මහනුවර ප්‍රධාන පාසලක දී ඊයේ (01) තැපැල් ඡන්දය ක්‍රියාත්මක වූ අවස්ථාවේ ඡන්ද පත්‍රිකාව ළඟ තබාගෙන තැපැල් ඡන්දය ලෙස අපේක්ෂක නාමලේඛනය ලියුම් කවරයට දමා විදුහල්පතිවරයාට භාර දුන් බව කියන ගුරුවරියක් මහනුවර පොලිසිය මඟින් අත්අඩංගුවට ගෙන තිබේ.
තැපැල් ඡන්දය ඊයේ (01) පෙරවරුවේ ප්‍රකාශ කිරීමෙන් අනතුරුව නි‍ෙවසට ගොස් තිබෙන ගුරුවරිය එහි දී තම අත්බෑගය පරීක්ෂා කිරීමේ දී තැපැල් ඡන්ද පත්‍රිකාව එහි තිබෙනු දැක ඇත.
ඒ මොහොතේම ඇය විදුහලට පැමිණ තමන් අතින් සිදුව තිබෙන වරද පිළිබඳව විදුහල්පතිවරයා දැනුවත් කරමින් ඡන්ද පත්‍රිකාව ලබා දී තිබේ.
ඡන්ද පත්‍රිකාව බැහැර ගෙන යාම මැතිවරණ නීතිය යටතේ වරදක් බැවින් විදුහල්පතිවරයා මේ සම්බන්ධව මැතිවරණ නිලධාරින් දැනුවත් කර සිද්ධිය පිළිබඳව පොලිසියට පැමිණිලි කර ඇත.
ඡන්දය ප්‍රකාශ කරන අවස්ථාවේ තැපැල් ඡන්ද පත්‍රිකාව සමඟ මනාප ලකුණු කිරීමේ පහසුව සඳහා අපේක්ෂක නම් හා අංක ඇතුළත් පත්‍රිකාවක් සෑම පුද්ගලයෙකුටම ලබාදීම සිදු කෙරෙයි.
තම දරුවා කොතලාවල ආරක්ෂක විශ්වවිද්‍යාලයේ අධ්‍යාපනය ලබන බවත් දුන්හිඳ ප්‍රදේශයේ දී සිදුවූ මාරක අනතුර පිළිබඳ දැන ගැනීමෙන් පසු දුරකතන ඇමතුම් කිහිපයක් ගත් නමුත් ඔහු ඊට ප්‍රතිචාර නොදැක් වූ නිසා තමන් දැඩි නොසන්සුන්තාවකින් පසුවූ බවත් ගුරුවරිය පොලිසියට පවසා තිබේ.
හිතාමතා වරදක් කළේ නම් තමන් කිසිවිටෙකත් ඡන්ද පත්‍රිකාව යළි භාරදීමට නොපැමිණෙන බව ද ඇය පවසා ඇත. ඡන්ද පත්‍රිකාව නි‍ෙවසට රැගෙන ගිය ගුරුවරිය නිවැරැදි ලෙස ඡන්දය පාවිච්චි කර තිබෙන බවට විදුහල්පතිවරයා විසින් සටහන් යොදා තිබුණේ නම් මැතිවරණ නීතිය අනුව ඔහු ද වරදක් සිදු කර තිබෙන බව පොලිසිය පවසයි.
සිද්ධිය සම්බන්ධයෙන් මහනුවර පොලිසිය විමර්ශනයක් ආරම්භ කර තිබෙන අතර අදාළ ගුරුවරිය අධිකරණයට ඉදිරිපත් කිරීමට නියමිතය.
(අසේල කුරුළුවංශ)
0 Comments