තෙල්දෙණිය පොලිස් වසමේ දිගන අයි.සී.සී. නිවාස සංකීර්ණයේ තිබී සොයාගත් ව්‍යාජ අංක තහඩු යෙදූ කොටස් එකලස් කළ බව කියන ජීප් රථය සන්තකයේ තබාගෙන සිටි බව කියන මහනුවර ගාල්තැන්න දේවාලයේ දේවගැතිවරයා 18 වැනිදා දක්වා තවදුරටත් රක්ෂිත බන්ධනාගාරගත කරන ලෙස තෙල්දෙණිය මහෙස්ත්‍රාත් දිසා විනිසුරු දේවිකා චතුරාංගනි ජයවර්ධන මහත්මිය ඊයේ (12) නියෝග කළාය.
මෙලෙස තවදුරටත් රක්ෂිත බන්ධනාගාරගත කරනු ලැබුවේ ගාමිණී ආනන්ද නොහොත් ගාල්තැන්න දේවාලයේ කපුමහතාය. මේ සුඛෝපභෝගි වාහනය සන්තකයේ තබාගෙන එකලස් කිරීම සම්බන්ධයෙන් සැකකරුට එරෙහිව චෝදනා එල්ල වන බව මෙහිදී පොලීසිය අධිකරණයට දැනුම් දුන්නේය. රුපියල් කෝටි හතරක පමණ වටිනාකමකින් යුත් මේ මිටිසුබිෂි වර්ගයේ සුදු පැහැති ජීප් රථය ඉකුත් 31 දින දිගන අයි.සී.සී. නිවාස සංකීර්ණයේ නිවෙසක තිබී සොයාගත් බව තෙල්දෙණිය පොලීසිය අධිකරණයට කරුණු ඉදිරිපත් කළේය.
දිගන නිලගමට ආසන්ව පිහිටි අයි.සී.සී. නිවාස සංකීර්ණයේ නිවෙසක ගරාජයේ තිබී සොයාගත් මේ වාහනයේ සවි කර තිබුණු අංක තහඩුව සම්බන්ධයෙන් කළ විමර්ශනවලදී එය මහනුවර පිලවල ප්‍රදේශයේ පදිංචි කාන්තාවකට අයත් රතු පැහැති ප්‍රාඩෝ වර්ගයේ රථයකට අයත් එකක් බව අනාවරණය වූ බවද පොලීසිය අධිකරණයට දැනුම් දුන්නේය. ඒ ව්‍යාජ අංක තහඩු භාවිත කරමින් මේ ජීප් රථය ධාවනය කර ඇතැයි පරීක්ෂණවලදී සොයාගත් බව ද පොලීසිය අධිකරණයට දැනුම් දුන්නේය.
සැකකරු වෙනුවෙන් නීතිඥ මනිලාල් වෛද්‍යතිලක, නීතිඥ සරත් ප්‍රේමකුමාර, නීතිඥ ජගත් උඩගෙදර යන මහත්වරු පෙනී සිටිමින් ඇප ඉල්ලා සිටියහ.
(කරල්ලියද්ද - කේ. විජේසිරි නිශ්ශංක)
0 Comments