ගලිගමුව කොට්ඨාස අධ්‍යාපන කාර්යාලයට අයත් මහා විද්‍යාලයක විදුහල්පතිවර‍ෙයක් විශ්‍රාම ගැනීම නිමිත්තෙන් සංවිධානය කළ සාදයක් සදහා නීති විරෝධී මත්පැන් රැගෙන විත් පාසලේ ලාච්චුවක සඟවා ගෙන සිටි බව කියන උසස් පෙළ සිසුන් තිදෙනකු සිය භාරයට ගෙන අවවාද කර මුදාහැරි බව කෑගල්ල පොලීසිය කියයි.
එම විදුහලේ නියෝජ්‍ය විදුහල්පතිනිය විසින් සිදු කරනු ලැබූ දැනුවත් කිරීමට අදාළව ගොස් එම සිසුන් සහ අදාළ නීති විරෝධී මත්පැන් සිය භාරයට ගත් බව පොලීසිය සඳහන් කළේය.
පොලිස් භාරයට ගෙන මුදාහැර ඇති ශිෂ්‍යයින් තිදෙනා කෑගල්ල කලාප කාර්යාලයට අයත් ගලිගමුව කොට්ඨාස අධ්‍යාපන කාර්යාලය යටතේ පවත්වාගෙන යන මහා විද්‍යාලයක අධ්‍යයන පොදු සහතික පත්‍ර උසස් පෙළ විෂයන් හදාරමින් සිටින සිසුහු වෙති. අදාළ විද්‍යාලයේ විදුහල්පතිවරයා ඊයේ (12) විශ්‍රාම ගැනීමට නියමිතව තිබූ අතර, මොවුන් සාදයක් දැමීමට යැයි කියමින් මෙම මත්පැන් ගෙනැවිත් විද්‍යාලයේ පන්ති කාමරයක කබඩ් එකක සඟවා තිබී ඇතැයි පැවසේ.
නියෝජ්‍ය විදුහල්පතිනිය එම කඩබ් එක විවෘත කර පරීක්ෂා කිරීමේ දී පාසල් රැගෙන යන වතුර බෝතලයක තිබී නීති විරෝධී මත්පැන් සොයාගෙන තිබූ බවද පොලීසිය පවසයි.
පසුව කෑගල්ල පොලීසියේ ස්ථානාධිපති ප්‍රධාන පොලිස් පරීක්ෂක නාලක මාගෙදරගම මහතාගේ උපදෙස් පරිදි උප පොලිස් පරීක්ෂකවරයෙක් ගොස් දරුවන් තිදෙනා හා මත්පැන් බෝතලය පොලිස් භාරයට ගෙන කෑගල්ල මූලස්ථාන පොලිසිය වෙත රැගෙන පැමිණ තිබුණි. පසුව පොලීසිය ශිෂ්‍යයින්ගේ මවුපියන් පොලිසියට කැඳවා ඔවුන්ට කරුණු කාරණා පැහැදිලි කර ශිෂ්‍යයින් තිදෙනා මවුපියන්ට භාර දී ඇත.
(කෑගල්ල - චමින්ද ජයලත්)
0 Comments