දස වැනි පාර්ලිමේන්තුවේ පළමු සභා වාරය අද (21) පෙරවරු 10.00ට උත්සවාකාරයෙන් ආරම්භ කෙරේ. පාර්ලිමේන්තුවේ ප්‍රථම සභා වාරය ආරම්භ කිරීම සඳහා පෙරවරු 9.55ට ගණපූර්ණ සීනුව නාද කිරීමෙන් අනතුරුව පෙරවරු 10.00ට පාර්ලිමේන්තුව රැස්වේ.
වේත්‍රධාරි කුෂාන් ජයරත්න මහතා විසින් සෙංකෝලය සභා ගර්භයේ තැන්පත් කිරීමෙන් පසුව පාර්ලිමේන්තුව රැස් වන දිනය හා වෙලාව නියම කරමින් ජනාධිපතිවරයා විසින් නිකුත් කරන ලද අතිවිශේෂ ගැසට් නිවේදන පාර්ලිමේන්තුවේ මහලේකම් කුෂාණි රෝහණධීර මහත්මිය විසින් දිනයේ පළමු කාර්යය ලෙස සභාවට ඉදිරිපත් කිරීම සිදු කෙරේ.
ඉන්පසුව කථානායකවරයා තෝරාගැනීම සිදු වන අතර, ආණ්ඩුක්‍රම ව්‍යවස්ථාවේ 64 (1) ව්‍යවස්ථාව සහ පාර්ලිමේන්තු ස්ථාවර නියෝග 4, 5 සහ 6හි විධිවිධාන ප්‍රකාරව අනුපිළිවෙළින් කථානායකවරයා තෝරා පත්කර ගැනීම, කථානායක නිල ප්‍රතිඥාව හෝ දිවුරුම ලබාදීම, මන්ත්‍රීවරයන් විසින් නිල ප්‍රතිඥාව හෝ දිවුරුම ලබාදීම, නියෝජ්‍ය කථානායක සහ නියෝජ්‍ය කාරක සභා සභාපතිවරයා තෝරාපත් කර ගැනීම සිදු කිරීමට නියමිතය.
දසවන පාර්ලිමේන්තුව ආරම්භ වන ප්‍රථම දිනය වන අද (21) මන්ත්‍රීවරුන්ට ආසන පැනවීමේ පිළිවෙළක් නැති අතර කැමති ආසනයක අසුන් ගැනීමේ අවස්ථාව ලැබීම විශේෂත්වයකි.
මෙම මූලික කටයුතු අවසානයේ පාර්ලිමේන්තුව තාවකාලිකව අත්හිටුවීම සිදු වන අතර, ආණ්ඩුක්‍රම ව්‍යවස්ථාවේ 32 (4) සහ 33 ව්‍යවස්ථාවල විධිවිධාන ප්‍රකාරව පෙරවරු 11.30ට ජනාධිපති අනුර කුමාර දිසානායක මහතා සභාවේ මුලසුනේ සිට ආණ්ඩුවේ ප්‍රතිපත්ති ප්‍රකාශය පාර්ලිමේන්තුවට ඉදිරිපත් කිරීමට නියමිතය.
දසවැනි පාර්ලිමේන්තුවේ සමාරම්භක රැස්වීමට සහභාගි වීම සඳහා, පෙරවරු 9.00 පමණ වන විට පාර්ලිමේන්තු සංකීර්ණයට පැමිණෙන ලෙස සියලු මන්ත්‍රීවරුන්ට පාර්ලිමේන්තුවේ මහලේකම් කුෂාණි රෝහණධීර මහත්මිය දැනුම් දී ඇත.
පාර්ලිමේන්තුව කරා පැමිණීමෙන් පසු මන්ත්‍රීවරුන්ගේ රථ පොලිස් නිලධාරින් විසින් නියමිත රථගාලට යොමු කරන බවත් ඉන්පසුව පාර්ලිමේන්තුවේ ප්‍රවේශ ශාලාවට පැමිණ ගණපූර්ණ සීනුව නාද කරන තෙක් මන්ත්‍රීවරුන් එහි රැඳී සිටි යුතු වේ.
