බස් රථයක ගමන් කරමින් සිටි කාන්තාවකගේ ගෙල බැඳි රුපියල් ලක්ෂයක් පමණ වටිනා රන් මාලය කඩාගෙන පලායෑමට උත්සාහ ගත් තරුණ කාන්තාවක් කහවත්ත නගරයේදී අල්ලාගෙන තිබේ.
කහවත්ත නගරයේ ලංකා බැංකුව අසල පෞද්ගලික බස් රථ වේලා සටහන්කරු ලෙස කටයුතු කරන උපුල් රෝහිත බණ්ඩාර මහතා මෙම සැකකාරිය පලායද්දී අල්ලාගෙන තිබිණ. පෙරේදා (11) උදෑසන රත්නපුර, රක්වාන පෞද්ගලික බසයක සිටි කාන්තාවකගේ ගෙල බැඳි රන් මාලය බසයේ සෙනඟ අතරේදී මෙම කාන්තාව විසින් කඩාගනු ලැබ ඇති අතර,
මගී කාන්තාව තමාගේ රන් මාලය කිසියම් අයකු කඩා ගත් බව කියමින් කෑ ගසා තිබේ. ඒ අවස්ථාවේ බස් රථය කහවත්ත නගරයේ මගීන් නංවා ගැනීමට නවතා තිබුණු අතර, බසයෙන් බැස යන එක් කාන්තාවක් ගැන කොන්දොස්තරවරයාට ඇතිවූ සැකය මත ඔහු වේලා සටහන්කරුට ඒ බව පවසද්දී ඔහු වහා සැකකාරිය අල්ලාගෙන තිබේ. සැකකාරිය කහවත්ත පොලීසියට භාර දුන් අතර, ඇය සමඟ තවත් කතුන් තිදෙනකු පැමිණි බවත්, ඔවුන් පලාගොස් ඇති බවත් පොලීසිය පැවැසීය.
මෙම කාන්තාවන් සිවු දෙනා මගී ප්‍රවාහන බස් රථවලට නැඟ මුදල් පසුම්බි සහ රන් ආභරණ සොරකමේ යෙදෙන බව පොලිසිය කීය. එක් අයකු සොරාගන්නා දේ තවත් අයකු අතට පත් කර සූක්ෂ්ම ලෙස මෙම කාන්තාවන් මෙම කොල්ලකෑම්වල නිරත වන බවත්,
ඔවුන් සාස්තර කියන මුවාවෙන් වෙනත් ප්‍රදේශයක සිට පැමිණි අය බවත් ප්‍රදේශවාසීහු පවසති.
(කහවත්ත - ලසන්ත නිරෝෂණ පෙරේරා)
0 Comments