හක්මන ගංගොඩගම සමෘද්ධි බැංකුවේ සේප්පුව කඩා රුපියල් අටලක්ෂ පනස් හයදහස් හයසිය අසූනවයක් වටිනා දේපළ සොරකම් කළ පුද්ගලයන් දෙදෙනකු යතුරුපැදි දෙකක් ද සමඟ පෙරේදා (11) අත්අඩංගුවට ගත් බව හක්මන පොලිසිය පවසයි.
මෙම සැකකරුවන් දෙදෙනා ඉකුත් 08 වැනි දින රාත්‍රී සමෘද්ධි බැංකුවේ වහලයෙන් බැංකුවට ඇතුළු වී එහි තිබූ සේප්පුව කපා මුදලින් රුපියල් හාරලක්ෂ හැටනව දහස් හයසිය අසූ නවයක් සහ ලැප්ටොප් පරිඝණකයක් මෙන්ම මේස පරිගණයක් මෙලෙස සොරකම් කර ඇති බවට තොරතුරු අනාවරණය වන බව පොලිසිය කියයි. අත්අඩංගුවට ගත් සැකකරුවන් දෙදෙනාගේ සහ ඔවුන්ගේ හිතවතුන්ගේ නිවෙස්වල තිබී සොරකම් කරන ලද දේපළ සහ මුදල් ද, සේප්පුව කැපීම සඳහා භාවිත කළ උපකරණ ද පොලිසිය සොයාගෙන තිබේ.
එහිදී බෙලිඅත්ත ප්‍රදේශයේ සමෘද්ධි බැංකුව කඩා සොරකම් කළ පරිගණයක්ද හමුවී තිබේ.
අත්අඩංගුවට ගත් සැකකරුවන් කිරින්ද ඕවිටිගමුව ප්‍රදේශයේ පදිංචි අය වන අතර, ඔවුන් එකම පවුලේ සාමාජිකයන් බවට හඳුනාගෙන තිබේ.
දකුණු පළාත් භාර ජ්‍යෙෂ්ඨ නියෝජ්‍ය පොලිස්පති මහේෂ් සේනාරත්න තංගල්ල හා මාතර දිසා භාර ජ්‍යෙෂ්ඨ නියෝජ්‍ය පොලිස්පති නිශාන්ත ද සොයිසා මහතාගේ සහ මාතර කොට්ඨාසය භාර ජ්‍යෙෂ්ඨ පොලිස් අධිකාරි පන්ඩුල විරසිංහ යන මහත්වරුන්ගේ උපදෙස්මත සහකාර පොලිස් අධිකාරි මාතර එක ජී.එස්. ජයසුන්දර මහතාගේ අධීක්ෂණයෙන් හක්මන පොලිස් ස්ථානාධිපති ප්‍රධාන පොලිස් පරීක්ෂක ඩබ්ලිව්.පී.ඒ. සනත් කුමාර මහතාගේ මෙහෙයවීමෙන් උප පොලිස් පරීක්ෂක ඒ. පී. ජයසේන පොලිස් සැරයන්වරුන් වන 75363 සම්පත්, 40804 ජයසේකර, 72962 කුමාර, පොලිස් කොස්තාපල්වරුන් වන 29538 මධුෂංක, 96510 දර්ශන, 97648 ප්‍රනාන්දු, 99147 සූරිආරච්චි, 86387 රත්නප්‍රිය, 89414 සම්පත්, 15401 සංජීව යන නිලධාරීහු වැඩිදුර විමර්ශන සිදුකරති.
(වැලිගම - අබේවික්‍රම ගුණරත්න)
0 Comments