කොළඹ කොටුවේ ඉදිකිරීම් අත්හැර දමා ඇති මහල් 60කින් යුත් The One Trash works ක්‍රිෂ් ගොඩනැඟිල්ල මහජන පීඩාවක් සිදු නොවන අයුරින් පවත්වාගෙන යා යුතු බව කොටුව මහේස්ත්‍රාත් තනූජා ලක්මාලි මහත්මිය එම සමාගමේ අධ්‍යක්ෂ මණ්ඩලයට ඊයේ (13) නියෝගයක් නිකුත් කළාය.
කොන්දේසි සහිත ආඥාවක් නිකුත් කරමින් මේ බව කියා සිටි මහේස්ත්‍රාත්වරිය කිසිදු ද්‍රව්‍යයක් පහළට නොවැටෙන අයුරින් සහ මහජන පීඩාවක් නොවන අයුරින් එම ගොඩනැඟිල්ල පවත්වාගෙන යා යුතු වන බවත්, පහතට වැටෙන සහ වැටිය හැකි අබලි දිරා ගිය ද්‍රව්‍ය ඇත්නම් එම ද්‍රව්‍ය ඉවත් කරන ලෙසත් නියෝග කර සිටියාය.
යම් දේපළක් පහතට වැටීමෙන් මහජනතාව පීඩාවට පත්විය හැකි තත්ත්වයක් තිබේ නම් ඒ සඳහා සුදුසු වැඩපිළිවෙළක් යොදන ලෙසත් මේ කොන්දේසි සහිත ආඥාව නිකුත් කරමින් එම සමාගමේ අධ්‍යක්ෂ මණ්ඩලයට මහේස්ත්‍රාත්වරිය දන්වා සිටියාය.
එහිදී එම සමාගම වෙනුවෙන් නීතිඥ හෂිනි ඈපා මහත්මිය අධිකරණයට දන්වා සිටියේ දැනටමත් ඒ සම්බන්ධයෙන් කටයුතු කරමින් සිටින බවය. නීතිමය බාධාවක් තිබෙන නමුත් මහජන පීඩාවක් ඇති විය හැකි බැවින් ඒ සම්බන්ධයෙන් කටයුතු කරන බව කියා සිටි නීතිඥවරිය ලබන 27 දින අධිකරණයට කරුණු දක්වන බව ද කියා සිටියාය.
එම සමාගමේ පරිපාලන නිලධාරිනිය ඇතුළු අධ්‍යක්ෂ මණ්ඩල සාමාජිකයන් සිව්දෙනෙක් අධිකරණයේ පෙනී සිටියහ.
එම ගොඩනැඟිල්ල අනාරක්ෂිත බවට කොටුව පොලීසිය අධිකරණයට කළ කරුණු දැක්වීමට ලද නොතීසියක් අනුව එම සමාගමේ පරිපාලන නිලධාරිනිය ඇතුළු අධ්‍යක්ෂ මණ්ඩල සාමාජිකයන් ඊයේ විවෘත අධිකරණයේ පෙනී සිටියේය.
නිවාස සංවර්ධන අධිකාරියේ නිලධාරියකු, එම ගොඩනැඟිල්ලේ තහඩුවක් වැටුණු කාර් රථයේ හිමිකරු, රථ ගාලේ හිමිකරු, කඩ හිමිකරුවකු පොලීසිය කළ දැනුම් දීමකට අනුව අධිකරණයට පැමිණ තිබිණි.
ප්‍රශ්නගත එම සමාගමේ ගොඩනැඟිල්ල හේතුවෙන් විශාල මහජන පීඩාවක් සිදු වන බව කියමින් කොටුව පොලීසිය පසුගියදා (11) කොටුව මහේස්ත්‍රාත් තනූජා ලක්මාලි මහත්මිය හමුවේ කළ කරුණු දැක්වීමට අනුව සමාගමේ අධ්‍යක්ෂවරුන් අධිකරණය හමුවේ පෙනී සිටියේය.
ලංකා දණ්ඩ නීති සංග්‍රහයේ 98 වගන්තිය යටතේ කොටුව පොලීසිය එම කරුණු දැක්වීම සිදු කළේය.
පසුගිය ඔක්තෝබර් මස 06 වැනිදා එම ස්ථානයට ආසන්නයේ නවතා තිබූ මෝටර් රථයක් මතට එම ගොඩනැඟිල්ලේ යකඩ කොටසක් කඩා වැටුණු බවත් පසුගිය 08 වැනිදා රාත්‍රියේ ද එහි තිබූ යකඩ කොටසක් කඩා වැටුණු බවත් එම අවස්ථාවේ කාර්යාල සේවකයන් මෙන්ම රථවාහන ද එම ස්ථානයෙන් ගමන්ගත් බවත් පොලීසිය බී වාර්තාවක් මඟින් අධිකරණයට දන්වා සිටියේය.
(සුභාෂිණී සේනානායක)
0 Comments