නව­වැනි මහ­ලෙන් බිමට වැටී ඉංජි­නේරු සිසු­ තරු­ණ­යකු මිය­යෑම අභිරහසක්

“අපි­ දෙන්නා ගේ ඇතුළේ කතා කර කර ඉන්න කොට කට්ටි­යක් ගෙදර දොරට කල­බ­ලෙන් තට්ටු කළා. මං එයාට කිව්වා හැංගෙන්න කියලා. එයා බැල්ක­නි­යට ගිහින් හැංගුණා. පස්සේ මං සාලෙට ගිහින් ජනේල ඇරලා තට්ටු කළේ කවුද කියා ඇහුවා. 'මං රෝස් ඇන්ටි දොර අරින්න කියලා කිව්වා' මං දොර බාගෙට ඇරි­යම ඒ ඇන්ටි මාවත් තල්ලු කරන් තව 4 දෙනෙක් එක්ක ගේ ඇතු­ළට ආවා. ඇවිත් ගේ ඇතුළේ පරීක්ෂා කළා. පස්සේ බැල්ක­නිය ළඟ තියෙන ජනේල අරිද්දි ඇන්ටි බැල්ක­නියේ හැංගිලා හිටිය එයාව දැක්කා. අපි දෙන්නට ජරා වච­න­ව­ලින් බැන්නා. ඒ වේලාවේ ම මොකක් හරි ලොකු දෙයක් වැටෙන සද්ද­යක් එක­පා­රට ඇහුණා. ගිහින් බලද්දි එයා බිමට වැටිලා සිටියා” යැයි මාලි­ගා­වත්ත ලක්‍හිරු සෙවණ නිවාස සංකී­ර්ණයේ නව වන මහ­ලෙන් බිමට වැටී ඉංජි­නේරු සිසු­වෙක් මිය­යෑම සම්බ­න්ධ­යෙන් වූ මරණ පරී­ක්ෂ­ණ­යේදී සාක්ෂි දෙමින් සිසු­වාගේ පෙම්ව­තිය වන මුජි­බර් ෆාතිමා මුස්නා එසේ පැව­සු­වාය.

මෙලෙස මිය­ගොස් ඇත්තේ රෝහල පාර, සයි­න්ද­ම­රුදු-10 ප්‍රදේ­ශයේ පදිං­චිව සිටි ජබ්බාර් අහ්මද් ජෆිස් නම් 21 හැවි­රිදි සිවිල් ඉංජි­නේරු ශිෂ්‍ය­යෙකි.

තම පෙම්ව­ති­යගේ පවුලේ සාමා­ජි­ක­යන් පවුලේ ව්‍යාපාර කට­යුතු සඳහා හම්බ­න්තොට ප්‍රදේ­ශ­යට ගොස් සිටි අව­ස්ථාවේ ඇයව හොර රහසේ මුණ­ගැ­සී­මට පසු­ගිය 10 වැනිදා පාන්දර 1.30ට පමණ මිය­ගිය තැනැත්තා මාලි­ගා­වත්ත ලක්හිරු සෙවණ මහල් සංකී­ර්ණයේ නව­වන මහලේ පිහිටි ඇගේ නිවෙ­සට ගොස් ඇත. එම අව­ස්ථාවේ අස­ල්වැසි නිවැ­සි­යන්ට බිය වී බැල්ක­නියේ එල්ලී සැඟවී සිටිය දී හදි­සියේ අත ලිස්සා නව­වන මහ­ලෙන් බිමට වැටී මෙම තරු­ණයා රෝහ­ල්ග­තව ප්‍රති­කාර ලබ­න­මින් සිටි­යදී ඊයේ දින මිය ගොස් ඇත.

මෙම සිසු­වාගේ මර­ණය සම්බ­න්ධ­යෙන් වූ සාක්ෂි විභා­ගය ඊයේ දින කොළඹ නාග­රික මරණ පරී­ක්ෂණ උසා­වියේ කොළඹ ජාතික රෝහලේ හදිසි මරණ පරී­ක්ෂක එම්. අෂ්රෆ් රූම් මහතා ඉදි­රියේ පැවැ­ත්විණි.

මර­ණය සම්බ­න්ධ­යෙන් සාක්ෂි දෙමින් සාක්ෂි­කා­රිය මෙසේද පැව­සු­වාය.

“මිය­ගිය කෙනා මගේ යාළුවා. මාස 05ක්‌ තිස්සේ අඳු­ර­නවා. එයත් එක්ක යාළු වෙලා මාස­යක් වෙන්නේ. මගේ ගෙදර ඉන්නේ මමයි, අක්කයි, තාත්තයි. එයාල දෙන්නා පවුලේ ව්‍යාපා­රය ගැන බලන්න ඕනේ කියලා හම්බ­න්තොට ගිහින් තිබුණා. ඒ නිසා මේ මාසේ 09 වැනිදා මං අහ්මද්ට කිව්වා මාව බලන්න අපේ ගෙදර එන්න කියලා. එයා දවල් 1.30ට වගේ අපේ ගෙද­රට ආවා. එළි­යෙන් එයාගේ සෙරප්පු දෙක ගල­වල තමා ඇතු­ළට ආවේ. එහා ගෙදර ඉන්න ඇන්ටි ඒ සෙ‍ෙරප්පු දෙක දැකල අපේ ගෙදර බෙල් එක ගැහුවා.

