ඛනිජ තෙල් නීතිගත සංස්ථාවේ සභාපති ජනක රාජකරුණා මහතා පවසන පරිදි, රජය සමඟ ගිවිසුම්ගත වී ඉන්ධන බෙදාහැරීමේ නියුතු විදේශ සමාගම් යටතේ ඇති බොහෝ ඉන්ධන පිරවුම්හල් තවමත් නීති විරෝධී ලෙස සිපෙට්කෝ ලාංඡනය යටතේ ඉන්ධන අලෙවි කරමින් සිටී. මීට හේතුවී ඇත්තේ ඔවුන් විදෙස් සමාගම් නාම භාවිත කිරීම පාඩුවක් යයි සලකන බැවිනි.
මෙලෙස නීතියට පටහැනිව කටයුතු කරන පිරවුම්හල්වලට එරෙහිව නීතිමය පියවර ගැනීමට සැලසුම් කර ඇති බව සභාපතිවරයා අවධාරණය කළේය. නව රජය බලයට පත්වීමෙන් අනතුරුව මේ සම්බන්ධයෙන් අදාළ සමාගම්වලට දැනුම් දුන්නද, ඔවුන් දිගින් දිගටම මහජනතාව නොමඟ යවමින් මෙම ක්‍රියාවලියේ නිරත වන බව ඔහු පෙන්වා දුන්නේය.
සිනොපෙක්, යුනයිටඩ් පෙට්‍රෝලියම් හා ආර්.එම්. පාර්ක්ස් යන සමාගම්වලට පිරවුම්හල් 150 බැගින් ලබාදීමට ගිවිසුම්ගතව තිබුණද, ඇතැම් බෙදුම්කරුවන්ගේ අකමැත්ත හේතුවෙන් එම ඉලක්කය සපුරා නැති බව සභාපතිවරයා පැවසීය.
රජය නියම කරන මිලට තෙල් අලෙවි කිරීමේදී සිදුවන පාඩුව රජයෙන් අයකර ගැනීමේ හිමිකම ගිවිසුම් මගින් සමාගම්වලට හිමිව ඇති අතර, දැනටමත් යුනයිටඩ් පෙට්‍රෝලියම් සමාගම
එම පාඩු පියවා ගැනීම සඳහා රජයට ලිපියක් යොමු කර තිබේ.
ඩොලර් අර්බුදයට විසඳුමක් ලෙස විදේශ සමාගම්වලට ලංකාවේ ඉන්ධන ආනයනය හා බෙදාහැරීමට අවසර දුන්නද, එය ප්‍රායෝගිකව අසාර්ථක වී ඇති බව සභාපතිවරයා පෙන්වා දුන්නේය. තවද, ඉන්ධන ආනයනයෙන් ලැබෙන ආදායම වසරක් යනතුරු ඩොලර්වලට පරිවර්තනය නොකිරීමේ මුල් ගිවිසුම් කොන්දේසිය කැබිනට් තීරණයකින් ඉවත් කර ඇති බවද ඔහු සඳහන් කළේය.
මේ අතර, යුනයිටඩ් පෙට්‍රෝලියම් සමාගම ලංකාවට ගෙන එමින් සිටි ඉන්ධන නැවක් අතරමඟදී හරවා ගෙන ගොස් ඇතත්, එමගින් ජාතික ඉන්ධන සැපයුමට බලපෑමක් නොවන බවත්, සංස්ථාව සතුව ප්‍රමාණවත් සංචිත පවතින බවත් සභාපතිවරයා තහවුරු කළේය.
පසුබිම:
පසුගිය රජය විසින් චීනයේ සිනොපෙක්, ඕස්ට්‍රේලියාවේ යුනයිටඩ් පෙට්‍රෝලියම් හා ඇමරිකාවේ ආර්.එම්. පාර්ක්ස් සමාගම් සමඟ ශ්‍රී ලංකාව තුළ ඛනිජ තෙල් නිෂ්පාදන ආනයනය, ගබඩා කිරීම, බෙදාහැරීම හා අලෙවි කිරීම සඳහා ගිවිසුම් අත්සන් කර තිබේ.
මෙම ගිවිසුම් යටතේ සංස්ථාවේ පිරවුම්හල් 450ක් එම සමාගම්වලට පැවරීමටත්, නව ස්ථාන 50ක පිරවුම්හල් ඉදිකිරීමටත් සැලසුම් කර තිබිණි.
0 Comments