පාර්ලිමේන්තු මන්ත්‍රීවරු සිය කාලත්‍රයා සමඟ පැමිණෙන්නේ නම්, පාර්ලිමේන්තුවේ කාර්ය මණ්ඩල ප්‍රවේශ ද්වාරය අබියසදී සිය රථවාහනවලින් බැසිය යුතු බවත් අනෙකුත් සියලු මන්ත්‍රීවරුන් මන්ත්‍රී ප්‍රවේශ ද්වාරය අබියසදී සිය රථවලින් බැසිය යුතු බවටත් මන්ත්‍රීවරුන්ට දැනුම් දී ඇත.
දස වැනි පාර්ලිමේන්තුවේ සමාරම්භයෙන් පසුව ජනාධිපති අනුර කුමාර දිසානායක මහතා විසින් සිය ආණ්ඩුවේ ප්‍රතිපත්ති ප්‍රකාශය සිදු කිරීමට නියමිත බැවින් පාර්ලිමේන්තුවෙහි විශේෂ ආරක්ෂිත වැඩපිළිවෙළක් ද ක්‍රියාත්මක කර ඇත.
දස වැනි පාර්ලිමේන්තුවේ පළමු සභා වාරය ආරම්භ කිරීමෙන් පසුව, ජනාධිපති අනුර කුමාර දිසානායක මහතා විසින් පෙරවරු 11.30ට පමණ ආණ්ඩුවේ ප්‍රතිපත්ති ප්‍රකාශනය හෙවත් රාජාසන කතාව සිදුකිරීමට නියමිතය.
දස වැනි පාර්ලිමේන්තුවේ මංගල සභා රැස්වීම චාම් උත්සවයක් ලෙස පැවැත්වීමට ජනාධිපති අනුර කුමාර දිසානායක මහතා උපදෙස් ලබාදී ඇති බැවින් අද (21) ජනාධිපතිවරයා පිළිගැනීම වෙනුවෙන් ජය මංගල ගාථා, ත්‍රිවිධ හමුදා උත්තමාචාර, ආචාර වෙඩි මුර සහ රථ පෙළපාළි ආදි කිසිවක් මෙම උත්සවය සඳහා ඇතුළත් නොවීම විශේෂත්වයක් වේ.
එහෙත් මෙම උත්සවය චාම් හා අභිමානවත් ලෙස පැවැත්වීම වෙනුවෙන්
සියලු කටයුතු සංවිධානය කර ඇති අතර මේ වෙනුවෙන් පෙරහුරු වැඩසටහනක්
ද ඊයේ (20) පාර්ලිමේන්තු සංකීර්ණයේදී පැවැත්විණි.
ආණ්ඩුක්‍රම ව්‍යවස්ථාවේ 33 (අ) ව්‍යවස්ථාව අනුව පාර්ලිමේන්තුවේ සභාවාරයක් ආරම්භයේදී ආණ්ඩුවේ ප්‍රතිපත්ති ප්‍රකාශනය පාර්ලිමේන්තුවේදී ඉදිරිපත් කිරීමටත් ආණ්ඩුක්‍රම ව්‍යවස්ථාවේ 33 (ආ) අනු ව්‍යවස්ථාව අනුව පාර්ලිමේන්තුවේ මංගල රැස්වීම්වල මුලසුන දැරීමටත් ජනාධිපතිවරයාට බලතල හිමි වී තිබේ.
මෙහිදී සිය ආණ්ඩුවේ ඉදිරි දැක්ම පිළිබඳ සවිස්තරාත්මක විග්‍රහයක් ජනාධිපතිවරයා විසින් සිය ප්‍රතිපත්ති ප්‍රකාශනය මඟින් පාර්ලිමේන්තුවට සහ මහජනතාවට ඉදිරිපත් කිරීම සිදුවේ.
