වැලිවේරිය පොලිස් වසමේ දකුණු ඇඹරළුව සමෘද්ධි මාවතේ නි‍ෙවසක සිටි ගෙහිමි කාන්තාවක හුස්ම හිරකොට ඝාතනය කොට ඇය සතුව තිබූ රන් භාණ්ඩ හා මුදල් කොල්ලකෑමේ සිද්ධිය සම්බන්ධයෙන් සැකපිට අත්අඩංගුවට ගෙන අධිකරණයට ඉදිරිපත් කළ එම සිද්ධියේ ප්‍රධාන සැකකරු බව කියන පුද්ගලයාව ගම්පහ ප්‍රධාන මහේස්ත්‍රාත් සීලණි පෙරේරා මහත්මිය විසින් ඔක්තෝබර් 10 දක්වා රිමාන්ඩ් භාරයට පත් කළාය.
W.M ප්‍රදීප් කුමාර නමැති අයෙකුව මෙලෙස රිමාන්ඩ් භාරයට පත් කෙරෙන අතර ඔහු පසුගියදා බැලුම්මහර ප්‍රදේශයේ පිහිටි සම්බාහන මධ්‍යස්ථානයකට කඩා වැදී එහි සිටි තරුණියන් පස් දෙනකු කාමරයකට දමා සිරකොට ඔවුන්ගේ මුදල් හා දේපොළ සොරකම් කිරීමේ සිද්ධියේ ප්‍රධාන සැකකරු බවට ද මෙහිදී කරුණු අනාවරණය කෙරිණ.
සැකකරු මීට ඉහතදී සිදු කරන ලද හොරකම් හා මංකොල්ලකෑම් අටක් සම්බන්ධයෙන් චෝදනා ලැබ සිටින අයෙකු බවටද මෙහිදී පොලිසිය සඳහන් කර සිටියේය.
ඔහු සමඟ සිටි කාන්තාව කොල්ලකන ලද රන් භාණ්ඩ හා මුදල් රැගෙන පලා ගොස් ඇති අතර ඇයව මෙතෙක් අත්අඩංගුවට ගෙන නොමැත. සැකකරු එම කාන්තාව සමඟ පැමිණ එම නි‍ෙවස සතියක කාලයකට කුලියට ගෙන සිටියදී මෙම ඝාතනය හා කොල්ලකෑම සිදු කර තිබිණ.
0 Comments