අම්පාර කාර්තිව් මාවඩිපල්ලි පාලම අසලදී ට්‍රැක්ටර් රථයක් සැඩ පහරට හසුවීමේ සිද්ධිය සම්බන්ධයෙන් විමර්ශනවලට අදාළව අත්අඩංගුවට ගත් නින්දවූර් මද්‍රසා පාසලේ විදුහල්පතිවරයා සහ ගුරුවරයා ලබන 02දා දක්වා
රක්ෂිත බන්ධනාගාරගත කරන ලෙස සමන්තුරේ වැඩබලන මහේස්ත්‍රාත් ඒ.එල්. සබීර් අහම්ඩ් මහතා ඊයේ (28) නියෝග කළේය. මෙම සිද්ධිය සම්බන්ධයෙන් අධිකරණයට ඉදිරිපත් කළ ට්‍රැක්ටර් රථයේ සහායකයන් ලෙස කටයුතු කර තිබූ දෙදෙනා ඇපමත මුදාහැරීමට ද නියෝග කෙරිණි.
මෙලෙස රක්ෂිත බන්ධනාගාරගත කරනු ලැබුවේ මොහොමඩ් තකස්ලින් මොහොමඩ් අස්ලිම් සහ ගුරුවරයකු වන තව්ෆික් මොහොමඩ් නලීම් යන අයයි. ඇප මත මුදාහරිනු ලැබුවේ අබ්දුල් හමීඩ් මොහොමඩ් අහදීර් සහ මුහම්මදු මහරුප් මුහම්මදු හකිල් අප්නාන් නමැත්තන්ය.
මෙම සිසුන්ට ඉකුත් 26 වැනිදා පාසල නිම වීමෙන් පසු නිවෙස් බලා යෑමට බස් නැති නිසා එම ට්‍රැක්ටරයේ යන ලෙස උපදෙස් දී ඇත්තේ විදුහල්පතිවරයා විසින් බවට විමර්ශනවලදී හෙළිව තිබේ. බස් රථය ධාවනය කිරීම ද නතර කර ඇත්තේ ගංවතුර තත්ත්වය නිසා බව වාර්තා වී තිබේ.
මාර්ගය අවදානම් බැවින් ට්‍රැක්ටර් රථයෙන් දරුවන් ප්‍රවාහනය නොකරන ලෙස හමුදාව එහිදී උපදෙස් දී තිබූ බව ද වැඩිදුරටත් අනාවරණය වී ඇත.
මේ අතර ට්‍රැක්ටර් රථ අනතුරෙන් දියේ ගිලී අතුරුදන්ව සිටි රියැදුරුගේ මළ සිරුර ඊයේ (28) උදෑසන ගංවතුරේ තිබියදී සොයාගෙන තිබේ.
එමෙන්ම එම ට්‍රැක්ටරයේ සහායක ලෙස අනතුර සිදු වන අවස්ථාවේ කටයුතු කළ පුද්ගලයා ද මේ වන තෙක් අතුරුදන්ව සිටි අතර ඔහු ඊයේ (28) පෙරවරුවේ කාර්තිව් පොලිස් ස්ථානයට පැමිණ භාර වීමෙන් අනතුරුව අත්අඩංගුවට ගෙන ඇත. මෙම අනතුරින් පසු ඔහු පලා ගොස් සැඟවී සිට ඇති අතර ගංවතුර තත්ත්වය අතරතුර ආරක්ෂක අංශ උපදෙස් නොතකමින් අනතුරුදායක ලෙස ට්‍රැක්ටරයෙන් පුද්ගලයන් ප්‍රවාහනය කිරීමේ චෝදනා මත මොහු අත්අඩංගුවට ගෙන තිබේ.
රියැදුරුගේ සිරුරට අමතරව දියේ ගිලුණු තවත් සිසුවකුගේත් ට්‍රැක්ටරයේ ගමන් කළ පුද්ගලයකුගේත් මළ සිරුරු ඊයේ උදෑසන සොයාගත් බව කාර්තිව් පොලීසිය සඳහන් කළේය.
දියේ ගිලී අතුරුදන් වූ සිසුන් සිවු දෙනකුගේ සිරුරු පෙරේදා (27) සොයා ගත් අතර ඒ අනුව ඊයේ වන විට සිසුන් 05 දෙනකුගේත් රියැදුරුගේත් තවත් පුද්ගලයකුගේත් සිරුරු සොයාගෙන තිබිණි.
පොලීසිය පවසන්නේ මෙම අනතුරින් දියේ ගිලී මියගිය පුද්ගල මළ සිරුරු 07ක් සොයාගෙන ඇති බවත් සොයා ගැනීමට තවත් ඉතිරිව ඇත්තේ එක් සිසුවකුගේ මළ සිරුරක් පමණක් බවත් එම සිරුර ද සොයා විමර්ශන පැවැත්වෙන බවත් කාර්තිව් පොලීසිය සඳහන් කළේය. රියැදුරු අවුරුදු 19ක් පමණ වන අයකු බවත් ඔහුට රියැදුරු බලපත්‍ර නැති බවත් පොලිස් මාධ්‍ය ප්‍රකාශක නියෝජ්‍ය පොලිස්පති නීතිඥ නිහාල් තල්දූව මහතා කීය.
(ගයාන් කුමාර වීරසිංහ සහ අම්පාර විශේෂ - වසන්ත චන්ද්‍රපාල)
0 Comments