මන්නාරම රෝහලේදී දරු ප්‍රසූතියේදී මියගිය මවගේ හා දරුවාගේ මරණ සම්බන්ධයෙන් පරීක්ෂණ මන්නාරම රෝහලේදීම පැවැත්වීමට එරෙහිව ප්‍රදේශවාසීන් පන්සියයකට වැඩි පිරිසක් රෝහලට කඩාවැදී පෙරේදා (20) විරෝධතාවක නිරත වූහ. පළාතේ ආගමික නායකයන්ගේද සහාය ඇතිව දැඩි වර්ෂාව මධ්‍යයේ පැමිණි මේ පිරිස රෝහල් භූමියේ සිට කෑ කෝ ගසමින් මියගිය කාන්තාවට හා දරුවාට සාධාරණය ඉටු කර දෙන්නැයි ඉල්ලා සිටියහ.
මන්නාරම රෝහලට කඩාවැදුණු පිරිස පාලනය කිරීමට මන්නාරම පොලීසියේ නිලධාරින්ට දැඩි අපහසුතාවක් ඇති වූ අතර, පොලීසිය හා රෝහලේ පාලන අධිකාරිය සාකච්ඡා කිරීමෙන් පසුව ගත් තීරණ කීපයක් මත ජනතාව මන්නාරම රෝහල් භූමියෙන් ඉවත්ව ගියහ.
මන්නාරම දිස්ත්‍රික් මහ රෝහලේදී පසුගිය19 දින රාත්‍රියේ ගැබිණි මවක්, නූපන් දරුවා සමඟ මියයාම රෝහලේ නොසැලකිල්ල මත සිදුවූ බවට පැවති විරෝධතාවයකින් පසු සිද්ධිය සම්බන්ධයෙන් සෞඛ්‍ය ඇමතිද මැදහත්වී අමාත්‍යාංශය පරීක්ෂණයක් සිදුකරමින් පවතී.
මන්නාරම, පට්ටිතෝට්ටම් ප්‍රදේශයේ පදිංචි අවුරුදු 10ක් දරුවන් නොමැතිව සිටි 27 හැවිරිදි තරුණ මවක් මන්නාරම දිස්ත්‍රික් මහ රෝහලේ මාතෘ වාට්ටුවට ඇතුළත් කර ප්‍රතිකාර ලබමින් සිටියදී මව සහ නූපන් දරුවා මියගොස් ඇත. මියගිය දරුවා පිරිමි දරුවෙකි. වනජා නමැති තරුණ මව මිය ගියේ
හුස්ම ගැනීමේ අපහසුවකින් පෙළී සිට බව හෙළිව ඇති අතර ඇයට එම අවස්ථාවේ නිසි ප්‍රතිකාර ලබා නොදීම නිසා එම කාන්තාව සිසේරියන් සැත්කමක් කරන ලෙස ඉල්ලා තිබෙන බව කියැවේ.
නමුත් එය පිළිනොගෙන වෛද්‍යවරුන් ස්වභාවිකව දරු ප්‍රසූතිය සිදු කිරීමට උත්සාහ කිරීමේදී මව සහ දරුවා මිය ගිය බව වාර්තා වේ.
වෛද්‍යවරුන්ගේ සහ හෙද නිලධාරීන්ගේ නොසැලකිල්ල හේතුවෙන් මෙම මරණය සිදුව ඇති බවත්, මරණය පිළිබඳ කාරණය දීර්ඝ වේලාවක් යනතුරු ඥාතීන්ට වසන් කළ බවත්, මියගිය කාන්තාවගේ දේහය බැලීමට දෙමාපියන්ට ඉඩ නොදුන් බවත් ඥාතීන් චෝදනා කර තිබේ.
රෝහලේ සේවය කරන කාර්ය මණ්ඩලය නිරතුරුව නොසැලකිලිමත් ලෙස ක්‍රියා කරන බවත්, වැඩ කරන වේලාවේ ටෙලි නාට්‍ය නරඹන බවත්, වැඩිපුර දුරකථන භාවිත කරන බවත්, මාතෘ රෝහල තුළ සිටින බල්ලන්ට පව‍ා ඔවුන් නොසලකන බවත් දරු ප්‍රසූතියට ඇතුළත් වූ කාන්තාවන් චෝදනා කර තිබේ.
මියගිය දෙදෙනා සම්බන්ධයෙන් වූ සියලු වෛද්‍ය පරීක්ෂණ යාපනය ශික්ෂණ රෝහලේදී පැවැත්වීමට තීරණය කර ඇති අතර, මේ සිද්ධිය සම්බන්ධයෙන් සෞඛ්‍ය අමාත්‍යාංශයෙන් ඍජු පරීක්ෂණයක් හා පළාත් සෞඛ්‍ය අමාත්‍යාංශය මට්ටමින් තවත් පරීක්ෂණයක් පැවැත්වීමටත් තීරණය වී තිබේ.
එම පරීක්ෂණවලදී යම් අයකු වරදකරුවකු වුවහොත් ඔහුගේ තරාතිරම නොබලා දඬුවම් කිරීමට පළාත් සෞඛ්‍ය අමාත්‍යාංශය එකඟ වී ඇති අතර, සිද්ධිය සම්බන්ධයෙන් පරීක්ෂණ පැවැත්වීම පිණිස විශේෂ කමිටුවක්ද පත් කර තිබේ.
ඒ අනුව මියගිය මවගේ හා ප්‍රසූත කළ දරුවාගේ මෘත ශරීර වැඩිදුර පරීක්ෂණ කටයුතුවලට යාපනය ශික්ෂණ රෝහල වෙත දැඩි ආරක්ෂාව මැද රැගෙන ගොස් තිබේ.
මියගිය කාන්තාව දරුවා ප්‍රසූත කිරීමට ආසන්නයේදී කෑ ගැසුවත් වාට්ටුවේ රූපවාහිනිය නරඹමින් හා ජංගම දුරකතන භාවිත කරමින් සිටි හෙදියන් හා අනෙක් කාර්ය මණ්ඩලය ඒ ගැන කිසිම තැකීමක් නොකළ බවට ද ජනතාවගෙන් චෝදනා එල්ල වී තිබේ.
(රසුල දිල්හාර ගමගේ)
0 Comments