ජනාධිපතිවරයා විසින් සිදුකිරීමට නියමිත ප්‍රතිපත්ති ප්‍රකාශනය ඉදිරිපත් කිරීමේ අවස්ථාවට පැමිණෙන සියලු ආරාධිතයන් පෙරවරු 11.00ට පමණ වන විට අසුන්ගත යුතු වේ.
ප්‍රතිපත්ති ප්‍රකාශනය හෙවත් රාජාසන කතාව සිදුකිරීමට
පාර්ලිමේන්තු පරිශ්‍රය වෙත පැමිණෙන ජනාධිපති අනුර කුමාර දිසානායක
මහතා පාර්ලිමේන්තු ගොඩනැඟිල්ලේ ප්‍රධාන පියගැටපෙළ අසලදී
කථානායකවරයා විසින් පිළිගැනීම සිදුවේ.
පෙරවරු 11.15ට පමණ අග්‍රාමාත්‍යවරිය හරිනි අමරසූරිය මෙණෙවිය පාර්ලිමේන්තු සංකීර්ණයට පැමිණීම සිදුවේ. ජනාධිපති අනුර කුමාර දිසානායක මහතා පෙරවරු 11.20ට පමණ පාර්ලිමේන්තු සංකීර්ණයට පැමිණීමට නියමිත අතර කථානායකවරයා සහ පාර්ලිමේන්තුවේ මහ ලේකම් කුෂානි රෝහණදීර මහත්මිය, පාර්ලිමේන්තු ගොඩනැඟිල්ලේ ප්‍රධාන පියගැටපෙළ අසලදී ජනාධිපති අනුර කුමාර දිසානායක මහතා පිළිගැනීමට නියමිත වේ. ඉන් අනතුරුව වේත්‍රධාරි සහ නියෝජ්‍ය වේත්‍රධාරි පෙරටු කරගත් කථානායකවරයා සහ පාර්ලිමේන්තුවේ මහලේකම්වරිය විසින් ජනාධිපතිවරයා පාර්ලිමේන්තු මන්දිරය වෙත කැඳවාගෙන යෑම සිදුවේ.
අනතුරුව පැලඳුම් කාමරයට පැමිණෙන ජනාධිපතිවරයා පෙරවරු
11.25ට ගණපූර්ණ සීනුව නාද වන තෙක් එහි රැඳී සිට සම්ප්‍රදායට අනුව
නියෝජ්‍ය වේත්‍රධාරී, සෙංකෝලය අතැති වේත්‍රධාරී, ජනාධිපතිවරයා,
කථානායකවරයා සහ මහලේකම්වරු යන අනුපිළිවෙළට පෙරහරින්
සභාගර්භයට ඇතුළු වීම සිදු වේ.
සභාගර්භයට පිවිසෙන ජනාධිපතිවරයා සභාවේ මුලසුන දරන අතර මෙම අවස්ථාවේදී කථානායකවරයා, පාර්ලිමේන්තුව කාරක සභා අවස්ථාවකදී අසුන් ගන්නා පහළ ආසනයේ ලේකම් මණ්ඩලය සමඟ අසුන් ගැනීම සිදුවේ. ඉන්පසුව ජනාධිපතිවරයා විසින් ආණ්ඩුවේ ප්‍රතිපත්ති ප්‍රකාශනය ඉදිරිපත් කරනු ලැබීමෙන් පසු සභාව කල් තැබීමට නියමිතය.
දස වැනි පාර්ලිමේන්තුවේ මංගල සභා රැස්වීමේ අවස්ථාවට විදේශ රාජ්‍ය තාන්ත්‍රිකයන් ඇතුළු සම්භාවනීය අමුත්තන් පිරිසකට ඇරයුම් කර ඇති බව ද වේත්‍රධාරී කුෂාන් ජයරත්න මහතා වැඩිදුරටත් සඳහන් කළේය. ඒ අනුව මෙම උත්සවයට විද්‍යුත් ක්‍රමයට ආරාධනා පත්‍ර (E - Invitations) යොමුකොට ඇති බව ද වේත්‍රධාරීවරයා පැවසීය.
0 Comments