මෑතකදී ශ්‍රේෂ්ඨාධිකරණය ලබාදුන් සුවිශේෂ තීන්දුවක් මගින් මේ දක්වා දික්කසාද නඩු සම්බන්ධ ශ්‍රී ලංකාවේ නඩු ඉතිහාසය වෙනස්කර තිබේ.
අනාචාරයේ හැසිරීම යන වරද ඔප්පු කරමින් සිදුකරන දික්කසාද නඩුවක පාර්ශවයකට විවාහය විසුරුවා හැරීමකදී සහ-විත්තිකරු (කලත්‍ර හානිකරු - විවාහයෙන් බාහිර අනියම් ඇසුර පැවැති තෙවන පාර්ශවය) වෙතින් වන්දි ඉල්ලා සිටිය හැකි බව ශ්‍රේෂ්ඨාධිකරණය තීරණය කිරීම මෙම විශේෂ කාරණාවයි.
ඒ අනුව, දික්කසාද නඩුවකදී විවාහය කඩාකප්පල් කළ තෙවන පාර්ශවයකගෙන් (කලත්‍ර හානිකරුගෙන්) වන්දි ඉල්ලන්න හැකියාව ඇතිවාසේම එම එකම නඩුවේදී දික්කසාදය ඉල්ලන්න අවශ්‍ය නැතැයිද දන්වා තිබේ. ඒ අනුව දික්කසාදය වෙනම පවරා ඉල්ලගන්නට හැකිය.
විනිසුරු ප්‍රීති පද්මන් සුරසේන, විනිසුරු අචල වෙංගප්පුලි සහ විනිසුරු ප්‍රියන්ත ප්‍රනාන්දු විනිසුරුවරු තුන්දෙනෙක් මේ තීන්දුවට එකඟ වෙමින් කියා සිටියේ මෙම කාරනාව බොහෝ දෙනෙකු පෙළන ගැටලුවකට විසදුම් ලබාදෙනු ඇති බවයි.
හැටන් උසාවියේ බිරියක සැමියාට එරෙහිව දැමූ වෙනත් නඩුවක් ඔස්සේ මෙම ක්‍රමය සාකච්ඡාවට ලක්විය.
මුලින්ම බිරිඳ හැටන් උසාවියේ නඩුවක් ගොනුකරමින් සැමියා තමාව අතහැර ගිය නිසා දික්කසාදයක් ඉල්ලා සිටි නමුත් සැමියා කිව්වේ එහෙම නෙවෙයි, බිරිඳ තවත් පුද්ගලයෙකු එක්ක අනියම් සබඳතාවයක් පවත්වන නිසා විවාහය කැඩුණ බවය.
ඒ අනුව සැමියා තම බිරියට කළ වරදට එම පුද්ගලයාගෙන් (කලත්‍ර හානිකරුගෙන්) වන්දි ඉල්ලූ අතර හැටන් දිසා උසාවිය සහ මහාධිකරණය සැමියාට පක්ෂව තීන්දු ලබාදුණි. කලත්‍ර හානිකරුට රුපියල් 500,000ක් සැමියාට වන්දි ගෙවන්න නියම විය.
ඉන් පසු කලත්‍ර හානිකරු ශ්‍රේෂ්ඨාධිකරණයට ගිය නමුත් ශ්‍රේෂ්ඨාධිකරණයත් කලින් තීන්දුව හරි යයි දන්වා තිබේ. ශ්‍රී ලංකාවේ කලත්‍ර හානිය (අනියම් ඇසුර) නීති විරෝධී වැරැද්දක් නොවුණත් ඒක දික්කසාදයකට හේතුවක් වෙනවානම් තමන්ගේ විවාහය කඩාකප්පල් කළ කෙනාගෙන් වන්දි ඉල්ලන්නත් පුළුවන් බව අධිකරණය දන්වා ඇත.
නීතිඥ පී. පෙරමුණුගම රංගනාත් පීරිස් සහ ජිත්මා අංජලී සමඟ සහ-විත්තිකරු වෙනුවෙන් පෙනී සිටියේය. ද සිල්වා සහ ද සිල්වා ආයතනය මගින් උපදෙස් ලත් නීතිඥ නයනජිත් ද සිල්වා විත්තිකරු වෙනුවෙන් පෙනී සිටියේය. පී. සුතන්තිරරාජ් මගින් උපදෙස් ලත් නීතිඥ වර්ධනී කරුණාරත්න හිරුනි සිල්වා සමඟ පැමිණිලිකරු වෙනුවෙන් පෙනී සිටියේය.
0 Comments