තම බිරිඳට අභූත චෝදනා එල්ල කිරීම සම්බන්ධයෙන් උරණ වූ අයකු ගලිගමුව හෙළ බොජුන්හල තුළට දැල්වූ මදුරු කොයිල් ඇමුණූ තුන්හුලස් රතිඤ්ඤා පුපුරවා අලාභහානි කළැයි කියන සිද්ධියක් සම්බන්ධයෙන් එම අවන්හලේ සේවිකාවකගේ සැමියකු පෙරේදා (16) වැනිදා අත්අඩංගුවට ගත් බව කෑගල්ල පොලිසිය පවසයි.
මෙලෙස අත්අඩංගුවට ගෙන ඇත්තේ ගලිගමුව ප්‍රදේශයේ පදිංචිව සිටින 51 හැවිරිදි පුද්ගලයෙකි. සැකකරු ගලිගමුව මංසන්ධියේ කලකට ඉහතදී කුඩා තේ කඩයක් පවත්වාගෙන ගොස් ඇති බවත් පසුව එම තේ කඩය ඉවත් කර ගලිගමුව සමුපකාරය මඟින් හෙළ බොජුන්හලක් ආරම්භ කර ඇති බවත් පොලිසිය සඳහන් කළේය. එම බොජුන්හළ විවෘත කරන අවස්ථාවේදී සැකකරුගේ බිරිඳ ඇතුළු ප්‍රදේශයේ කාන්තාවන් කිහිප දෙනකුටම වෙළෙඳකුටි ලබා දී තිබූ බවත් එම කුටියක සැකකරුගේ බිරිඳ පලතුරු යුෂ පාන ව්‍යාපාරයක් පවත්වාගෙන ගොස් ඇති බවත් පොලිසිය පවසයි.
එම බොජුන් හලේ සෙසු කාන්තාවන් විසින් සිය බිරිඳට විවිධ අභූත චෝදනා එල්ල කරන බවට ඇය සැකකාර සැමියාට පවසා ඇති අතර පසුව ඔහු ඉකුත් 15 වැනිදා තුන්හුලස් රතිඤ්ඤා කරල් කිහිපයකට මදුරු දඟර කැබලි තබා ගැට ගසා
රාත්‍රී 8 ට පමණ ත්‍රිරෝද රථයෙන් හෙළ බොජුන්හල අසලට පැමිණ එහි දොරක් හැර ඒවා එතුළට දමා ඇති බව පොලිසිය සඳහන් කරයි.
පසුව රතිඤ්ඤා කරල් හෙළ බොජුන් හලේ තැන් තැන්වල තබා මදුරු දඟර පත්තු කර සැකකරු යළි හෙළ බොජුන් හලෙන් පිටතට පැමිණ ත්‍රිරෝද රථයෙන් පිටව ගොස් ඇති බව සී.සී.ටී.වී. කැමරා දර්ශනවල පටිගත වී ඇති බවත් පොලිසිය පැවසීය.
රතිඤ්ඤා කරල් වරින් වර පත්තු වීම හේතුවෙන් ඒ ආසන්නයේ පිහිටා ඇති ඉන්ධනහලේ සේවකයින් ගොස් බලා සිද්ධිය සම්බන්ධයෙන් කෑගල්ල පොලිසියට පැමිණිලි කර තිබිණි.
පසුව කෑගල්ල මූලස්ථාන පොලිසියේ අපරාධ විමර්ශන අංශයේ නිලධාරින් කණ්ඩායමක් ගොස් පරීක්ෂා කිරීමේදී හෙළිවී ඇත්තේ හෙළ බොජුන් හලට හානි සිදුවී ඇති බවය.
කෑගල්ල මූලස්ථාන පොලිසියේ ස්ථානාධිපති ප්‍රධාන පොලිස් පරීක්ෂක නාලක මාගෙදරගම මහතාගේ උපදෙස් පරිදි අපරාධ විමර්ශන අංශයේ ස්ථානාධිපති පොලිස් පරීක්ෂක පුෂ්ප කුමාර රණසිංහ, උප පොලිස් පරීක්ෂක ලාල් ජයසිංහ, පොලිස් කොස්තාපල් නිමන්ත (85049) යන නිලධාරිහු විමර්ශන කටයුතු සිදු කළහ.
(කෑගල්ල - චමින්ද ජයලත්)
0 Comments