ඇල්පිටිය, නවදගල ප්‍රදේශයේ පුද්ගලයකුට මන්නා පිහියකින් පහරදී කපා කොටා ඔහු ඝාතනය කිරීමේ සිද්ධිය සම්බන්ධයෙන් ඇල්පිටිය, නවදගල ප්‍රදේශයේම පුද්ගලයකු ඇල්පිටිය පොලිසිය පෙරේදා (19දා) අත්අඩංගුවට ගෙන තිබේ. මෙසේ අත්අඩංගුවට ගෙන ඇත්තේ ඇල්පිටිය, නවදගල පදිංචි ටී.එච්. ආසිරි (46) නමැති අයයි.
සැකකරුද සිද්ධියෙන් තුවාල ලබා ඇල්පිටිය මූලික රෝහලේ ප්‍රතිකාර ලබමින් සිටියදී පොලිසිය අත්අඩංගුවට ගෙන තිබෙන අතර ඔහු මේ වන විටත් පොලිස් අත්අඩංගුවේ සිටියදීම ඇල්පිටිය මූලික රෝහලේ ප්‍රතිකාර ලබයි.සිද්ධියෙන් මරණයට පත්ව ඇත්තේ නො. 67 සී, අක්කර 16, ෙදාළ ඉහළ, නවදගල, ඇල්පිටිය ලිපිනයේ පදිංචි කොඩිතුවක්කු අබේසිරි ගුණවර්ධන (63) නමැති අයයි.
මියගිය අයගේ මහෙස්ත්‍රාත් පරීක්ෂණය ඇල්පිටිය වැඩබලන මහෙස්ත්‍රාත් මුණිදාස හාල්පාන්දෙණිය මහතා විසින් පෙරේදා (19දා) සවස පවත්වන ලදී. මියගිය අයට අදාළ පශ්චාත් මරණ පරීක්ෂණය ඇල්පිටිය මූලික රෝහලේ අධිකරණ වෛද්‍ය නිලධාරිවරයා විසින් පැවැත්වීමට නියමිතව තිබිණි.
ඝාතනයට ලක් වූ අය ඇල්පිටිය, නවදගල සිය නිවස ආසන්නයේ වෙළෙඳසලක් පවත්වාගෙන යන බවත් එම වෙළෙඳසලට පැමිණි සැකකරු විසින් මන්නා පිහියකින් පහර දීමෙන් මෙම මරණය සිදුව තිබෙන බවත් ඇල්පිටිය පොලිසිය කියයි. සැකකරු වෙළෙඳසලට පැමිණි අයෙකු සමඟ බහින්බස් වීමක් ඇතිකර ගෙන පරුෂ වචන කියමින් ඔහුට බැණ වැදී තිබෙන බවත් මරණයට පත් වූ අය සිය වෙළෙඳසල අසල පරුෂ වචන නොකියන ලෙස සැකකරුට පවසා තිබෙන බවත් පොලිස් පරීක්ෂණවලදී තහවුරු වී තිබේ. පසුව සැකකරු මරණකරු සමඟද ආරවුලක් ඇතිකර ගෙන තිබෙන බවත් එයින් පසු සැකකරු ඔහුගේ නිවසට ගොස් මණ්නා පිහියක් රැගෙන පැමිණ මරණකරුට පහරදී තිබෙන බවත් පොලිස් පරීක්ෂණවලදී තහවුරු වූයේ යැයි ඇල්පිටිය පොලිසියේ ප්‍රකාශකයෙක් සඳහන් කළේය.
මරණකරුගේ බෙල්ලේ, පපුවේ හා බඩ ප්‍රදේශයේ කැපුම් තුවාල තිබෙන බවද පොලිස් පරීක්ෂණවලදී තහවුරු වී තිබේ. සිද්ධියෙන් බරපතළ තුවාල ලැබූ මරණකරු ඇල්පිටිය මූලික රෝහලට ඇතුළත් කිරීමට ඥාතීන් හා ප්‍රදේශවාසීන් කටයුතු කර තිබෙන බවද ඇල්පිටිය පොලිසිය කියයි. ඇල්පිටිය පොලිසියේ අපරාධ අංශයේ ස්ථානාධිපති පොලිස් පරීක්ෂක අතුකෝරල, පොලිස් සැරයන් ගුණරත්න (28812) යන නිලධාරීන් ඇතුළු පිරිසක් වැඩිදුර පරීක්ෂණ පවත්වයි.
බළපිටිය – දම්සරී ලියනගේ
0 Comments