දෙවන වරට විවාහයක් කර ගත් කාන්තාවක විසින් ඇගේ දෙවන සැමියාට නොකියා හොර රහසේම දරු ගැබක් වෛද්‍යවරයකු මඟින් විනාශ කර ගත් බව කියන සිද්ධියකට අදාළව එම කාන්තාව ඇතුළු එම සිද්ධියට සම්බන්ධ සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙස කොළඹ අතිරේක මහේස්ත්‍රාත් බණ්ඩාර ඉලංගසිංහ මහතා දෙමටගොඩ පොලීසියට ඊයේ (10) නියෝග කළේය.
නාරාහේන්පිට ප්‍රදේශයේ පදිංචි සිසිර සම්පත් නමැති ඇගේ දෙවන විවාහයේ සැමියා විසින් ඉකුත් 30 වන දින දෙමටගොඩ පොලීසියට කරන ලද පැමිණිල්ලකට අනුව අධිකරණයට කරුණු වාර්තා කළ අවස්ථාවේ මහේස්ත්‍රාත්වරයා විසින් මෙම නියෝගය ලබා දුන්නේය.
එම සිද්ධිය පිළිබඳව කරුණු දක්වමින් දෙමටගොඩ පොලීසිය අධිකරණයට සඳහන් කරනු ලැබුවේ කලලය විනාශ කරනු ලැබූ නාරාහේන්පිට ප්‍රදේශයේ පදිංචි කාන්තාව පෙර විවාහක කාන්තාවක වන බවත් ඇය එම විවාහය දික්කසාදය වී ඇති බවට අසත්‍ය ප්‍රකාශ කරමින් පැමිණිලිකරු හා විවාහ වී ඇති බවත්ය.
එසේ විවාහ වූ පසු පැමිණිලිකරු සහ එම කාන්තාව නාරාහේන්පිට ප්‍රදේශයේ පදිංචිව සිටින අතරතුර ඇය ගැබ්ගෙන ඇති බවත් ඒ බව පැමිණිලිකරුට සඟවා ඔහුට හොර රහසේ කොළඹ පෞද්ගලික රෝහලක් වෙත ගොස් එම දරු කලලය විනාශ කර ඇති බවත් පොලීසිය අධිකරණයට දැන්වීය.
පැමිණිලිකරු වෙනුවෙන් පෙනී සිටි නීතිඥවරයා සඳහන් කරනු ලැබුවේ මෙම සිද්ධියේ සැකකාර කාන්තාව පළමු විවාහයෙන් දික්කසාද වී ඇති බවට අසත්‍ය ප්‍රකාශ කරමින් පැමිණිලිකරු හා විවාහ වී ඇති බවය.
එම කාන්තාව පැමිණිලිකරු සමඟ ගැටුම් ඇති කරගෙන ඔහුව නි‍ෙවසින් එළවා දැමීමට ද කටයුතු කර ඇති බවට පොලීසිය කරුණු ඉදිරිපත් කළේය.
සැකකාර කාන්තාව කොළඹ පෞද්ගලික රෝහලක වෛද්‍යවරයෙකු ලවා කලලය විනාශ කරගෙන ඇති අතර ඒ පිළිබඳව පැමිණිලිකරු තම හිතවතකුගේ මාර්ගයෙන් තොරතුරු දැනගැනීමෙන් පසුව සූක්ෂ්මව රෝහල වෙත ගොස් සිද්ධියට අදාළ සියලු වෛද්‍ය වාර්තාවන් ද ලබාගෙන තිබෙන බව දෙමටගොඩ පොලීසිය අධිකරණයට කරුණු දැක්වීය.
ඉදිරිපත් වූ කරුණු සලකා බැලූ අධිකරණය සිද්ධියට අදාළව විමර්ශන කටයුතු සිදු කර සියලුම සැකකරුවන් අත්අඩංගුවට ගෙන අධිකරණයට ඉදිරිපත් කරන ලෙස නියෝග කළේය.
පැමිණිලිකාර පාර්ශ්වය වෙනුවෙන් නීතිඥ නාලක ජයසිංහ මහතා අධිකරණයේ පෙනී සිටියේය.
(කල්පනි අබේසිංහ)
0 Comments