හොරොව්පොතාන පොලිස් වසමේ ඇළපත්වැව ප්‍රදේශයේ පිහිටි පෙර පාසලක මිදුලේ සෙල්ලම් කරමින් සිටි කුඩා දරුවකුගේ ඇඟට, ගසක අත්තක් කඩා වැටීම හේතුවෙන් අනුරාධපුර ශික්ෂණ රෝහලට ඇතුළත් කර ප්‍රතිකාර ලබමින් සිටියදී පසුගියදා (16) ජීවිතක්ෂයට පත් වූ බව හොරොව්පොතාන පොලීසිය පවසයි.
මෙලෙස අවාසනාවන්ත ලෙස ජීවිතක්ෂයට පත්ව ඇත්තේ, ඇළපත්වැව, මොරකෑව හොරොව්පොතාන ලිපිනයේ පදිංචිව සිටි ආර්.කේ. නෙසදු දුලාෂ් පෙරේරා නමැති වයස අවුරුදු 5යි මාස 6ක පිරිමි දරුවෙකි. මොරකැව ප්‍රදේශයේ පිහිටි පෙර පාසලේ ඉගෙනුම ලබමින් සිටි මේ දරුවා පෙර පාසල් අවසන් වීමෙන් අනතුරුව සෙල්ලම් කරමින් සිටියදී,
ගසක අත්තක් කඩා වැටීම හේතුවෙන් ඉකුත් 12දා මේ අනතුර සිදුව ඇතැයි පොලීසිය කියයි. එදින පෙර පාසල නිමවීමෙන් අනතුරුව පෙර පාසල් ගුරුවරිය මවුපියන් පිරිසක් කැඳවා, පෙර පාසලේ වර්ෂ අවසාන විවිධ ප්‍රසංගය සම්බන්ධයෙන් සාකච්ඡා කරමින් සිටියදී, එම දරුවා ගල් කැට රැගෙන ඒ ආසන්නයේ සෙල්ලම් කරමින් සිට ඇති බව දරුවාගේ මව ප්‍රකාශ කර ඇතැයි පොලීසිය කියයි.
ගසක අත්තක් කඩා වැටී දරුවා වැටී සිටින අයුරු දරුවාගේ මාමා කෙනෙකු දැක වහා ක්‍රියාත්මක වී දරුවා හොරොව්පොතාන ශික්ෂණ රෝහල වෙත ඇතුළත් කර ඇති අතර, දරුවාගේ තත්ත්වය බරපතළ වීම හේතුවෙන් අනුරාධපුර ශික්ෂණ රෝහලට මාරු කර යවා ඇති බව ද පොලීසිය සඳහන් කළේය. අනුරාධපුර ශික්ෂණ රෝහලේ හදිසි ප්‍රතිකාර ඒකකයට ඇතුළත් කිරීමෙන් අනතුරුව දැඩි සත්කාර ඒකකයේ ප්‍රතිකාර ලබමින් සිටියදී පෙරේදා (16) මේ දරුවා ජීවිතක්ෂයට පත්වූ බව පොලීසිය වැඩිදුරටත් සඳහන් කළේය.
අනුරාධපුර ශික්ෂණ රෝහලේ හදිසි මරණ පරීක්ෂක, රශ්මික ගමආරච්චි මහතා විසින් දේහය සම්බන්ධයෙන් මරණ පරීක්ෂණය පැවැත්වීමෙන් අනතුරුව පශ්චාත් මරණ පරීක්ෂණය පැවැත්වීමට නියමිතව තිබිණි.
දරුවන්ගේ ආරක්‍ෂාවට තර්ජනයක් වීම හේතුවෙන් පෙර පාසල අසල දිරාපත් වී ඇති අතු ඉවත් කර දෙන ලෙස අදාළ බලධාරින්ගෙන් ඉල්ලා සිටියත් මෙතෙක් එය සිදු නොකර නැති බවත් මවුපියෝ පවසති. ඔවුන් වැඩිදුරටත් පැවසුවේ දරුවාගේ ඇඟට වැටී ඇති දිරාගිය අත්ත දින 5ක් ඉක්ම ගියත් තවමත් ඉවත් කර නැති බවයි.
(අනුරාධපුර - බී.ජී. චතුරංග)
0 Comments