අම්පාර දිස්ත්‍රික්කයේ කාර්තිව් ප්‍රදේශයේ ඊයේ (26) සවස සිදුවූ බරපතල අනතුරකින් පාසල් සිසුන් හය දෙනෙකු ඇතුළු පුද්ගලයින් අට දෙනෙකු අතුරුදන් වී ඇති බව පොලීසිය වාර්තා කරයි.
නින්දවූර් මද්‍රසා පාසලේ සිට නිවෙස් බලා යමින් සිටි පිරිමි ළමුන් එකොළොස් දෙනෙකු රැගත් ට්‍රැක්ටර් රථයක් කාර්තිව් බස් නැවතුම්පොල අසල පාලම ළඟදී ගංවතුරට හසුවී පෙරළී ගොස් ඇත.
මෙම අනතුරින් ළමුන් පස් දෙනෙකු පමණක් දිවි ගලවා ගැනීමට සමත් වී තිබේ.
පොලිස් වාර්තා අනුව, අතුරුදන් වී ඇති දරුවන් සියල්ලන්ම අවුරුදු 12 සිට 16 දක්වා වයස් කාණ්ඩයේ සමන්තුරය ප්‍රදේශයේ පදිංචිකරුවන් වේ. ට්‍රැක්ටර් රථයේ රියදුරු සහ ඔහු සමඟ ගමන් කළ තවත් පුද්ගලයෙකුද අතුරුදන්වූවන් අතර සිටිති.
"දැඩි ගංවතුර තත්ත්වය හේතුවෙන් මෙම අනතුර සිදුව ඇති බව මූලික විමර්ශනවලින් හෙළි වී තිබෙනවා," යැයි කාර්තිව් පොලිස් ස්ථානාධිපතිවරයා පැවසීය.
පොලීසිය සහ ප්‍රදේශවාසීන් එක්ව අතුරුදන් වූවන් සොයා ගැනීමේ මෙහෙයුම් මේ වන විටත් ක්‍රියාත්මක කරමින් සිටින අතර, අධික වර්ෂාව හේතුවෙන් සෙවීම් කටයුතු දුෂ්කර වී ඇති බව වාර්තා වේ.
මේ අතර, පොලීසිය ප්‍රදේශවාසීන්ගෙන් ඉල්ලා සිටින්නේ අයහපත් කාලගුණික තත්ත්වය පවතින විට අත්‍යවශ්‍ය නොවන ගමන් බිමන්වලින් වැළකී සිටින ලෙසයි.
0 Comments