පොලිස් අණ නොතකා ධාවනය කළ මෝටර් රථයකට ඊයේ (10) අලුයම කඩුවෙල පොලිසියේ නිලධාරීන් පිරිසක් විසින් වෙඩි තබා ඇතත් එම රථය නොනවත්වා ධාවනය වී ඇති බවත් සැකකරු අත්අඩංගුවට ගැනීමට මෙ‍ෙහයුමක් ක්‍රියාත්මක බවත් වාර්තාවේ.කඩුවෙල, හේවාගම ප්‍රදේශයේදී මෙම වෙඩි තැබීම සිදුව ඇත.
පොලිස් වෙඩි ප්‍රහාර මැද්දේ පලාගිය මෝටර් රථය බෝමිරිය ප්‍රදේශයේ එකක් බවට මේ වන විට හඳුනාගෙන ඇතැයි කඩුවෙල පොලීසිය කියයි.
වැලිවිට, අටේකණුව ප්‍රදේශයේ පදිංචි කාන්තාව සහ මෝටර් රථයෙන් පලාගිය පුද්ගලයා අතර සමීප සබඳතාවක් තිෙබන බවත් පෙරේදා රාත්‍රී ඇති වූ කිසියම් හෝ ගැටලුවකින් අනතුරුව එම කාන්තාව තුවාල ලබා ඇතැයිද මේ සම්බන්ධයෙන් එම කාන්තාව 119 පොලිස් හදිසි ඇමතුම් අංශය දැනුම්වත් කර ඇති අතර පොලිස් නිලධාරීන් එම ලිපිනය සොයා යාමේදී පිටස්තර පුද්ගලයකු එම ස්ථානයේ නොවීම හේතුවෙන් පොලිස් නිලධාරින් නැවත පැමිණ ඇති බවත් කියති.
තුවාල ලද එම කාන්තාව ප්‍රතිකාර සඳහා ඇයගේ පුතු සමඟ යතුරුපැදියෙන් කඩුවෙල නගරයේ දිවා රාත්‍රී විවෘතව තිබෙන වෛද්‍ය මධ්‍යස්ථානයක් කරා පැමිණීමේදී ඊට පිටුපසින් පැමිණ තිබූ සැකකරු යතුරුපැදිය හැප්පීමට උත්සාහ දැරීමේදී ඇය පොලීසිය පිහිටා තිබෙන මාර්ගය දෙසට යතුරුපැදිය ධාවනය කර ඇති අතර,
එම අවස්ථාවේදී මෝටර් රථයේ රියැදුරු ලෙස කටයුතු කළ එම පුද්ගලයා යතුරුපැදියේ පිටුපසින් හැප්පීමට උත්සාහ දරන අයුරු පොලීසිය ඉදිරිපිට ප්‍රධාන ගේට්ටුවේ රාජකාරී කරන පොලිස් නිලධාරියාගේ නෙත ගැටී ඇතැයි පොලීසිය කියයි.
ඒ බව රාත්‍රී රාජකාරි නිරත සේවා නිලධාරියා දැනුම්වත් කර අදාළ මෝටර් රථය නැවැත්වීම සඳහා පොලිස් නිලධාරීන් දෙදෙනාම මාර්ගයට පැමිණීමේදී පොලිස් අණට කීකරු නොවූ රියැදුරු වෙට්ටුවක් දමා එම ස්ථානයෙන් පලායාමේදී උප සේවා නිලධාරියා විසින් රාජකාරී ගිනි අවියෙන් මෝටර් රථය දෙසට වෙඩි තබා ඇති අතර වෙඩි ප්‍රහාර මැද්දේ මෝටර් රථය පලාගොස් තිබූ බව පොලීසිය කියයි.
අදාළ මෝටර් රථය සම්බන්ධයෙන් මේ වන විට නිශ්චිත ලෙස තොරතුරු සොයාගෙන ඇති අතර අත්අඩංගුවට ගැනීම සඳහා විශේෂ පොලිස් කණ්‌ඩායමක් යොදවා ඇතැයි උසස් පොලිස් නිලධාරියෙක් පැවසීය.
0 Comments