මගෙන් ඇහුව කාගෙද මේ සෙ‍ෙරප්පු දෙක කියලා. මං දන්නේ නැහැ කිව්වා. පස්සේ එයා ඒකෙන් එක සෙ‍ෙර­ප්පු­වක් අරන් ගිහින්.

පස්සේ අහ්මද් සවස 4.30ට ගෙදර යන්න හදද්දි දැක්කේ සෙර­ප්පු­වක් අඩුයි කියලා. මං එයාට අපේ අක්කගේ සෙර­ප්පු­වක් දුන්න දාගෙන යන්න. එයා ගිහින් ටික වේලා­ව­කට පස්සේ මං රෙදි වග­යක් ගන්න එළි­යට ගියාම අල්ලපු ගෙදර ඇන්ටිගේ ගෙදර ගාව නැති වුණ සෙරෙ­ප්පුව තියෙ­නවා දැක්කා. මං අහ්මද්ට රෑ 10ට වගේ කෝල් එකක් දීලා කිව්වා සෙ‍ෙර­ප්පුව තියෙ­නවා එන්න ගන්න කියලා. එයා කිව්වා එන්නම් ආයේ හම්බෙන්න වෙන්නෙත් මාස 04 පස්සේ. ඒ නිසා මට නිදා­ගන්න එපා කියලා එයා පාන්දර 1.30ට වගේ අපේ ගෙදර ආවා. අපි දෙන්න කතා කර කර ඉද්දි කල­බ­ලෙන් කට්ටි­යක් ගෙදර දොරට ගැහුවා. මං කිව්වා එයාට ටග්ගාලා හැංගෙන්න කියලා. එයා බැල්ක­නි­යට ගිහින් හැංගුණා. මං සාලෙට ගිහින් ජනේල ඇරලා කවුද දොරට ගහන්නේ කියලා ඇහුවා. ' මං රෝස් ඇන්ටි දොර අරින්න කිව්වා'. මං බාගෙට දොර ඇරි­යම මෙයා තව ගැහැනු තුන්දෙ­න­කුයි තව පිරිමි කෙනෙක් එක්ක මාවත් තල්ලු කරන් ගේ ඇතු­ළට ඇවිත් ඇඳ යට කාමරේ ඇතුළේ නාන­කා­ම­රයේ වගේ හැම තැනම පරීක්ෂා කළා පස්සේ බැල්ක­නියේ ජනේල අරිද්දි ඇන්ටි අහ්මද්ව දැක්ක. එයා අපි දෙන්න­ටම ජරා වච­න­ව­ලින් බණින්න පටන් ගත්තා. ඒ වේලා­වේම ලොකු සද්ද­යක් ඇහුණා. ටක­ර­මක් උඩට මොකක් හරි බර දෙයක් වැටෙන සද්ද­යක්. පස්සේ බලද්දි එයා බිම වැටිලා ඉන්නවා දැක්කා.”

මිය­ගිය සිසු­වාගේ පියා මේ සම්බ­න්ධ­යෙන් සාක්ෂි දෙමින් මෙසේ පැව­සීය.

“මට දරුවෝ 4 දෙනෙක් ඉන්නවා.

ඒ හැමෝම පිරිමි ළමයි. නැති වුණේ මගේ වැඩි­ම­හල් පුතා. එයා සිවිල් ඉංජි­නේරු පාඨ­මා­ලා­වක් කර­නවා. ඒ නිසා එයා කොළඹ වෙන ගෙද­රක නැව­තිලා ඉන්නේ. මේ ගිය 10 වැනිදා පාන්දර 2.30 වගේ වයිෆ් මට කෝල් කරලා කිව්වා අපේ පුතා මහල් නිවා­ස­යක උඩ ඉඳන් බිමට වැටිලා කියලා. මං ඒ වේලාවේ සෞදි අරා­බියේ හිටියේ. ලංකා­වට එන්න පුළු­වන් වුණේ සිද්ධිය වෙලා දවස් දෙක­කට පස්සේ. ඒ වේලාවේ පුතාව බලන්න ආවාම පුතා සිහිය නැතුව හිටියේ. පුතා එයාගේ පෙම්ව­තිය බලන්න ගිහින්. ඒ වේලාවේ අල්ලපු ගෙදර කෙනා ආපු නිසා පුතා බය වෙලා බැල්ක­නියේ හැංගිලා. පුතා හැංගිලා ඉන්න එක දැකලා අල්ලපු ගෙදර කෙනා බැණලා. ඒ වේලාවේ තමයි මගේ පුතා බිමට වැටිලා තියෙන්නේ. දිග­ටම දැඩි­ස­ත්කාර ඒක­කයේ ඉඳල 20 වැනි දා උදේ 3.20ට තමා එයා මිය­ගියේ”.
(දෙව්නි මහ­ග­මගේ)