මාධ්‍යවලට ප්‍රකාශ නිකුත් කරනවාට වඩා ජනතාවට ඵලදායී අයුරින් වගකීම් ඉටු කිරීමට කැබිනට් මණ්ඩලයට සහ නියෝජ්‍ය අමාත්‍යවරුන්ට කාලය වෙහෙස නොබලා නිහඬව වැඩ කිරීමට සිදුවී ඇති බව සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතා පැවසීය.වර්තමානයේ රට පවතින තත්වය අනුව රජයේ ශක්තිමත් පදනම සකස් කිරීමේ බාරඳුන් වගකීම අංගසම්පූර්ණව ඉෂ්ට කිරීම සඳහා කාලය වැය කළ යුතුව ඇතැයිද අමාත්‍යවරයා කීය.
අමාත්‍ය මණ්ඩලයට ජනමාධ්‍යවලින් නැගෙන චෝදනා සම්බන්ධයෙන් අදහස් දක්වමින් අමාත්‍යවරයා මේ බව පැවසීය.මේ දිනවල “අමාත්‍යවරුන් අල්ල ගන්න බැහැ. මාධ්‍යයට ප්‍රකාශ නිකුත් කරන්නේ නැහැ. සම්මුඛ සාකච්ඡා දෙන්නේ නැහැ' යනුවෙන් චෝදනා නැගෙන බව ද නලින්ද ජයතිස්ස මහතා සඳහන් කළේය.
මාධ්‍යයට වාරණ පැනවීමට නව රජයට කිසිදු අදහසක් නොමැති බවත් ජනතාව වෙනුවෙන් මාධ්‍ය නිසි ලෙස මෙහෙයවීමේ වගකීම රජය ඉටු කරන බවත් අමාත්‍යවරයා කීය. සෞඛ්‍ය හා ජනමාධ්‍ය අමාත්‍යවරයා මේ බව කීවේ ශ්‍රී ලංකා විද්‍යුත් විකාශකයන්ගේ සංගමයේ නියෝජිතයින් පිරිසක් සමග ජනමාධ්‍ය අමාත්‍යාංශයේ දී පැවැති සාකච්ඡාවකදීය. ශ්‍රී ලංකා විද්‍යුත් විකාශකයන්ගේ සංගමයේ අදහස් සහ යෝජනා අමාත්‍යවරයා වෙත ඉදිරිපත් කිරීමත්, ඉල්ලීම් කිහිපයක් පිළිබඳව සාකච්ඡා කිරීමත් සඳහා එම සංගමය ජනමාධ්‍ය අමාත්‍යවරයාගෙන් කළ ඉල්ලීමක් අනුව මෙම සාකච්ඡාව කැඳවා තිබිණි.
මාධ්‍ය සහ රජය අවබෝධයෙන් කටයුතු කළ යුතු බවද රජය ජනතාව වෙනුවෙන් මාධ්‍ය නිසි ලෙස මෙහෙයවීමේ වගකීම ඉටු කරන අතර මාධ්‍යයට වාරණ පැනවීමට රජයට කිසිඳු අදහසක් නොමැති බවත් මෙරට ජනමාධ්‍ය අමාත්‍යාංශය වගකීමක් නැති අක්‍රීය තැනක් බවට පත්කර ඇතැයිද ජනමාධ්‍ය අමාත්‍යාංශය නිසි තැන තැබීම වර්තමාන රජයේ මූලිත අරමුණක් වන්නේ යැයිද අමාත්‍යවරයා කීය.
(අංජුල මහික වීරරත්න)
0 Comments