඩම් හිමියකු බව කියන පුද්ගලයෙකි.
තමා සමාජ මාධ්‍ය ක්‍රියාකාරියකු බව ප්‍රශ්න කිරීමේදී එම පුද්ගලයා පවසා තිබේ.
ස්ථානීය පරීක්ෂණ නිලධාරීහු පොලිස් නිල සුනඛයෝ දෙදෙනෙක් සහ ඇඟිලි සලකුණු පරීක්ෂණ නිලධාරීහු කණ්ඩායමක් විමර්ශනයක් සිදු කළ පසුව එම සුඛෝපභෝගී ජිප් රථයේ තිබී පිස්තෝලයක්, කඩු කීපයක්, යකඩ පොල්ලක්, මදන මෝදක ගුලි සහ රම්බෝ පිහියක්ද පොලිසිය සොයාගෙන ඇත.
බණ්ඩාරවෙල මෙන්ම කැලණිය ප්‍රදේශයේ තමා පදිංචිව සිටින බව ඔහු පොලිසිය හමුවේ ප්‍රකාශ කර ඇත.
පෞද්ගලික රූපවාහිනී නාළිකාවක මීට ඉහත සේවය කර ඇති අයකු වන ඔහු සතුව තිබී පිළිගත හැකි මාධ්‍ය හැඳුනුම්පතක් ඉදිරිපත් කළ බවද පොලීසිය පැවසීය.
අත්අඩංගුවට ගෙන කළ ප්‍රශ්න කිරීම් වලදී ඔහු පාපෝච්චාරණය කර ඇත්තේ, අලුයම තමා බීමත්ව සිටි හෙයින් රථය මාර්ගයේ දමා නිවෙසට ගිය බවයි.ගිනි අවි සහ ආයුධ තොගය ඔහු මෙසේ සන්තකයේ තබාගෙන ඇත්තේ කිසියම් අපරාධයක් සදහාද යන්න පිළිබඳව පොලිසිය විමර්ශන කරයි.
අත්අඩංගුවට ගත් පුද්ගලයා පොලිස් ඇප මත මුදාහැර ඇති අතර, ඔහු සම්බන්ධයෙන් නීතිපතිවරයා වෙත ලිපි ගොණුවක් යොමු කර ඉදිරියේදී නීතිපතිවරයාගෙන් ලැබෙන උපදෙස් මත විමර්ශන සිදු කරන බව කැලණිය පොලිසියේ වැඩබලන ස්ථානාධිපති හේරත් මහතා පැවසීය.
0 Comments