ඛෙත්තාරම පුරාණ විහාරස්ථානයේ ඉහළ මහලේ බුද්ධ මන්දිරයේ තිබූ ඉපැරැණි මකර තොරණ හා එහි තැන්පත් කර තිබූ බුද්ධ ප්‍රතිමා වහන්සේ නමක් 28 දින සොරකම් කිරීමේ සිද්ධියට සම්බන්ධ හිමිවරුන් දෙනමක්, ගිහි පුද්ගලයකු සමඟ සොරකම් කළ භාණ්ඩ හා සොරකම සඳහා යොදාගත් මෝටර් රථ දෙකක්ද, කෑගල්ල කොට්ඨාස අපරාධ විමර්ශන ඒකකයේ නිලධාරින් කණ්ඩායමක් විසින් පෙරේදා (01) රාත්‍රි අත්අඩංගුවට ගෙන තිබේ.
අත්අඩංගුවට ගෙන ඇත්තේ කිඹුල්විලවත්ත, දොම්පේ ප්‍රදේශයේ විහාරස්ථානයක වැඩ වාසය කරන බව කියන 28 හැවිරිදි හිමිනමක්, මහනුවර මහයියාව ප්‍රදේශයේ විහාරස්ථානයක වැඩ වාසය කරන හිමිනමක් සහ පේරාදෙණිය ගන්නෝරුව ප්‍රදේශයේ සංචාරක හෝටලයක හිමිකරුවකු බවද පොලීසිය පවසයි.
දෙවනගල රජමහා විහාරස්ථානයේ විහාරාධිපති පූජ්‍ය මැදිරිගිරියේ පුඤ්ඤසාර හිමියන් විසින් ඉකුත් 28 වැනිදා අදාළ සොරකම සම්බන්ධයෙන් මාවනැල්ල පොලීසියට කළ පැමිණිල්ලක් මත සබරගමු පළාත් භාර ජ්‍යෙෂ්ඨ නියෝජ්‍ය පොලිස්පති සංජීව ධර්මරත්න මහතාගේ නියෝග මත කෑගල්ල කොට්ඨාස අපරාධ විමර්ශන ඒකකය විසින් සිද්ධිය සම්බන්ධයෙන් විමර්ශන පවත්වා සැකකරුවන් අත්අඩංගුවට ගනු ලැබීය.
දෙවනගල රජමහා විහාරස්ථානයේ විහාරාධිපති පූජ්‍ය මැදිරිගිරියේ පුඤ්ඤසාර හිමියන් භාරයේ තිබෙන දෙවනගල, කරහම්පිටිගොඩ ඛෙත්තාරම පුරාණ විහාරස්ථානයේ ඉහළ මහලේ බුද්ධ මන්දිරයේ සවිකර තිබූ කෝටි දෙකහමාරකට
වඩා වැඩි බව පැවසෙන ඉපැරැණි රිදී මකර තොරණ හා එහි තැන්පත් කර තිබූ පිත්තල බුද්ධ ප්‍රතිමා වහන්සේ නමක් සහ විහාරස්ථානයේ දින කිහිපයක් වැඩ වාසය කළ තරුණ භික්ෂුන් වහන්සේ නමක් පසුගිය 27 වැනිදා රාත්‍රියේත් 28 වැනිදා පාන්දර කාලය අතරතුර අතුරුදන්ව ඇති බවද පොලීසිය පැවසීය.
අත්අඩංගුවට ගත් නඩු භාණ්ඩ සහ සැකකරුවන් අද දින මාවනැල්ල දිසා මහේස්ත්‍රාත් අධිකරණය හමුවට ඉදිරිපත් කිරීම සඳහා සැකකරුවන් හා නඩු භාණ්ඩ මාවනැල්ල පොලිසිය වෙත භාරදී ඇති බවද පොලීසිය පවසයි.
(අරණායක - රෝහණ ජයරත්න)
0 Comments