ශ්‍රී ලංකාවේ පොහොසත්ම ක්‍රීඩා සංගමය වන ශ්‍රී ලංකා ක්‍රිකට් ආයතනයේ සහයෝගය ලබා රටේ අනෙකුත් ක්‍රීඩා සංවර්ධනය කිරීම සඳහා විධිමත් සැලසුමක් සකස් කිරීමට ක්‍රීඩා අමාත්‍යාංශය සූදානම් වෙයි. ක්‍රිකට් ආයතනයේ දායකත්වය ලබා ගෙන ක්‍රිකට් ක්‍රීඩාවට පමණක් සීමා නොවී අනෙකුත් පාසල් ක්‍රීඩා සංවර්ධනය සඳහා ද ගත හැකි ක්‍රියාමාර්ග ඒම සැලසුමට ඇතුළත් වේ.
ක්‍රීඩා ඇමැති සුනිල් කුමාර ගමගේ මහතා හා ශ්‍රී ලංකා ක්‍රිකට් ආයතනයේ නිලධාරින් අතර පෙරේදා ක්‍රීඩා අමාත්‍යාංශයේ පැවති සාකච්ඡාවේදී මේ සම්බන්ධ අවධානය යොමු විය.
ශ්‍රී ලංකාවේ සංචාරක ව්‍යාපාරය ප්‍රවර්ධනය කිරීම උදෙසා ක්‍රිකට් ක්‍රීඩාව යොදා ගත හැකි ආකාරය පිළිබඳව දීර්ඝ ලෙස සාකච්ඡා වූ අතර, ක්‍රිකට් ක්‍රීඩාව පදනම් කරගත් ක්‍රීඩා ආර්ථිකය දියුණු කිරීම සඳහා වැඩපිළිවෙළක් සම්බන්ධයෙන් අවධානය යොමු විය.
ක්‍රිකට් ක්‍රීඩාවේ වත්මන් තත්ත්වය පිළිබඳ සාකච්ඡා කළ ඇමැතිවරයා ක්‍රිකට් ක්‍රීඩාවට අවශ්‍ය පහසුකම් සංවර්ධනය කිරීමේ සැලසුම් පිළිබඳවත්, ක්‍රිකට් ක්‍රීඩාංගණ වඩාත් තිරසර ලෙස වැඩිදියුණු කළ යුතු ආකාරය පිළිබඳවත් අවධානය යොමු කළේය. ශ්‍රී ලංකා ක්‍රිකට් ආයතනයේ යන්ත්‍රණය පිළිබඳව හා පැනනැඟී ඇති ගැටලු කඩිනමින් නිරාකරණය කිරීම සඳහා වූ ක්‍රමවේදයන් පිළිබඳව ද මෙහිදී දෙපාර්ශ්වයේ අවධානය යොමු විය.
“ශ්‍රී ලංකාවේ ක්‍රීඩාව නඟාසිටුවීමට කිසිදු භේදයකින් තොරව සියලු දෙනා එක්විය යුතුයි. වැඩිදෙනකුගේ අවධානයක් හා ආදරයක් ඇති ක්‍රිකට් ක්‍රීඩාවෙන් රටට කීර්තියක් ගෙන දෙන ආකාරයේ වැඩපිළිවෙළකට පූර්ණ සහයෝගය දෙනවා” ක්‍රීඩා ඇමැතිවරයා ශ්‍රී ලංකා ක්‍රිකට් නිලධාරින්ට පැවසීය.
ශ්‍රී ලංකා ක්‍රිකට් සභාපති ශම්මි සිල්වා මහතා ඇතුළු ශ්‍රී ලංකා ක්‍රිකට් විධායක සභා නිලධාරින්ගේ සහභාගිත්වයෙන් පැවති මේ සාකච්ඡාවට ක්‍රීඩා නියෝජ්‍ය ඇමැති සුගත් තිලකරත්න, තරුණ කටයුතු නියෝජ්‍ය ඇමැති එරංග ගුණසේකර යන මහත්වරු ද සහභාගි වූහ.
(ප්‍රින්ස් ගුණසේකර)
0 Comments