ටෙක්නිකල් හන්දිය ආසන්නයේදී ගණිකා වෘත්තියේ නිරත කාන්තාවක තියුණු ආයුධයකින් ගෙල කපා ඝාතනය කිරීමේ සිද්ධියට අදාළව වහාම විමර්ශනයක් කරන ලෙස කොළඹ ප්‍රධාන මහේස්ත්‍රාත් තිළිණ ගමගේ මහතා ඊයේ (7) කෙසෙල්වත්ත පොලිසියට නියෝග කළේය.
අපරාධය සිදු කළ පුද්ගලයා හඳුනාගෙන ඇති බවත් අත්අඩංගුවට ගැනීමට මේ වන විට විමර්ශන ක්‍රියාත්මක බවත් කෙසෙල්වත්ත පොලිසිය අධිකරණයට දැනුම් දුන්නේය.
කොළඹ 12 ප්‍රදේශයේ පදිංචි ගණිකා වෘත්තියේ යෙදෙන වයස අවුරුදු තිස් දෙකක් වයසැති කාන්තාව ඊයේ (7) උදෑසන මෙලෙස ඝාතනයට ලක්වී ඇති බව කෙසෙල්වත්ත පොලිසිය අධිකරණයට කරුණු දැක්වීය.
කෙසෙල්වත්ත පොලිස් වසමේ ටෙක්නිකල් හන්දිය ප්‍රදේශයේදී තියුණු ආයුධයකින් කාන්තාවකගේ ගෙල කපා මනුෂ්‍ය ඝාතනයක් සිදුකළ බවට කොළඹ ජාතික රෝහල කෙසෙල්වත්ත පොලිසියට කරන ලද පැමිණිල්ලක් සලකා බැලීමෙන් අනතුරුව අධිකරණය විසින් මෙම නියෝගය ලබා දෙන ලදි.
තියුණු ආයුධ ප්‍රහාරයකට ලක් වූ අදාළ කාන්තාව කොළඹ ජාතික රෝහලට ඇතුළත් කිරීමෙන් අනතුරුව ජීවිතක්ෂයට පත්ව ඇති බව කෙසෙල්වත්ත පොලිසිය අධිකරණයට දැනුම් දුන්නේය.
පහළ බෝමිරිය, කඩුවෙල ලිපිනයේ පදිංචි පුද්ගලයකු විසින් මරණකාරිය රෝහල්ගත කර ඇති අතර ඒ සම්බන්ධව විමර්ශන කටයුතු සිදුවන බවද පොලිසිය අධිකරණයට දැනුම් දුන්නේය.
මෙම කාන්තාව ගණිකා වෘත්තියේ නියැළෙමින් සිටි අවස්ථාවක එම පුද්ගලයා අතර ඇති මුදල් ආරවුලක් සහ පුද්ගලික ආරවුලක් මත මෙම ඝාතනය සිදුකර ඇති බව විමර්ශනවලදී අනාවරණය වී ඇත. ඝාතනයට ලක්වූ කාන්තාව දිව ගොස් ඇද වැටී මගේ ගෙල කැපුවා මාව ඉක්මනට ඉස්පිතාලයට රැගෙන යන්න ලෙස විලාප දී ඇති බවද පොලිසිය අධිකරණයට කරුණු දැක්වීය.
ඒ අනුව ඉදිරිපත් වූ කරුණු සලකා බැලූ අධිකරණය සිද්ධියට අදාළව විමර්ශන කටයුතු සිදු කර සැකකාර පුද්ගලයා අත්අඩංගුවට ගන්නා ලෙස නියෝග කළේය.
( කල්පනි අබේසිංහ)
0 Comments