රාත්‍රි කාලයේ කණ්ඩලම වැවේ මසුන් මැරිම සඳහා ගිය විසි හය හැවිරිදි ධීවරයකුගේ මළ සිරුරක් 20 වැනි දින පස්වරුවේ කණ්ඩලම වැවේ දැලක පැටලී දියමත පාවෙමින් තිබියදී පොලිස් ජීවිතාරක්ෂක කණ්ඩායම් විසින් සොයාගත් බව දඹුල්ල පොලිසිය කියයි.මෙසේ මියගොස් ඇත්තේ දඹුල්ල, කණ්ඩලම, දියවර ගම්මානයේ පදිංචි එම්. ජී. ප්‍රේම තරංග හේරත් නමැති එක්දරු පියෙකි.
තවත් ධීවරයන් පිරිසක් සමඟ මියගිය පුද්ගලයාද රාත්‍රි කාලයේ මසුන් මැර්ම සඳහා කණ්ඩලම වැවේ පරණ ගම්මානය ප්‍රදේශයේ දියඹ මහා කැලෑව පිහිටි ප්‍රදේශයට ගොස් ඇතැයි පොලිසිය කියයි. එම ප්‍රදේශයේ ජලය පිරුණු ගස්වල ඉහළ වාඩි සකසාගෙන ඔවුන් රැය පහන් කරමින් මසුන් මරණ බව පොලිසිය කියයි. ඒ අනුව තවත් ධීවරයන් කිහිපදෙනකු සමඟ වාඩියක මත්පැන් සාදයක්ද පවත්වා මියගිය පුද්ගලයා ඔරුව රැගෙන නිවෙසට යන බව පවසා නික්ම ගොස් ඇති බව පොලිසිය කියයි. ඔහු ගමන් ගත් ඔරුව වෙනත් ප්‍රදේශයකට ගසාගෙන ගොස් තිබෙන අයුරු පසුදා දැක නිවැසියන් මේ පිළිබඳව පොලිසියට පැමිණිලි කොට තිබේ.
දඹුල්ල මූලස්ථාන පොලිස් පරීක්ෂක වසන්ත කුමාර මහතා පොලිස් ජීවිතාරක්ෂක ඒකකයේ උප පොලිස් පරීක්ෂක රාජකරුණා මහතා සහ පොලිස් ජීවිතාරක්ෂක කණ්ඩායම් දැනුවත්කොට ධීවරයන්ගේ සහ ප්‍රදේශවාසීන්ගේ සහාය ඇතිව අතුරුදන්ව සිටි පුද්ගලයා සෙවීමේ මෙහෙයුමක් දියත් කොට තිබිණි. දින දෙකක කාලයක් මෙම මෙහෙයුම ක්‍රියාත්මක කළද මියගිය පුද්ගලයාගේ තොරතුරක් හමුවී නොමැත. කෙසේ වෙතත් ඔවුන් සමඟ මත්පැන් සාදයේ සිටි පුද්ගලයන් තිදෙනා පොලිස් භාරයට ගෙන ප්‍රශ්නකොට නිදහස් කර තිබේ. ප්‍රදේශවාසීහු සහ මියගිය අයගේ ඥාතීන් දැඩි ලෙස චෝදනා කරන්නට වූයේ තම ඥාතියාට කිසියම් හෝ අනතුරක් සිදුකරන්නට ඇති බවට සැක කරන බවය.
කෙසේ වෙතත් පොලිස් ජීවිත ආරක්ෂක නිලධාර්න් සහ ප්‍රදේශවාසීන් ධීවරයන් සිදුකරන ලද මෙහෙයුමේදී මහා දිය මැද දැලක පැටලී පාවෙමින් තිබූ ඔහුගේ මළ සිරුර සොයාගත් බව පොලිසිය කියයි.මියගිය පුද්ගලයාගේ පශ්චාත් මරණ පරීක්ෂණය 21 වැනි දින දඹුල්ල රෝහලේදී පැවැත්වීමට නියමිතව තිබේ. සිද්ධිය සම්බන්ධයෙන් ඔහු සමඟ සිටි සහ මසුන් මැරීමේ වාඩියේ සිටි පුද්ගලයන් තිදෙනාගෙන් ප්‍රකාශය සටහන් කර ගත් බව පොලිසිය සඳහන් කර සිටී.සිද්ධිය පිළිබඳව වැඩිදුර පරීක්ෂණ දඹුල්ල පොලිසිය පවත්වනු ලබයි.
(දඹුල්ල - කේ. කේ. අරියදාස)
0 Comments