ජාත්‍යන්තර කීර්තියක් දිනා සිටි ඉංජිනේරු සමන් විජේසිරි මහතාගේ ඝාතන සිද්ධියේ ප්‍රධාන සැකකරු වන ජෙරාඩ් ලින්කන් ද මෙල් ජනවාරි 5 වනදා දක්වා රිමාන්ඩ් භාරයට පත් කිරීමට හලාවත වැඩබලන මහේස්ත්‍රාත් නුවන් ජයවීර මහතා විසින් නියෝග කර තිබේ.
2018 ඔක්තෝබර් මස සිදුවූ මෙම ඝාතන සිද්ධියේදී එක්සත් ජාතීන්ගේ සංවිධානයේ හිටපු වරලත් ඉංජිනේරු සමන් විජේසිරි මහතා ඝාතනය කොට, ඔහුගේ රුපියල් කෝටි සියයකට අධික දේපළ ව්‍යාජ ලේඛන මගින් පවරාගෙන ඇති බව පොලිස් විමර්ශනවලින් හෙළි වී තිබේ.
ප්‍රධාන සැකකරු: ජෙරාඩ් ලින්කන් ද මෙල් (වෙන්නප්පුව) වන අතර අනෙකුත් සැකකරුවන්: රණේපුර හේවගේ රුවන් චන්දන සහ ඇන්ටනී පෙරේරාය.
මංකොල්ලයට ලක්වූ දේපළ වන්නේ පුත්තලම: පර්චස් 13 ඉඩමක් හලාවත: පර්චස් 20 සහ පර්චස් 50 ඉඩම් දෙකක්
වාහන සහ ව්‍යාපාරික ස්ථාන කිහිපයකි.
බිංගිරිය පානවැව සුන්දර ගම්මානයේ, 1955 ජනවාරි 05 වැනි දින උපත ලැබූ සමන් විජේසිරි, සහෝදර සහෝදරියන් හත්දෙනෙකුගෙන් යුත් පවුලක බාලයා විය. කුඩා කල සිටම ඉගෙනීමට දක්ෂ වූ සමන්
ශිෂ්‍යත්ව විභාගයෙන් සමත්ව කුලියාපිටිය මධ්‍ය මහා විද්‍යාලයේ වැඩිදුර අධ්‍යාපනය හැදෑරීය. උසස් පෙළ විභාගයෙන් සමත් වී මොරටුව විශ්වවිද්‍යාලයට ඇතුළත් වූ සමන්, ඉංජිනේරු උපාධිය හදාරා රටේ ප්‍රවීණ ඉංජිනේරුවරයෙකු බවට පත්විය.
මහඉලූක්පල්ලම කෘෂිකර්ම අංශයේ නව නිර්මාණ පරීක්ෂකයෙකු ලෙස වෘත්තීය ජීවිතය ආරම්භ කළ සමන්, 'මරුයාමා' නමින් ගොයම් කපන යන්ත්‍රයක් නිර්මාණය කර ජාත්‍යන්තර කීර්තියක් දිනාගත්තේය. ඔහුගේ දක්ෂතා හඳුනාගත් එක්සත් ජාතීන්ගේ සංවිධානය, ඉහළ වැටුපක් යටතේ ඔහුව බඳවා ගත්තේය. සැම්බියාව, ඇෆ්ගනිස්තානය, බෲනායි වැනි රටවල සේවය කළ සමන්, එක්සත් ජාතීන්ගේ සංවිධානයේ වැඩ කරන අතරතුර ජපන් ජාතික තරුණියක හමුවී ඇය සමඟ විවාහ විය.
විවාහයෙන් පසු ඔස්ට්‍රේලියාවේ පදිංචියට ගිය සමන්, එරට ක්වීන්ස්ලන්ඩ් විශ්වවිද්‍යාලයෙන් ශාස්ත්‍රපති උපාධියක් ද ලබා ගත්තේය. නමුත් ධනය හා කීර්තිය මැද සිටියද, ඔහුගේ සිත නිරතුරුව යෙදුණේ මව්බිම ගැනය. මව්පියන් හා සහෝදර සහෝදරියන් බැලීමට නිතර ලංකාවට පැමිණි ඔහු, බිංගිරිය බෝඅත්ත ප්‍රදේශයේ සුවිසල් නිවසක් ඉදිකර මව්පියන් එහි පදිංචි කළේය.
කාලයක් ගතවන විට ඔස්ට්‍රේලියාවේ ජීවිතය නීරස වූ සමන්, "ජීවිතේ අන්තිම කාලේ මට මගේ රටේ ගත කරන්න ඕනෙ" යැයි බිරිඳට කීවද, ඇය ඊට එකඟ නොවූවාය. අවසානයේ සමන් තනිවම ලංකාවට පැමිණ, ඔස්ට්‍රේලියාවේ සියලු දේපළ බිරිඳට පවරා දුන්නේය.
ලංකාවේ පදිංචියට පැමිණි සමන්, බිංගිරිය ඌරාවත්ත ප්‍රදේශයෙන් අක්කර 58ක පොල්වත්තක් මිලදී ගෙන එහි සුවිසල් නිවසක් ඉදිකළේය. වතුපිටි බලාගැනීමට මුරකරුවෙකු සොයද්දී හමුවූ ප්‍රියන්ත නම් තරුණයා සමන්ගේ විශ්වාසය දිනාගෙන, කාලයත් සමඟ පවුලේ සාමාජිකයෙකු මෙන් සමීප විය.
උතුරු නැගෙනහිර සංවර්ධන ව්‍යාපෘතිවල උපදේශකයෙකු ලෙස කටයුතු කළ සමන්, පසුව මහනුවර ජලසම්පාදන මණ්ඩලයේ ඉහළ තනතුරක් ද දැරීය. ඔහු හලාවත ප්‍රදේශයේ ද ව්‍යාපාර ආරම්භ කළ අතර, ඒවා පාලනය කිරීමට රත්නප්‍රිය, ඩන්කන් හා නලින් යන අය සමඟ මිත්‍රත්වයක් ගොඩනගා ගත්තේය.
එහෙත් ඔහුගේ ව්‍යාපාරවල ලාභය නිසි පරිදි නොලැබීම ගැන කනස්සල්ලට පත් සමන්, ඒවා විකුණා දැමීමට තීරණය කළේය. මෙය දැනගත් මිතුරන් තිදෙනා,
ඔහුගේ දේපළ අත්පත් කර ගැනීමේ කුමන්ත්‍රණයක් සැලසුම් කළහ.
2018 ඔක්තෝබර් 12 වැනි දින සවස, ප්‍රියන්තගේ දරුවන් දෙදෙනා සමඟ කාලය ගත කරමින් සිටි සමන්ට රත්නප්‍රියගෙන් දුරකථන ඇමතුමක් ලැබිණි. දරුවන් සමඟ සිටීමට සැලසුම් කර තිබුණද, මිතුරන්ගේ බල කිරීම නිසා ඔහු ඔවුන් හමුවීමට ගියේය.
එදින රාත්‍රියේ මත්පැන් සාදයකදී, සමන්ට වැඩිපුර මත්පැන් පොවා ඔහුව ඝාතනය කළ මිනීමරුවන්, ඔහුගේ මෘත දේහය හලාවත කලපුවේ මඩ ගොහොරුවක සඟවා දැමූහ. පසුදින උදෑසන රත්නප්‍රිය, මඩ තැවරුණු සමන්ගේ මෝටර් රථය ඔහුගේ නිවස අසලට රැගෙන ආවේය.
සමන්ගේ අතුරුදන්වීම ගැන ප්‍රියන්ත පොලිසියට පැමිණිලි කළද, මුල් අවධියේ විමර්ශන නිසි ලෙස සිදු නොවීය. මිනීමරුවන් ව්‍යාජ ඇටෝර්නි බලපත්‍ර මගින් සමන්ගේ දේපළ පවරාගෙන, ඔහු විදේශගත වූ බව ප්‍රචාරය කළහ.
කෝටි ගණනක දේපළ මංකොල්ල කෑමක් සමඟ බැඳුණු මෙම ඝාතනය වසර හයක් තිස්සේ අභිරහසක්ව පැවතුණද, අවසානයේ පොලිස් විශේෂ විමර්ශන කණ්ඩායමක් මගින් එළිදරව් විය. ප්‍රධාන සැකකරු වන ජෙරාඩ් ලින්කන් ද මෙල් ඇතුළු සැකකරුවන් තිදෙනා අත්අඩංගුවට ගෙන ඇති අතර, නඩු විභාගය ඉදිරියට පවතී.
විමර්ශන කණ්ඩායම ජ්‍යෙෂ්ඨ පොලිස් අධිකාරි හේමාල් ප්‍රසන්න, ප්‍රධාන පොලිස් පරීක්ෂක මංජුල සිල්වා
පොලිස් අධිකාරි සුජීව විජේසේන, ප්‍රධාන පොලිස් පරීක්ෂක සම්පත් රාජකරුණා හා පොලිස් පරීක්ෂක ලක්මාල්ය.
0 Comments